ທ່ານ ວັນວິໄລ ແດນພູຫຼວງ ລົງເຄື່ອນໄຫວວຽກງານຢູ່ເມືອງ ວຽງທອງວັນທີ 09 ມິຖຸນາ 2021 ທ່ານ ວັນວິໄລ ແດນພູຫຼວງ ຮອງເລຂາພັກແຂວງ ພ້ອມດ້ວຍຄະນະໄດ້ລົງເຄື່ອນໄຫວຽກງານຢູ່ເມືອງ ວຽງທອງ, ມີທ່ານ ອາລຸນສັກ ປະທຳມະວົງ ຮອງເຈົ້າເມືອງ ວຽງທອງ ແລະ ຂະແໜງການທີ່ກ່ຽວ ຂ້ອງຮ່ວມນຳພາທາງ.
ການລົງເຄື່ອນໄຫວຢ້ຽມຢາມ ໃນຄັ້ງນີ້ ໄດ້ໄປບ້ານ ໄຊຈະເລີນ ແລະ ບ້ານ ໂພນດູ່ ເພື່ອລົງເກັບກຳຂໍ້ມູນດ້ານເສດຖະກິດ-ສັງຄົມຂອງບ້ານ ທ່ານ ຈານທອງ ອ່ອນພະຈັນ ນາຍບ້ານ ໄຊຈະເລີນ ໄດ້ລາຍງານສະພາບເສດຖະກິດ-ສັງຄົມຂອງບ້ານໃຫ້ຄະນະໄດ້ຮັບຊາບ ບ້ານ ໄຊຈະເລີນ ຫ່າງຈາກເທດສະບານເມືອງວຽງທອງປະມານ 32 ກິໂລແມັດ ມີທັງໝົດ 118 ຄອບຄົວ,ຄອບຄົວທີ່ຍັງທຸກຍາກ 30 ຄອບຄົວປະຊາຊົນສ່ວນໃຫຍ່ໄດ້ຢຶດຖືອາຊີບທຳການຜະລິດປູກຝັງ-ລ້ຽງສັດ ແລະ ເຮັດການບໍລິການຈຳນວນໜື່ງ,ພື້ນຖານໂຄງລ່າງໄດ້ຮັບການພັດທະນາເປັນຕົ້ນແມ່ນໄດ້ນຳໄຊ້ກະແສໄຟຟ້າ,ນຳໃຊ້ລະບົບນໍ້າລິນ,ລູກຫຼານໄດ້ເຂົ້າໂຮງຮຽນ ແລະ ເຂົ້າເຖີງສາທາລະນະສຸກ ເສັ້ນທາງຄົມມະນາຄົມເຂົ້າເຖີງຕົວເມືອງ ແຕ່ມີຄວາມຫຍຸ້ງຍາກການສັນຈອນໃນລະດູຝົນ.ໂອກາດນີ້ ທ່ານ ຮອງເລຂາພັກແຂວງ ຍັງໄດ້ຮຽກຮ້ອງໃຫ້ອຳນາດການປົກຄອງຂັ້ນບ້ານຈົ່ງໄດ້ເປັນເຈົ້າການໃນການເຕົ້າໂຮມຄວາມສາມັກຄີປອງດອງປະຊາຊົນພາຍໃນບ້ານໃຫ້ເປັນປຶກແຜ່ນ,ຊ່ວຍເຫຼືອເຊີ່ງກັນ ແລະ ກັນ ເຊື່ອໝັ້ນຕໍ່ການນຳພາຂອງພັກ,ຕໍ່ອຳນາດການປົກຄອງຂັ້ນເມືອງ ເປັນເຈົ້າການນຳເອົາມະຕິ,ຄຳສັ່ງຂອງຂັ້ນເທິງ ເພື່ອນຳໄປເຜີຍແຜ່ໃຫ້ປະຊາຊົນໄດ້ຮັບຮູ້ເຂົ້າໃຈ ພ້ອມນັ້ນທ່ານ ຍັງໄດ້ຮັບເອົາຄຳສະເໜີຂອງບ້ານ ເປັນຕົ້ນແມ່ນການຫາແຫຼ່ງທຶນເພື່ອບູລະນະອາຄານໂຮງຮຽນຊັ້ນປະຖົມສຶກສາສົມບູນພາຍໃນບ້ານ ໄຊຈະເລີນ,ສຳລັບອາຄານໂຮງຮຽນຊັ້ນປະຖົມສຶກສາສົມບູນບ້ານ ໂພນດູ່ ແມ່ນຈະໄດ້ປຸກຫຼັງໃໝ່ ເພາະວ່າອາຄານແມ່ນມີຄວາມເກົ່າແກ່ ແລະ ຊຸດໂຊມຫຼາຍ ແລະ ຈະໃຫ້ສຳເລັດພ້ອມໃຫ້ໄດ້ນຳໃຊ້ໃນການເປີດສົກຮຽນໃໝ່ ໃນສົກຮຽນປີ 2021-2022 ນີ້.ຈາກນັ້ນ ຕອນບ່າຍຂອງວັນດຽວກັນຢູ່ທີ່ຫ້ອງປະຊຸມຫ້ອງວ່າການເມືອງ ວຽງທອງ ທ່ານຍັງໄດ້ຊຸກຍູ້,ຕິດຕາມ ການປະຕິບັດໜ້າທີ່ວຽກງານຂອງຄະນະຮັບຜິດຊອບວຽກງານກໍ່ສ້າງຮາກຖານເມືອງຈຸດສູມເຂດໃຈກາງ ບ້ານຜາຂອດໃນໄລຍະຜ່ານມາ ທ່ານ ພັນໂທ ພັດທະນາໄດ້ລາຍງານການຈັດຕັ້ງປະຕິບັດໜ້າທີ່ວຽກງານຂອງຄະນະຮັບຜິດຊອບຕະຫຼອດໄລຍະຜ່ານມາ ເຊີ່ງຍົກໃຫ້ເຫັນດ້ານດີ,ດ້ານອ່ອນ,ຂໍ້ຄົງຄ້າງ ແລະ ບາງບົດຮຽນທີ່ສາມາດຖອດຖອນໄດ້ ໃນນັ້ນຄະນະຮັບຊອບໄດ້ລົງສົມທົບກັບອຳນາດການປົກຄອງຂັ້ນບ້ານ ນຳເອົາບັນດາຄຳສັ່ງ,ມະຕິ ແລະ ນິຕິກຳຂອງຂັ້ນເທີງ ລົງເຜີຍແຜ່ໃຫ້ພໍ່ແມ່ປະຊາຊົນພາຍໃນບ້ານໄດ້ຮັບຮູ້ ແລະ ເຂົ້າໃຈ ຕໍ່ແຜນພັດທະນາເສດຖະກິດ-ສັງຄົມຂອງແຂວງ,ຂອງເມືອງ ໃນໄລຍະປະຈຸບັນ ເຫັນວ່າປະຊາຊົນພາຍໃນບ້ານແມ່ນມີຄວາມຮັບຮູ້ ແລະ ເຂົ້າໃຈ ໃຫ້ການຮ່ວມມືເຂົ້າຮ່ວມຂະບວນຢ່າງຕັ້ງໜ້າ ເຮັດໃຫ້ບ້ານມີຄວາມສະຫງົບໂດຍພື້ນຖານ,ການຕັດໄມ້ທຳລາຍປ່າເພື່ອການຜະລິດລຸດລົງ,ປະຊາຊົນມີຄວາມສາມັກຄີປອງດອງ ແຕ່ຄຽງຄູ່ກັນນັ້ນຍັງມີປະກົດການຫຍໍ້ທໍ້ເກີດຂື້ນພາຍໃນບ້ານຫຼາຍບັນຫາເປັນຕົ້ນແມ່ນຂໍ້ຂັດແຍ່ງທາງດ້ານທີ່ດິນ,ການຄ້າຂາຍສີ່ງເສບຕິດ,ມີອາວຸດລ່າເນື້ອໄວ້ຄອບຄອງ ຕໍ່ກັບກໍລະນີດັ່ງກ່າວນັ້ນຄະນະຮັບຜິດຊອບວຽກງານກໍ່ສ້າງຮາກຖານເມືອງຈຸດສຸມເຂດໃຈກາງຮ່ວມກັບອຳນາດການປົກຄອງຂັ້ນບ້ານ ໄດ້ນຳພວກກ່ຽວແຕ່ລະເປົ້າໝາຍມາສຶກສາອົບຮົມ,ສ້າງບົດບັນທຶກ ເພື່ອຈະເປັນບ່ອນອິງໃນການດຳເນີນການເຂົ້າສູ່ຂະບວນຍຸຕິທຳໃນຄັ້ງຕໍ່ໄປ.
ຕອນທ້າຍ ທ່ານ ຮອງເລຂາພັກແຂວງ ຍັງໄດ້ຕີລາຄາສູງຍ້ອງຍໍຊົມເຊີຍຜົນງານການປະຕິບັດໜ້າຂອງຄະນະຮັບຜິດຊອບວຽກງານກໍ່ສ້າງຮາກຖານເມືອງຈຸດສຸມເຂດໃຈກາງຕະຫຼອດໄລຍະຜ່ານມາ,ທ່ານຍັງໄດ້ຊີ້ນຳວຽກງານເພີ່ມເຕີມຫຼາຍດ້ານເປັນຕົ້ນແມ່ນ ໃຫ້ຖືເອົາວຽກງານການສຶກສາອົບຮົມການເມືອງ-ແນວຄິດສອດຫ້ອຍເຂົ້າໃນການເຜີຍແຜ່ມະຕິ,ຄໍາສັ່ງຂອງຂັ້ນເທິງ ເປັນອັນລວມ ແລະ ອັນສະເພາະດ້ວຍຫຼາຍຮູບຫຼາຍສີ ເຮັດໃຫ້ປະຊາຊົນມີຄວາມເຂົ້າໃຈຢ່າງເລິກເຊິ່ງ ຕໍ່ກັບແຜນພັດທະນາເສດຖະກິດ-ສັງຄົມຂອງແຂວງ,ຂອງເມືອງໃນໄລຍະປະຈຸບັນ,ແກ້ໄຂປະກົດການຫຍໍ້ທໍ້ບັນຫາຕ່າງທີ່ເກີດຂຶ້ນສັງຄົມໃນທ້ອງຖິ່ນໃຫ້ຂາດໂຕ,ມີຄວາມສະຫງົບ,ຊຸກຍູ້,ສົ່ງເສີມປະຊາຊົນຫັນທຳການຜະລິດການປູກ-ການລ້ຽງໃຫ້ຫລາຍກາຍເປັນສິນຄ້າ,ສ້າງຄວາມເຂັ້ມແຂງອົງການຈັດຕັ້ງຂັ້ນບ້ານ ໃຫ້ເປັນເຈົ້າການໃນການເຕົ້າໂຮມຄວາມສາມັກປອງດອງປະຊາຊົນພາຍໃນບ້ານໃຫ້ເປັນປຶກແຜ່ນ ແລະໄດ້ນຳເອົາເຄື່ອງອຸປະໂພກ-ບໍລິໂພກຈຳນວນໜື່ງມາມອບໃຫ້ຄະນະຮັບຜິດຊອບວຽກງານກໍ່ສ້າງຮາກຖານເມືອງຈຸດສຸມເຂດໃຈກາງ ບ້ານຜາຂອດ ເພື່ອນຳໃຊ້ເຂົ້າໃນຊີວິດປະຈຳວັນຕື່ມອີກ.
ຂ່າວ_ພາບ: ສາຍສະໝອນ
Loading...