ຕອນບ່າຍວັນທີ 17 ມີນາ 2021 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍການນໍາຈາກກະຊວງ ສາທາລະນະສຸກ ໄດ້ເຄື່ອນໄຫວຕິດຕາມໂຄງການກໍ່ສ້າງໂຮງໝໍມະໂຫສົດຫລັງໃໝ່ ທີ່ໄດ້ຮັບການຊ່ວຍເຫລືອລ້າຈາກພັກ-ລັດ ແລະ ປະຊາຊົນຈີນ ໃນມູນຄ່າທັງໜົດ 600 ລ້ານຢວນ ສະກຸນເງິນຈີນ ໂດຍແມ່ນ ທ່ານ ສີຈິ້ນຜິງ ປະທານປະເທດຈີນ ແລະ ທ່ານ ບຸນຍັງ ວໍລະຈິດ ປະທານປະເທດລາວ ຮ່ວມກັນວາງສີລາລືກພ້ອມກັນ ເມື່ອປີ 2018 ໂຮງໝໍມະໂຫສົດຫລັງໃໝ່ນີ້ມີຂະໜາດ 600 ຕຽງ ເປັນອາຄານສູງ 8 ຊັ້ນ ເນື້ອທີ່ການກໍ່ສ້າງ 31.000 ຕາແມັດ ໃນນີ້ເປັນພື້ນທີ່ຊົມໃຊ້ 54.000 ຕາແມັດ ຕາມແຜນແລ້ວຈະສ້າງສໍາເລັດໃນເດືອນ ສິງຫາ ປີ 2020 ແຕ່ຍ້ອນການແຜ່ລະບາດຂອງພະຍາດໂຄວິດ 19 ຈຶ່ງໄດ້ເລື່ອນມາເຖິງປັດຈຸບັນ ແລະ ຄາດວ່າຈະໃຫ້ສໍາເລັດໃນເດືອນ ພິືດສະພາປີນີ້ ແລະ ຈະເປີດໃຫ້ບໍລິການປະຊາຊົນໃນເດືອນມິຖຸນາປີນີ້ ຫລັງຈາກນັ້ນຈະສຶບຕໍ່ໂຄງການໄລຍະທີ 2 ເພີ່ມເປັນຂະໜາດ 1.000 ຕຽງ ຕາມແຜນຈະໃຫ້ສໍາເລັດໃນເດືອນພຶດສະພາປີໜ້າ.
ໃນໂອກາດນີ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ມີຄໍາເຫັນວ່າ: ການກໍ່ສ້າງໂຮງໝໍມະໂຫສົດຫລັງໃໝ່ແມ່ນໜຶ່ງໃນໂຄງການທີ່ນອນຢູ່ໃນແຜນແມ່ບົດວ່າດ້ວຍຄູ່ຮ່ວມຊະຕາກໍາລາວ-ຈີນ ທີ່ສອງພັກສອງລັດໄດ້ລົງນາມຮ່ວມກັນ ໃນເດືອນເມສາ 2019 ຜ່ານມາ ນອກເໜຶອຈາກໂຄງການກໍ່ສ້າງຫໍປະຊຸມແຫ່ງຊາດ, ໂຄງການກໍ່ສ້າງຫ້ອງວ່າການສູນກາງພັກ, ໂຄງການຫໍວັດທະນະທໍາແຫ່ງຊາດ, ໂຄງການເຮືອນຮັບແຂກຂອງປະມຸກລັດທີ່ລາວເປັນເຈົ້າພາບຈັດກອງປະຊຸມສຸດຍອດອາຊີເອີຣົບ ແລະ ໂຄງການອື່ນໆທີ່ສໍາເລັດໄປແລ້ວ.
ໂຄງການກໍ່ສ້າງໂຮງໝໍມະໂຫສົດຫຼັງໃໝ່ ແມ່ນກະຊວງການຄ້າຈີນເປັນຜູ້ຮັບຜິດ ຊອບໃນນີ້ບໍລິສັດທີ່ປຶກສາແມ່ນ ບໍລິສັດວິສະວະກຳກໍ່ສ້າງສາກົນຈົ່ງຢວນ ສ່ວນບໍລິສັດທີ່ຮັບເໝົາກໍ່ສ້າງແມ່ນ ບໍລິສັດຈູ່ຈົງປັກກິ່ງຈຳກັດ ສ່ວນຝ່າຍລາວ ແມ່ນກະຊວງອຸດສາຫະກຳ ແລະ ການຄ້າ ຮັບຜິດຊອບ. ໂຄງການນີ້ໄດ້ນຳໃຊ້ແຮງງານລາວຈຳນວນ 200 ຄົນ ສ່ວນທີ່ເຫຼືອເປັນແຮງງານຈາກຕ່າງປະເທດ.
Loading...