ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ລົງຊີ້ນໍາວຽກງານຢູ່ແຂວງເຊກອງ

ທີ 7 ກຸມພາ 2019 ນີ້ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ລົງຢ້ຽມຢາມເຮັດວຽກຢູ່ແຂວງເຊກອງ ໂດຍມີທ່ານ ສີດາ ສຸວັນນະສາຍ ຮອງເຈົ້າແຂວງເຊກອງ, ມີຄະນະກຳມະການຍົກລະດັບດ່ານດາກຕະອອກ ເມືງດາກຈຶງ ແຂວງເຊກອງ, ມີ ພະນັກງານ-ລັດຖະກອນຈາກພະແນກ ການຕ່າງປະເທດ ເຂົ້າຮ່ວມ.

ກ່ອນອື່ນ, ທ່ານ ວິສັນ ອິນທະວົງ ຫົວໜ້າພະແນກສາທາລະນະສຸກ ທັງເປັນຮອງປະທານຄະນະກຳມະການຍົກລະດັບດ່ານທ້ອງຖິ່ນດາກຕະອອກ ເມືອງດາກຈຶງ ແຂວງເຊກອງ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງເຊກອງໂດຍຫຍໍ້, ກໍ່ຄືການລາຍງານຄວາມຄືບໜ້າໃນການກະກຽມຄວາມພອ້ມຍົກລະດັບດ່ານຊາຍແດນດາກຕະອອກ-ນາມຢາງ ສສ ຫວຽດນາມ ຂື້ນເປັນດ່ານສາກົນໃນຕໍ່ໜ້ານີ້ ເຊິ່ງມາເຖິງປະຈຸບັນ ການກະກຽມ ມີຫຼາຍໜ້າວຽກສຳເລັດໄປແລ້ວ ໂດຍສະເພາະຄວາມພອ້ມດ້ານພື້ນຖານໂຄງລ່າງ, ກົງຈັກການຈັດຕັ້ງ ,ບຸກຄະລາກອນ, ດ້ານອຸປະກອນ-ເຄື່ອງມືຮັບໃຊ້ອື່ນໆ. ເຊິ່ງຖ້າຫາກດ່ານດາກຕາອອກ ໄດ້ຮັບການຍົກລະດັບຂື້ນເປັນດ່ານສາກົນແລ້ວ ກໍ່ຈະສ້າງເງື່ອນໄຂໃຫ້ການພັດທະນາເສດຖະກິດຂອງແຂວງເຊກອງມີຈັງຫວະການຂະຫຍາຍ ຕົວໄວຂຶ້ນ, ການຜະລິດຈະເພີ່ມຂຶ້ນ ຍ້ອນມີໂອກາດໃນການສົ່ງອອກສິນຄ້າ ຜ່ານດ່ານດາກຕາອອກ ໄປສູ່ ສສ ຫວຽດນາມ; ພອ້ມກັນນັ້ນ, ການສົ່ງເສີມດ້ານການທ່ອງທ່ຽວ ກໍຈະຫຼາກຫຼາຍຂຶ້ນ ໂດຍສະເພາະ ນັກທ່ອງທ່ຽວຈະມີຈໍານວນເພີ່ມຂຶ້ນ ເພາະການເດີນທາງຕາມທາງຫຼວງແຫ່ງຊາດ ເລກ16 ເບ ອອກສູ່ດ່ານດາກຕາອອກ ໄປຫາຊາຍແດນຫວຽດນາມ ມີຄວາມຍາວ 121 ກິໂລແມັດ ທັງເປັນເສັ້ນທາງອອກສູ່ທະເລ ນະຄອນດາໜັງຂອງຫວຽດນາມ ມີໄລຍະທາງ 250ກິໂລແມັດເທົ່ານັ້ນ ແລະ ເປັນເສັ້ນທາງເຊື່ອມຕໍ່ແລວເສດຖະກິດຕະເວັນອອກ ກັບ ຕາເວັນຕົກ ເປັນທາງຜ່ານທີ່ມີໄລຍະສັ້ນທີ່ສຸດ ສາມາດປະຢັດການໃຊ້ຈ່າຍງົບປະມານໃນການຂົນສົ່ງສິນຄ້າ ອີກດວ້ຍ.

ຈາກນັ້ນ ລັດຖະມົນຕີກະຊວງການຕ່າງປະເທດ ກໍໄດ້ຊີ້ນໍາເນັ້ນໜັກໃຫ້ຄະນະກໍາມະການຍົກລະດັບດ່ານທ້ອງຖິ່ນດາກຕະອອກ ເມືອງດາກຈຶງ ແຂວງເຊກອງ ຈົ່ງພ້ອມກັນລົງຕິດຕາມກວດກາສະພາບການຕາມເຂດພື້ນທີ່ ແລະ ກະກຽມຄວາມພ້ອມໃຫ້ສໍາເລັດທຸກໜ້າວຽກ ເພື່ອກຽມຍົກລະດັບໃຫ້ເປັນສາກົນໃນໄວໆນີ້, ພ້ອມກັນນັ້ນພາກສ່ວນທີ່ກ່ຽວຂ້ອງ ກໍຕ້ອງເປັນເຈົ້າການໃນການຄຸ້ມຄອງວຽກງານ, ຕິດຕາມ,ກວດກາ ການປະຕິບັດໜ້າທີ່ວຽກງານຢູ່ດ່ານໃຫ້ເຂັ້ມງວດ  ເປັນເຈົ້າການໃນການປົກປັກຮັກສາຄວາມສະຫົງບປອດໄພຂອງພື້ນທີ່ ໂດຍກໍາໄດ້ບັນຫາ ທີ່ຈະຕ້ອງແກ້ໄຂໃຫ້ໄດ້ຢ່າງຮີບດ່ວນ ແລະທັນການ.