ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຕ້ອນຮັບ ທ່ານ ໂມຮາເມັດ ຄາຣິດ ເຄຼຍລີ, ຜູ້ຊ່ວຍເລຂາທິການໃຫ່ຍອົງການ ສປຊ ສໍາລັບພາກພື້ນຕາເວັນອອກກາງ, ອາຊີ ແລະ ປາຊີຟິກ.

ໃນວັນທີ 24 ພະຈິກ 2023, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດ ຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໂມຮາເມັດ ຄາຣິດ ເຄຼຍລີ, ຜູ້ຊ່ວຍເລຂາທິການໃຫ່ຍອົງການ ສປຊ ສໍາລັບພາກພື້ນຕາເວັນອອກກາງ, ອາຊີ ແລະ ປາຊີ ຟິກ, ປະຈໍາຫ້ອງການກິດຈະການດ້ານການເມືອງ ແລະ ການສ້າງສັນຕິພາບ ສປຊ ພ້ອມດ້ວຍຄະນະ ໃນໂອກາດເດີນມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງ ວັນທີ 24-25 ພະຈິກ 2023.

ໃນໂອກາດດັ່ງກ່າວນີ້, ທ່ານຮອງນາຍົກລັດຖະມົນຕີ ໄດ້ຕີລາຄາສູງ ຕໍ່ການມາຢ້ຽມຢາມເຮັດວຽກທີ່ສຳຄັນໃນຄັ້ງນີ້ ຂອງ ທ່ານ ໂມຮາເມັດ ຄາຣິດ ເຄຼຍລີ, ເຊິ່ງຈະປະກອບສ່ວນເຂົ້າໃນການສົ່ງເສີມ ແລະ ຮັດແຫນ້ນການຮ່ວມມື ລະຫວ່າງ ສປປ ລາວ ແລະ ອົງການສະຫະປະຊາຊາດ ກໍຄືລະຫວ່າງ ອາຊຽນ ແລະ ອົງການ ສະຫະປະຊາຊາດ ໂດຍຜ່ານການຈັດຕັ້ງປະຕິ ບັດຂອບການຮ່ວມມືໃນແຕ່ລະໄລຍະ, ລວມເຖິງການກະກຽມຄວາມພ້ອມຂອງ ສປປ ລາວ ໃນການເປັນປະທານອາຊຽນ ໃນປີ 2024 ເພື່ອພ້ອມກັນສືບຕໍ່ເສີມຂະຫຍາຍຜົນສໍາເລັດທີ່ອາຊຽນຍາດມາໄດ້ ໂດຍສະເພາະການສືບຕໍ່ສ້າງປະຊາ ຄົມອາຊຽນ ເພື່ອເຮັດໃຫ້ອາຊຽນມີການເຊື່ອມຈອດ ແລະ ມີຄວາມເຂັ້ມແຂງຫຼາຍຂຶ້ນ ແລະ ສາມາດຮັບມືກັບສິ່ງທ້າທາຍຕ່າງໆທີ່ເກີດຂຶ້ນ. ພ້ອມກັນນັ້ນ, ທ່ານຮອງນາຍົກລັດຖະມົນຕີ ກໍໄດ້ເນັ້ນໜັກເຖິງບົດບາດສຳຄັນຂອງອົງການ ສປຊ ໃນການຮັກສາສັນຕິພາບ ແລະ ຄວາມໝັ້ນຄົງສາກົນ ກໍຄືການສົ່ງເສີມການຮ່ວມມືສາກົນເພື່ອການພັດທະນາ ພ້ອມທັງສະແດງຄວາມຂອບໃຈ ຕໍ່ ອົງການ ສປຊ ທີ່ໃຫ້ການຮ່ວມມື ແລະ ສະໜັບສະໜູນ ລັດຖະບານ ແຫ່ງ ສປປ ລາວ ໃນການພັດທະນາປະເທດຊາດ ກໍຄືການແກ້ໄຂສິ່ງທ້າທາຍຕ່າງໆໃນໄລຍະຜ່ານມາ.

ທ່ານ ໂມຮາເມັດ ຄາຣິດ ເຄຼຍລີ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັບອົບອຸ່ນ ພ້ອມທັງສະແດງຄວາມຊົມເຊີຍຕໍ່ຜົນສໍາເລັດ ແລະ ຄວາມຄືບໜ້າໃນການພັດທະນາປະເທດໃນໄລຍະຜ່ານມາ. ນອກຈາກນັ້ນ, ຜູ້ຊ່ວຍເລຂາທິການໃຫຍ່ ສປຊ ຍັງໄດ້ຢ້ຳຄືນຄວາມສຳຄັນຂອງການຮ່ວມມືລະຫວ່າງ ອົງການສະຫະປະຊາຊາດ ແລະ ອາຊຽນ ກໍຄືຄວາມໝາຍໝັ້ນທີ່ຈະສະໜັບສະໜູນລັດຖະບານ ແຫ່ງ ສປປ ລາວ ໃນ ການເປັນປະທານອາຊຽນ ໃນປີ 2024 ພ້ອມທັງສະແດງຄວາມເຊື່ອໝັ້ນວ່າ ສປປ ລາວ ຈະສາມາດເຮັດສຳເລັດ ໜ້າທີ່ການເປັນປະທານອາຊຽນ ທີ່ສຳຄັນໃນຄັ້ງນີ້ໄດ້ເປັນຢ່າງດີ.

ກ່ອນການເຂົ້າຢ້ຽມຂ່ຳນັບຄັ້ງນີ້, ທ່ານ ໂມຮາເມັດ ຄາຣິດ ເຄຼຍລີ ໄດ້ພົບປະກັບ ທ່ານ ໂພໄຊ ໄຂຄໍາພິທູນ, ຮອງລັດຖະ ມົນ ຕີກະຊວງການຕ່າງປະເທດ ເພື່ອປຶກສາຫາລືຂອບການຮ່ວມມືລະຫວ່າງ ສປປ ລາວ ແລະ ອົງການ ສປຊ ລວມທັງບົດ ບາດສຳຄັນຂອງຜູ້ປະສານງານອົງການ ສປຊ ປະຈໍາ ສປປ ລາວ, ການຮ່ວມມືລະດັບພາກພື້ນ ແລະ ສາກົນ ເປັນຕົ້ນບັນຫາການປ່ຽນແປງດິນຟ້າອາກາດ ແລະ ຄວາມໝັ້ນຄົງ, ແມ່ຍິງ ແລະ ສັນຕິພາບ ແລະ ຄວາມໝັ້ນຄົງ, ກໍຄືຄວາມສຳຄັນໃນການຈັດກອງປະຊຸມສຸດຍອດ ເພື່ອອານາຄົດ (Summit of the Future) ໃນເດືອນກັນຍາ 2024. ນອກຈາກນັ້ນ, ຍັງໄດ້ພົບປະ ແລະ ເຮັດວຽກກັບກົມອາຊຽນ, ກະຊວງການຕ່າງປະເທດ ເພື່ອປຶກສາຫາລືລາຍລະອຽດ ກ່ຽວກັບການຮ່ວມມືອາຊຽນ-ອົງການ ສປຊ ພາຍໃຕ້ການເປັນປະທານອາຊຽນ ຂອງ ສປປ ລາວ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ