ໃນລະຫວ່າງວັນທີ 23-24 ມັງກອນ 2023, ທ່ານ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ລົງເຂື່ອນໄຫວເຮັດວຽກຢູ່ແຂວງຫົວພັນ, ເຊິ່ງໃນຕອນບ່າຍຂອງວັນທີ 23 ມັງກອນ 2023, ທີ່ ຫ້ອງວ່າການປົກຄອງແຂວງຫົວພັນ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ພົບປະໂອ້ລົມ ຕໍ່ພະ ນັກງານຫຼັກແຫຼ່ງແຂວງຫົວພັນ. ໃນໂອກາດດັ່ງກ່າວ, ທ່ານ ວັນໄຊ ແພງຊຸມມາ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງແຂວງຫົວພັນ ໄດ້ລາຍງານໃຫ້ຊາບ ກ່ຽວກັບ ສະພາບລວມ ແລະ ສະພາບການພັດທະນາເສດຖະ ກິດ-ສັງຄົມ ຂອງແຂວງຫົວພັນ, ໂດຍໄດ້ຍົກໃຫ້ເຫັນເຖິງການຈັດຕັ້ງປະຕິບັດວຽກງານບາງຂົງເຂດໃນໄລຍະຜ່ານມາ ແລະ ແຜນການພັດທະນາເສດຖະ ກິດ -ສັງຄົມຂອງແຂວງໃນຕໍ່ໜ້າ, ເຊິ່ງເຫັນວ່າແຂວງຫົວພັນ ຍັງຮັກສາໄດ້ຄວາມໜັກແໜ້ນທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະ ບຽບຮຽບຮ້ອຍ ເຮັດໃຫ້ການເປັນຢູ່ຂອງປະຊາຊົນໄດ້ຮັບການພັດທະນາຂຶ້ນໄປເລື້ອຍໆ. ທາງດ້ານເສດຖະກິດກໍໄດ້ເອົາ ໃຈໃສ່ຊຸກຍູ່ໃຫ້ຫົວໜ່ວຍການຜະລິດ ແລະ ການບໍລິການດ້ານຕ່າງໆ ທີ່ເປັນທ່າແຮງໃນການຂະຫຍາຍຕົວຂອງເສດຖະ ກິດດີຂຶ້ນເປັນກ້າວໆ; ມາຮອດປີ 2022 ລວມຍອດຜະລິດຕະພັນພາຍໃນ (GDP) ບັນລຸໄດ້ 4.418,13 ຕື້ກີບ, ລາຍໄດ້ສະ ເລ່ຍຕໍ່ຫົວຄົນໄດ້ 14.244.463 ຕໍ່ຄົນຕໍ່ປີ ຫຼື ເທົ່າກັບ 919 ໂດລາສະຫະລັດຕໍ່ຄົນຕໍ່ປີ, ດ້ວຍຈັງວະອັດຕາການຂະຫຍາຍຕົວທາງດ້ານເສດຖະກິດຢູ່ໃນລະດັບ 3,45%, ທຽບໃສ່ແຜນການປີ 2022 ຍັງບໍ່ທັນບັນລຸ 1,47% . ພ້ອມນັ້ນ, ແຂວງຫົວພັນຍັງໄດ້ສຸມໃສ່ວຽກງານການຈັດຕັ້ງຜັນຂະ ຫຍາຍ 2 ວາລະແຫ່ງຊາດຄື: ການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ, ພ້ອມທັງວຽກງານການກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ ແລະ ລຶບລ້າງຄວາມທຸກ ຍາກ.
ໃນໂອກາດດຽວກັນ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ມີຄໍາເຫັນໂອ້ລົມ ຕໍ່ພະນັກງານຫຼັກແຫຼ່ງແຂວງ ໂດຍໄດ້ຍົກໃຫ້ເຫັນເຖິງສະພາບ ການພົ້ນເດັ່ນໃນພາກພື້ນ ແລະ ສາກົນ, ຜົນສໍາເລັດການເຄື່ອນໄຫວວຽກງານການຕ່າງປະເທດໃນໄລຍະຜ່ານມາ, ລວມເຖິງທິດທາງຈຸດສຸມໃນການເຄື່ອນໄຫວວຽກໃນຕໍ່ໜ້າ ໂດຍສະເພາະ ໃນແຂວງຫົວພັນ, ໂດຍໄດ້ໃຫ້ຮູ້ວ່າ ໃນຍຸກແຫ່ງການເປິດກວ້າງການພົວພັນສາກົນ ທີ່ໄດ້ນໍາມາເຊິ່ງໂອກາດ ແລະ ສິ່ງທ້າທາຍຫຼາຍດ້ານ, ສະ ພາບການພາກພື້ນ ແລະ ສາກົນ ນັບມື້້ຍິ່ງສັບສົນ, ຜັນແປໄປຢ່າງໄວວາ ແລະ ຄາດ ຄະເນໄດ້ຍາກ ເປັນຕົ້ນແມ່ນຄວາມຂັດແຍ້ງລະຫວ່າງປະເທດມະຫາອໍານາດ, ການແຂ່ງຂັນທາງການການທະຫານ, ບັນ ຫາເສດຖະກິດ, ການເງິນ, ສະບຽງອາ ຫານ, ຜົນທະທົບທີ່ເກີດຂຶ້ນຈາກໄພທໍາມະຊາດ ແລະ ພະຍາດລະບາດຕ່າງໆ, ໃນຄະນະດຽວກັນນັ້ນກໍຍັງມີບາງສິ່ງທ້າທາຍພາຍໃນ ເປັນຕົ້ນ ກົນອຸບາຍ ແລະ ການເຄື່ອນໄຫວມ້າງເພທຳລາຍຢ່າງບໍ່ລົດລະຂອງບັນດາອິດທິກຳລັງປໍລະປັກ, ປະກົດການຫຍໍ້ທໍ້ຢູ່ໃນສັງຄົມທີ່ມີລັກ ສະນະເພີ່ມຂຶ້ນ, ບັນຫາດ້ານເສດຖະກິດ, ຜົນກະທົບຂອງການແຜ່ລະບາດຂອງພະຍາດໂຄວິດ-19 ແລະ ອື່ນໆ ອັນໄດ້ສົ່ງຜົນກະ ທົບຢ່າງໜັກໜ່ວງຕໍ່ເສດຖະກິດ ແລະ ການພັດທະນາ ພາຍໃນຂອງປະເທດ. ຕໍ່ສະພາບການດັ່ງກ່າວ ສປປ ລາວ ໄດ້ກັບມາດຳລົງຊີວິດປົກກະຕິແບບໃໝ່, ໄດ້ສົ່ງຜົນດີຕໍ່ການເຄື່ອນໄຫວວຽກງານການຕ່າງປະເທດ ທັງໃນຂອບສອງຝ່າຍ ແລະ ຫຼາຍຝ່າຍ, ເຊິ່ງອັນພົ້ນເດັ່ນ ແມ່ນການນຳຂັ້ນສູງ ແຫ່ງ ສປປ ລາວ ໄດ້ເດີນທາງຢ້ຽມ ຢາມຕ່າງປະເທດຫຼາຍຄັ້ງ ແລະ ມີການນຳຂັ້ນສູງຫຼາຍປະເທດເດີນທາງມາຢ້ຽມ ຢາມ ສປປ ລາວ. ພິເສດ, ໄດ້ສຳເລັດການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຢ່າງຈົບງາມ ແລະ ເປັນຂະ ບວນການຟົດຟື້ນ.
ພ້ອມດຽວກັນນີ້, ທ່ານ ຮອງນາຍົກລັດ ຖະມົນຕີ ສະເຫຼີມໄຊ ກົມມະສິດ ຍັງໄດ້ຍ້ອງຍໍຊົມເຊີຍການຊີ້ນຳ-ນຳພາຂອງຄະນະພັກແຂວງທີ່ສາມາດເຮັດໃຫ້ແຜນການພັດທະນາເສດຖະກິດ-ສັງຄົມຂອງຊາດໄດ້ລື່ນຄາດໝາຍ ພ້ອມທັງໄດ້ເນັ້ນໜັກ ກ່ຽວກັບ ການເຄື່ອນໄຫວວຽກງານການຕ່າງປະເທດ ສະເພາະແຂວງຫົວພັນ ເປັນຕົ້ນແມ່ນ ໄດ້ຍົກໃຫ້ເຫັນຄວາມສໍາຄັນຂອງທ້ອງຖິ່ນໃນການເຄື່ອນໄຫວວຽກງານການຕ່າງປະເທດ, ເຊິ່ງການເຄື່ອນໄຫວວຽກງານການຕ່າງປະເທດ ແມ່ນໜ້າທີ່ຂອງທຸກກະຊວງຂະແໜງການທັງສູນກາງ ແລະ ທ້ອງຖິ່ນ, ໃນນີ້ທ້ອງຖິ່ນຍິ່ງມີບົດບາດສໍາຄັນ ໃນການການຈັດຕັ້ງປະຕິບັດຜົນການເຄື່ອນໄຫວວຽກງານການຕ່າງປະເທດ, ເນື່ອງຈາກບັນດາໂຄງການຮ່ວມມືຕ່າງໆສ່ວນໃຫຍ່ແມ່ນຈັດຕັ້ງປະຕິບັດຢູ່ທ້ອງ ຖິ່ນ; ທ້ອງຖິ່ນມີບົດບາດສໍາຄັນໃນການເສີມຂະຫຍາຍສາຍພົວພັນ ກັບບັນດາທ້ອງຖິ່ນຂອງປະເທດໃກ້ຄຽງ ເພື່ອພັດ ທະນາເສດຖະກິດ-ສັງຄົມ ຂອງທ້ອງຖິ່ນ, ທ້ອງຖິ່ນມີຄວາມສໍາຄັນທາງດ້ານການທູດປະຊາຊົນ ເພື່ອສ້າງຄວາມເຂົ້າ ໃຈ ແລະ ການໄປມາຫາສູ່ ຂອງປະຊາຊົນ ຢູ່ບັນດາແຂວງທີ່ມີຊາຍແດນຕິດຈອດກັນ; ວຽກງານການພົວພັນຮ່ວມມືສາກົນ ກໍຍິ່ງມີຄວາມສໍາຄັນໃນການສ້າງຄວາມເຂັ້ມແຂງພາຍໃນແຂວງເຂົ້າໃນຂະບວນການເຊື່ອມໂຍງພາກພື້ນ ແລະ ສາກົນ, ພ້ອມນີ້ກໍ່ໃຫ້ສືບຕໍ່ເອົາໃຈໃສ່ວຽກງານຊາຍແດນ ໂດຍສະເພາະ ການເພີ່ມທະວີຄວາມເປັນເຈົ້າການ ແລະ ເອົາໃຈໃສ່ໃນການຮັກສາເສັ້ນຊາຍແດນຂອງຊາດ ແລະ ຫຼັກໝາຍຊາຍແດນທີ່ຂຶ້ນກັບແຂວງຂອງຕົນ; ສືບຕໍ່ເອົາໃຈໃສ່ວຽກງານຄຸ້ມຄອງອົງການຈັດຕັ້ງສາກົນທີ່ບໍ່ສັງກັດລັດ ຖະບານ (INGOs) ພາຍໃນແຂວງຕົນ; ເອົາໃຈໃສ່ໃນການຕິດຕາມກວວດກາ ແລະ ຊຸກຍູ້ ກ່ຽວກັບ ການເກັບກູ້ລະເບີດທີ່ບໍ່ທັນແຕກ (UXO) ທີ່ຍັງຕົກຄ້າງຢູ່ ສປປ ລາວ ໂດຍສະເພາະໃນແຂວງຫົວພັນ, ພ້ອມທັງເອົາໃຈໃສ່, ຊີ້ນຳການນຳແຂວງວຫົວພັນ ເນັ້ນໃສ່ການສົ່ງເສີມພື້ນຖານເສດຖະກິດ ທີ່ມີທ່າແຮງຂອງແຂວງຄື: ການທ່ອງທ່ຽວ (ການທ່ອງ ທ່ຽວທາງດ້ານປະຫວັດສາດ, ທຳມະ ຊາດ); ສົ່ງເສີມດ້ານກະສິກຳສະອາດ, ການບໍລິການທາງຜ່ານໂດຍອາໄສທ່າແຮງຂອງແຂວງ.
ໃນໂອກາດນີ້, ທ່ານ ຮອງນາຍົກລັດຖະ ມົນຕີ ສະເຫຼີມໄຊ ກົມມະສິດ ຍັງໄດ້ເນັ້ກໜັກໃນບາງດ້ານໃຫ້ແກ່ການເຄື່ອນໄຫວປະຕິບັດວຽກງານໃນຕໍ່ໜ້າ ໂດຍສະເພາະ ໃນສະພາບທີ່ມີຄວາມຫຍຸ້ງຍາກທາງດ້ານເສດຖະກິດ ເນື່ອງຈາກຜົນກະທົບຈາກການແຜ່ລະບາດຂອງພະຍາດໂຄວິດ-19 ບວກກັບໄພພິບັດທາງທໍາມະຊາດ, ເຊິ່ງແນ່ນອນມັນໄດ້ກະທົບໃສ່ຊີວິດການເປັນຢູ່ ແລະ ແນວຄິດຈິດໃຈ ຂອງອ້າຍນ້ອງພະນັກງານ ກໍຄື ປະຊາຊົນ ຢູ່ທ້ອງຖິ່ນຕ່າງໆ ຫຼາຍສົມຄວນ, ຂໍໃຫ້ບັນດາສະຫາຍການນໍາຂອງແຂວງຫົວພັນ ກໍຄືບັນດາພະແນກການກ່ຽວຂ້ອງຂອງແຂວງຫົວພັນ ເອົາໃຈໃສ່ຊີ່ນໍາ-ນໍາພາສືບຕໍ່ສຶກສາອົບຮົມການເມືອງແນວຄິດໃຫ້ແກ່ພະ ນັກງານ ກໍຄື ພໍ່ແມ່ປະຊາຊົນ ຢ່າງເປັນປົກກະຕິ, ໃນຂະນະດຽວກັນກໍໃຫ້ປັບຕົວໃຫ້ເຂົ້າກັບສະພາບປົກກະຕິແບບໃໝ່ ຢ່າງມີປະສິດທິຜົນ ແລະ ທັນການ, ໂດຍສະເພາະແມ່ນຕ້ອງປ່ຽນແປງແບບແຜນວິທີເຮັດວຽກ, ວິທີການດໍາລົງຊີວິດ, ຮູບແບບການດໍາເນີນທຸລະກິດ, ການພົວພັນຮ່ວມມືສາກົນ ກໍຄືການພົວພັນທາງສັງ ຄົມ ໂດຍຫັນເປັນທັນສະໄໝເທື່ອລະກ້າວ.
ໃນການຢ້ຽມຢາມເຮັດວຽກຢູ່ ແຂວງຫົວພັນ ຄັ້ງນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ພ້ອມດ້ວຍພັນ ລະຍາ ແລະ ຄະນະ ຍັງໄດ້ລົງຢ້ຽມຢາມໂຄງການກໍ່ສ້າງໂຮງໝໍມິດຕະພາບ ລາວ -ຫວຽດນາມ ແລະ ໂຄງການກໍ່ສ້າງສະ ໜາມບິນໜອງຄ້າງ ແລະ ເຂົ້າຮ່ວມພິທີປູກຕົ້ນຊາກຸຣະເພີ່ມຕື່ມ ທີ່ ເມືອງວຽງໄຊ ຊຶ່ງເປັນໂຄງການປູກຕົ້ນຊະກູຣະ ຢູ່ ສປປ ລາວ ທີ່ເປັນສັນຍາລັກ ແຫ່ງ ສາຍພົວພັນມິດຕະພາບ ແລະ ການຮ່ວມ ມືທີ່ດີງາມ ລະຫວ່າງ ສອງປະເທດລາວ ແລະ ຍີ່ປຸ່ນ ອີກດ້ວຍ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
Loading...