ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ບຸນກຸດຈີນ ເປັນບຸນປະເພນີທີ່ຄົນຈີນໃຫ້ຄວາມສຳຄັນທີ່ສຸດ ແລະ ກໍເປັນປາງບຸນທີ່ປະຊາຊົນບັນດາເຜົ່າທົ່ວປະເທດຈີນຮ່ວມຄວາມເບີກບານມ່ວນຊື່ນ ແລະ ມີຄວາມສາມັກຄີເພື່ອສະເຫຼີມສະຫຼອງຢ່າງຄຶກຄື້ນມ່ວນຊື່ນ.
ທ່ານ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນເຄີຍກ່າວວ່າ: “ ປາງບຸນກຸດຈີນ, ຂ້າພະເຈົ້າຍິ່ງມີຄວາມຫ່ວງໃຍເຖິງປະຊາຊົນ ແລະ ພະນັກງານຂັ້ນຮາກຖານ.” ຍ້ອນມີຄວາມເປັນຫ່ວງເປັນໃຍຄືແນວນີ້, ກ່ອນບຸນກຸດຈີນໃກ້ຈະໝູນວຽນມາເຖິງໃນຫຼາຍປີຜ່ານມາ, ເພີ່ນຈຶ່ງເດີນທາງລົງຮາກຖານໄປຢ້ຽມຢາມຖາມຂ່າວພະນັກງານ ແລະ ປະຊາຊົນທັງຫຼາຍເພື່ອຮ່ວມສະຫຼອງບຸນກັບເຂົາເຈົ້າ ພ້ອມທັງຮ່ວມຫາລືວຽກງານການພັດທະນາ ແລະ ສະແຫວງຫາຄວາມສຸກ.
ວັນທີ 1 ກຸມພາ 2024 ກົງກັບມື້ແຮມ 7 ຄ່ຳເດືອນ 12 ຕາມຈັນທະຄະຕິຈີນ ທ່ານ ສີ ຈິ້ນຜິງ ໄດ້ເດີນທາງໄປຢ້ຽມຢາມປະຊາຊົນກ່ອນບຸນກຸດຈີນໃກ້ຈະໝູນວຽນມາເຖິງອີກຄັ້ງ, ເຊິ່ງຈຸດໝາຍປາຍທາງຄັ້ງນີ້ແມ່ນກຳແພງນະຄອນທຽນສິນ ເພິ່ນໄດ້ເຂົ້າເຖິງບ້ານຊົນນະບົດກໍຄືຖະໜົນເກົ່າແກ່ເພື່ອຮັບຟັງຄຳຄິດເຫັນຂອງພະນັກງານ ແລະ ປະຊາຊົນ, ທັງໃຫ້ຄຳຊີ້ນຳວຽກງານການພັດທະນາ. ການເຄື່ອນໄຫວຢ້ຽມຢາມທ້ອງຖິ່ນກ່ອນບຸນກຸດຈີນຄັ້ງນີ້ຍິ່ງສ່ອງແສງໃຫ້ເຫັນເຖິງຄວາມອົບອຸ່ນ ແລະ ຄວາມໝາຍອັນເລິກເຊິ່ງ.
ນີ້ແມ່ນເທື່ອທີ 12 ທີ່ທ່ານ ສີ ຈິ້ນຜິງ ລົງຢ້ຽມຢາມປະຊາຊົນ ແລະ ພະນັກງານຂັ້ນຮາກຖານກ່ອນບຸນກຸດຈີນຈະວຽນມາເຖິງນັບຕັ້ງແຕ່ຂຶ້ນດຳລົງຕຳແໜ່ງເປັນເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ. ຈາກແຂວງກ່ານຊູ້ຈົນຮອດແຂວງກຸ້ຍໂຈ່ວ, ຈາກເຂດປົກຄອງຕົນເອງມົງໂກໃນ ຈົນຮອດການຢື້ຢາມຖາມຂ່າວຜ່ານທາງວີດີໂອ, ແຕ່ລະປີ, ເມື່ອຮອດໂອກາດບຸນກຸດຈີນໃກ້ຈະໝູນວຽນມາເຖິງ, ເພິ່ນກໍໄດ້ລົງຮາກຖານ, ຖາມຫາຄວາມທຸກສຸກຂອງປະຊາຊົນ, ຟັງສຽງຮຽກຮ້ອງຕ້ອງການຂອງປະຊາຊົນພ້ອມທັງສົ່ງຄຳອວຍພອນອັນປະເສີດໄປຍັງເຂົາເຈົ້າ. ການເດີນທາງໄປຢ້ຽມຢາມທຸກເທື່ອລ້ວນແຕ່ມີຄຳຢື້ຢາມຖາມຂ່າວດ້ວຍຄວາມດູດດື່ມ, ມີການໃຫ້ກຳລັງໃຈຢ່າງຈິງໃຈ ແລະ ສ້າງຄວາມໝັ້ນໃຈອັນເດັດດ່ຽວໃຫ້ກັບປະຊາຊົນ.
ທ່ານ ສີ ຈິ້ນຜິງ ເວລາໃດກໍມີຄວາມຫ່ວງໃຍເຖິງປະຊາຊົນ ແລະ ພະນັກງານຂັ້ນຮາກຖານ ເຊິ່ງຄວາມຫ່ວງໃຍນີ້ ເວລາໃດກໍໄດ້ສ້າງຄວາມອົບອຸ່ນ ແລະ ເປັນກຳລັງໃຈໃຫ້ກັບປະຊາຊົນ ແລະ ພະນັກງານຂັ້ນຮາກຖານ ເພື່ອກ້າວເດີນໄປຂ້າງໜ້າ ຢ່າງບໍ່ຢຸດຢັ້ງ.