ຕອນເຊົ້າວັນທີ 29 ມິຖຸນາ 2021 ທີ່ສຳນັກງານນາຍົກລັດຖະມົນຕີ, ທ່ານ ກິແກ້ວ ໄຂຄຳພິທູນ, ຮອງນາຍົກ ລັດຖະ ມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມອໍາລາ ຂອງທ່ານ ເຢັນ ເປີເຕີ ລຸດເຄິນເຮັມ (Jens Peter Litkenherm) ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງສາທາລະນະລັດ ສະຫະພັນເຢຍລະມັນ ປະຈຳລາວ ໃນໂອກາດທີ່ສໍາເລັດ ການປະຕິບັດໜ້າທີ່ ເປັນເອກອັກຄະລັດຖະທູດປະຈຳ ສປປ ລາວ.
ທ່ານ ຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຜົນສໍາເລັດໃນການປະຕິບັດໜ້າທີ່ ຂອງທ່ານ ເຢັນ ເປີເຕີ ລຸດເຄິນເຮັມ ແລະ ສະແດງຄວາມຂອບໃຈ ຕໍ່ການປະກອບສ່ວນຢ່າງຫ້າວຫັນ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ລາວ ແລະ ເຢຍລະມັນ ຕະຫຼອດໄລຍະເວລາ 4 ປີ ທີ່ປະຈໍາການຢູ່ ສປປ ລາວ ເປັນຕົ້ນ ການລະດົມຂົນຂວາຍທຶນຊ່ວຍເຫຼືອລ້າ ຈາກລັດຖະບານເຢຍລະມັນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ; ການຊ່ວຍເຫຼືອວຽກງານຕ້ານການແຜ່ລະບາດຂອງພະຍາດໂຄວິດ-19, ການຊຸກຍູ້ຂົນຂວາຍການຊ່ວຍເຫຼືອ ຂອງສະມາຄົມມິດຕະພາບ ລາວ-ເຢຍລະມັນ ແລະ ເຢຍລະມັນ-ລາວ ໃຫ້ແກ່ລັດຖະບານລາວ, ລວມທັງ ການຊ່ວຍເຫຼືອວັກຊິນປ້ອງກັນໂຄວິດ-19 ພາຍໃຕ້ໂຄງການ COVAX Facility ແລະ ອື່ນໆ. ພ້ອມກັນນັ້ນ, ທ່ານຮອງນາຍົກລັດຖະມົນຕີ ຍັງໄດ້ຕີລາຄາສູງຕໍ່ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າ ຂອງລັດຖະບານ ແລະ ປະຊາຊົນເຢຍລະມັນ ໃຫ້ແກ່ ສປປ ລາວ ໃນໄລຍະຜ່ານມາ ກໍ່ຄືການພັດທະນາເສດຖະກິດແບບຍືນຍົງ, ການພັດທະນາຊົນນະບົດ ແລະ ວຽກງານອາຊີວະສຶກສາເປັນຂົງເຂດທີ່ພົ້ນເດັ່ນທີ່ສຸດ, ຊຶ່ງມາເຖິງປັດຈຸບັນ ມູນຄ່າການຊ່ວຍເຫຼືອລວມທັງໝົດ ຫຼາຍກວ່າ 500 ລ້ານເອີໂຣ. ການຊ່ວຍເຫຼືອດັ່ງກ່າວ ໄດ້ປະກອບສ່ວນອັນສໍາຄັນ ເຂົ້າໃນການສ້າງສາພັດທະນາເສດຖະກິດ-ສັງຄົມ ຂອງ ສປປ ລາວ, ທັງເປັນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ຂອງສອງປະເທດ ໃຫ້ມີບາດກ້າວຂະຫຍາຍຕົວຢ່າງຕໍ່ເນື່ອງ. ໃນຕອນທ້າຍ, ທ່ານ ຍັງໄດ້ອວຍພອນໃຫ້ທ່ານເອກອັກຄະລັດຖະທູດ ຈົ່ງເດີນທາງກັບປະເທດ ດ້ວຍຄວາມສະຫວັດດີພາບ ແລະ ປະສົບຜົນສຳເລັດ ໃນການປະຕິບັດພາລະໜ້າທີ່ໃໝ່ຂອງຕົນ ໃນຕໍ່ໜ້າ ທຸກປະການ.
ໃນໂອກາດນີ້, ທ່ານ ເຢັນ ເປີເຕີ ລຸດເຄິນເຮັມ ກໍ່ໄດ້ສະແດງຄວາມຂອບໃຈຢ່າງສູງ ຕໍ່ລັດຖະບານລາວ ກໍ່ຄືພາກສ່ວນທີ່ກ່ຽວຂ້ອງ ທີ່ໃຫ້ການຮ່ວມມື, ຊຸກຍູ້-ສະໜັບສະໜູນຊ່ວຍເຫຼືອ ແລະ ອຳນວຍຄວາມສະດວກ ຕະຫຼອດໄລຍະເວລາ 4 ປີ ໃນການປະຕິບັດໜ້າທີ່ການທູດ ຢູ່ ສປປ ລາວ ເຮັດໃຫ້ໄດ້ຮັບຜົນສຳເລັດຢ່າງຈົບງາມ. ພ້ອມດຽວກັນນັ້ນ, ທ່ານ ເອກອັກຄະລັດຖະທູດ ກໍ່ໄດ້ສະແດງຄວາມຊົມເຊີຍລັດຖະບານ ແລະ ປະຊາຊົນລາວ ຕໍ່ການຮັບມືກັບການແຜ່ລະບາດຂອງພະຍາດໂຄວິດ-19, ການສັກວັກຊິນ ເພື່ອສ້າງພູມຄຸ້ມກັນໃຫ້ແກ່ປະຊາຊົນ, ບັນດາມາດຕະການຕ່າງໆ ເພື່ອການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດເຊື້ອພະຍາດໂຄວິດ-19 ໃນ ສປປ ລາວ ແມ່ນມີປະສິດທິພາບ ແລະ ປະສິດທິຜົນດີ.
ພາບ ແລະ ຂ່າວ: ກົມປະຊາສຳພັນ ຫສນຍ
Loading...