ໃນຕອນເຊົ້າຂອງວັນທີ 1 ພຶດສະພາ 2022, ທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ພ້ອມຄະນະໄດ້ລົງຢ້ຽມຢາມການປູກເຂົ້າ 3 ຮອບວຽນຂອງກຸ່ມຊາວນາ ບ້ານນາໂສມ ເມືອງ ພຽງ ແຂວງ ໄຊຍະບູລີ, ນໍາພາລົງເບິ່ງຕົວຈິງໂດຍ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມພະແນກການທີ່ກ່ຽວຂ້ອງ, ໃຫ້ການຕ້ອນຮັບ ໂດຍ ທ່ານ ເສີດ ແສງສຸລິນ ເຈົ້າເມືອງ-ເມືອງ ພຽງ ພ້ອມການນໍາຫຼັກແຫຼ່ງຂອງເມືອງ.
ກ່ອນອື່ນທີມງານຂອງທ່ານ ຮອງນາຍົກແມ່ນໄດ້ຮັບຟັງລາຍລະອຽດຂອງການປູກເຂົ້າ 3 ຮອບວຽນ ຈາກກຸ່ມຊາວນາ, ການປູກເຂົ້າ 3 ຮອບວຽນ ຢູ່ບ້ານ ນາໂສມ ໄດ້ລິເລີ່ມຈາກການຊີ້ນໍາ-ນໍາພາຂອງການນໍາຂັ້ນແຂວງ, ເມືອງ ແລະ ຄວາມເປັນເຈົ້າການຂອງຂະແໜງກະສິກໍາ ແລະ ປ່າໄມ້ ໂດຍສະເພາະແມ່ນຫ້ອງການ ກະສິກໍາ ແລະ ປ່າໄມ້ເມືອງ ພຽງ, ການປູກເຂົ້າດັ່ງກ່າວແມ່ນໄດ້ຮັບການຊຸກຍູ້ສົ່ງເສີມຈາກບໍລິສັດ ຊົງຢວນ ຈໍາກັດ ແລະ ເລີ່ມປູກທົດລອງໃນປີ 2021 ເປັນຕົ້ນມາ, ເຊິ່ງມີຊາວນາເຂົ້າຮ່ວມທົດລອງ 33 ຄອບຄົວ, ມີເນື້ອທີ່ 29,94 ເຮັກຕາ, ປະຈຸບັນແມ່ນຢູ່ໃນຂັ້ນຕອນບົວລະບັດຮັກສາເຂົ້ານາທີ່ປູກຮອບ 2 ແລະ ຈະເກັບກ່ຽວໃນເດືອນ ກໍລະກົດ, ການປູກຮອບທີ 3 ແມ່ນຈະປູກໃນເດືອນ ສິງຫາ ແລະ ເກັບກ່ຽວໃນເດືອນ ພະຈິກ 2022, ສ່ວນຮອບທີ 1 ແມ່ນເກັບກ່ຽວແລ້ວໃນເດືອນ ມີນາ ຜ່ານມາ ຜົນຜະລິດໄດ້ 3,88 ໂຕນຕໍ່ເຮັກຕາ, ສໍາລັບຜົນຜະລິດຮອບ 1 ແລະ 2 ແມ່ນຂາຍໃຫ້ກັບບໍລິສັດ ຊີຢວນ ແລະ ຮອບທີ 3 ແມ່ນຊາວນາເກັບໄວ້ກິນ, ແນວພັນເຂົ້າທີ່ນໍາມາປູກແມ່ນ ເຂົ້າຖິ່ນແກ້ວ ມີອາຍຸ 140 ວັນ, ໂອກາດດັ່ງກ່າວ ທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ໄດ້ຍ້ອງຍໍຊົມເຊີຍຕໍ່ການນໍາຂອງແຂວງ, ເມືອງ ແລະ ທຸກພາກສ່ວນ ທີ່ຊຸກຍູ້ສົ່ງເສີມໃນການປູກເຂົ້າ, ໂດຍສະເພາະແມ່ນການປູກເຂົ້າ 3 ຮອບວຽນຕໍ່ປີ, ພ້ອມທັງໄດ້ເນັ້ນໜັກໃຫ້ກຸ່ມຊາວນາຈົ່ງເອົາໃຈໃສ່ໃນການບົວລະບັດຮັກສາໃຫ້ຖືກຕາມເຕັກນິກທີ່ວິຊາການໄດ້ແນະນໍາເຊັ່ນ: ການໃສ່ຝຸ່ນ, ການໃຫ້ນໍ້າຢ່າງສະໝໍ່າສະເໝີ, ພ້ອມດຽວກັນກໍ່ຕ້ອງນໍາໃຊ້ເຕັກນິກໃໝ່ ແລະ ກົນຈັກທັນສະໄໝເຂົ້າຊ່ວຍໃນການເຮັດນາດັ່ງກ່າວ ເພື່ອຮັບປະກັນຜົນຜະລິດໃຫ້ໄດ້ຕາມແຜນ ແລະ ລື່ນແຜນ, ພາຍຫຼັງທີ່ປູກໄດ້ຮັບໝາກຜົນດີແລ້ວແມ່ນໃຫ້ຂະຫຍາຍເນື້ອທີ່ປູກອອກໄປສູ່ບ້ານອື່ນໆຕໍ່ໄປ, ຈາກນັ້ນທີມງານຂອງທ່ານ ຮອງນາຍົກ ກໍ່ໄດ້ເຂົ້າຢ້ຽມຢາມຟາມລ້ຽງງົວຂອງບໍລິສັດ ຊີຢວນ ຈໍາກັດ ແລະ ຢ້ຽມຢາມ ກຸ່ມຫັດຖະກໍາຕໍ່າຫູກ ບ້ານ ແສງຈະເລີນ ເມືອງ ພຽງຕື່ມອີກ.
ຂ່າວ-ພາບ: ອຸ່ນເຮືອນ ໂພທິລັກ
