ພາຍຫຼັງສຳເລັດການເຄື່ອນໄຫວເຮັດວຽກຢູ່ແຂວງເຊກອງ, ໃນລະຫວ່າງວັນທີ 18-19 ສິງຫາ 2022 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດເສດຖະກິດ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຕິດຕາມ ແລະ ຊຸກຍູ້ການພັດທະນາເສດຖະກິດ-ສັງຄົມ ແຂວງອັດຕະປື ໂດຍໄດ້ພົບປະໂອ້ລົມ ຕໍ່ການນຳຫຼັກແຫຼ່ງຂອງແຂວງ ແລະ ລົງເບິ່ງພື້ນທີ່ຕົວຈິງ ຂອງໂຄງການຈຳນວນໜຶ່ງ ເຊິ່ງມີທ່ານ ເລັດ ໄຊຍະພອນ ເຈົ້າແຂວງໆອັດຕະປື ພ້ອມດ້ວຍຄະນະນຳຂອງແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ ແລະ ຮ່ວມເຄື່ອນໄຫວເຮັດວຽກ.
ໃນໂອກາດພົບປະໂອ້ລົມ ຕໍ່ການນຳຫຼັກແຫຼ່ງຂອງແຂວງ, ທ່ານ ຮອງນາຍົກລັດຖະມົນຕີ ແລະ ຄະນະ ໄດ້ຮັບຟັງການລາຍງານຫຍໍ້ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ໄລຍະ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2022 ຈາກທ່ານເຈົ້າແຂວງໆອັດຕະປື ເຫັນວ່າ ເສດຖະກິດຂອງແຂວງ ໄດ້ຂະຫຍາຍຕົວໃນລະດັບ 3,32%, ລາຍຮັບສະເລ່ຍຕໍ່ຫົວຄົນ ໄດ້ປະມານ 15,15 ລ້ານກີບ/ຄົນ/ປີ, ການເກັບລາຍຮັບເຂົ້າງົບປະມານ ປະຕິບັດໄດ້ 89% ຂອງແຜນການ, ການປະຕິບັດແຜນລາຍຈ່າຍ ປະຕິບັດໄດ້ 71%; ການຜະລິດສະບຽງອາຫານ ແລະ ຜະລິດເປັນສິນຄ້າ ໄດ້ເພີ່ມຂຶ້ນ ໂດຍສະເພາະ ການຫັນມາລ້ຽງເປັນຟາມ; ໄດ້ເອົາໃຈໃສ່ສົ່ງເສີມທຸລະກິດ ຂະໜາດນ້ອຍ ແລະ ກາງ ເຮັດໃຫ້ສິນຄ້າກາໝາຍໜຶ່ງເມືອງໜຶ່ງຜະລິດຕະພັນ (ODOP) ໄດ້ເພີ່ມຂຶ້ນ; ການຜັນຂະຫຍາຍ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍໄດ້ຮັບການຈັດຕັ້ງປະຕິບັດຢ່າງຕັ້ງໜ້າ, ໄດ້ມີການແບ່ງຄວາມຮັບຜິດຊອບ ແລະ ແກ້ໄຂບັນຫາຕ່າງໆ ເຊິ່ງອັນພົ້ນເດັ່ນກວ່າໝູ່ ແມ່ນການເກັບລາຍຮັບເຂົ້າງົບປະມານ; ໄດ້ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ ລຶບລ້າງຄວາມທຸກຍາກ ຂອງປະຊາຊົນ ຢ່າງມີຈຸດສຸມ ໂດຍລົງແກ້ໄຂວຽກຕາມຂະແໜງການ, ແບ່ງຄວາມຮັບຜິດຊອບຕາມທິດ 3 ສ້າງ ແຕ່ຮາກຖານຂຶ້ນມາ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ກໍ່ໄດ້ໃຫ້ກຽດມີຄຳເຫັນໂອ້ລົມ ໂດຍແຈ້ງໃຫ້ຊາບ ກ່ຽວກັບຈຸດປະສົງ ຂອງການເຄື່ອນໄຫວເຮັດວຽກ ພ້ອມທັງ ຍົກໃຫ້ເຫັນ ສະພາບການພົ້ນເດັ່ນ ທີ່ເກີດຂຶ້ນ ຢູ່ພາກພື້ນ ແລະ ສາກົນ, ຜົນສຳເລັດອັນພົ້ນເດັ່ນ ໃນການພັດທະນາເສດຖະກິດ-ສັງຄົມແຫ່ງຊາດ ໃນໄລຍະຜ່ານມາ ແລະ ແຜນວຽກຈຸດສຸມ ໃນຕໍ່ໜ້າ, ລວມທັງ ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ຕໍ່ການພັດທະນາເສດຖະກິດ-ສັງຄົມ ຂອງປະເທດເຮົາ. ອັນສຳຄັນ, ທ່ານ ໄດ້ມີຄຳເຫັນເນັ້ນໜັກໃຫ້ອົງການປົກຄອງແຂວງ ແລະ ພາກສ່ວນກ່ຽວຂ້ອງ ເອົາໃຈໃສ່ຕື່ມບາງວຽກງານສຳຄັນ ເປັນຕົ້ນ ເອົາໃຈໃສ່ນຳພາ-ຊີ້ນຳ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ແລະ ວາ ລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃຫ້ບັນລຸຕາມຈຸດປະສົງ ແລະ ຄາດໝາຍ ທີ່ກຳນົດໄວ້ ພ້ອມທັງ ປະຕິບັດຄຸ້ມຄອງບັນດາໂຄງການລົງທຶນຂອງລັດ, ການລົງທຶນພາກເອກະຊົນພາຍໃນ ແລະ ຕ່າງປະເທດ ໃຫ້ມີປະສິດທິຜົນແທ້, ບໍ່ເກີດປະກົດການຫຍໍ້ທໍ້ຕ່າງໆ ແລະ ໃຫ້ບັນລຸຕາມແຜນການທີ່ກຳນົດໄວ້; ແກ້ໄຂບັນຫາອະນຸມັດການລົງທຶນ ໃຫ້ໄວຂຶ້ນ ແລະ ປັບປຸງ ຄະນະຄຸ້ມຄອງການລົງທຶນຂອງແຂວງ ໃຫ້ສອດຄ່ອງ ຕາມທິດຊີ້ນຳຂອງກົມການເມືອງສູນກາງພັກ ແລະ ລັດຖະບານ; ສຸມໃສ່ຈັດເກັບລາຍຮັບ ໃຫ້ດີກວ່າເກົ່າ ພ້ອມທັງ ຄຸ້ມຄອງລາຍຈ່າຍຢ່າງຮັດກຸມ, ມີປະສິດທິຜົນ ຕາມທິດປະຢັດ ໂດຍສະເພາະ ການຈັດຕັ້ງປະຕິບັດດຳລັດ ວ່າດ້ວຍລົດຂອງລັດ ໃຫ້ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ; ເອົາໃຈໃສ່ແກ້ໄຂບັນຫາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ຕິດພັນກັບການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ທີ່ເປັນສາເຫດຂອງການເກີດປະກົດການຫຍໍ້ທໍ້ຕ່າງໆ ໃນສັງຄົມ ໂດຍມີມາດຕະການແກ້ໄຂຢ່າງເດັດຂາດ ແລະ ສ່ອດຄ່ອງຕາມກົດໝາຍທີ່ກ່ຽວຂ້ອງ; ໃຫ້ສຸມໃສ່ສົ່ງເສີມການປູກ, ການລ້ຽງ ທີ່ປະຊາຊົນແຕ່ລະທ້ອງຖິ່ນມີທ່າແຮງໃຫ້ຫຼາຍຂຶ້ນ ເພື່ອທົດແທນການນຳເຂົ້າ, ລວມທັງ ຄຸ້ມຄອງລາຄາສິນຄ້າ ຢ່າງເໝາະສົມ; ສືບຕໍ່ພັດທະນາຊົນນະບົດ ແລະ ປັບປຸງຊີວິດການເປັນຢູ່ຂອງປະຊາຊົນ ໃຫ້ນັບມື້ດີຂຶ້ນຢ່າງຕໍ່ເນື່ອງ ເພື່ອໃຫ້ບັນລຸຄາດໝາຍມາດຕະຖານການພົ້ນທຸກທີ່ກຳນົດໄວ້; ເອົາໃຈໃສ່ປະຕິບັັດບັນດາໂຄງການ ເພື່ອຟື້ນຟູເຂດທີ່ໄດ້ຮັບຜົນກະທົບຈາກໄພພິບັດ ຢູ່ເມືອງສະໜາມໄຊ ໃຫ້ມີຄວາມຄືບໜ້າ ແລະ ສຳເລັດຕາມແຜນການ ພ້ອມທັງ ສ້າງເງື່ອນໄຂ ໃຫ້ປະຊາຊົນ ມີວຽກເຮັດງານທຳ, ມີລາຍຮັບ ແລະ ປັບປຸງຊີວິດການເປັນຢູ່ ຂອງເຂົາເຈົ້າ ໃຫ້ນັບມື້ດີຂຶ້ນ ເປັນກ້າວໆ; ຄຸ້ມຄອງການນຳເຂົ້ານໍ້າມັນເຊື້ອໄຟ ໃຫ້ສອດຄ່ອງກັບຂໍ້ຕົກລົງ ຂອງກະຊວງອຸດສາຫະກຳ ແລະ ການຄ້າ ກໍານົດໄວ້.
ການເຄື່ອນໄຫວເຮັດວຽກ ຂອງທ່ານຮອງນາຍົກລັດຖະມົນຕີ ສອນໄຊ ສີພັນດອນ ຢູ່ແຂວງອັດຕະປື ໃນຄັ້ງນີ້, ທ່ານ ພ້ອມດ້ວຍຄະນະ ຍັງໄດ້ໄປເບິ່ງພື້ນທີ່ໂຄງການພັດທະນາຈຳນວນໜຶ່ງ ໂດຍໄດ້ຮັບຟັງການລາຍງານ ແລະ ມີທິດຊີ້ນຳ ຕໍ່ການພັດທະນາໂຄງການດັ່ງກ່າວ ເປັນຕົ້ນ ໂຄງການກໍ່ສ້າງເຮືອນໃຫ້ປະຊາຊົນ ຈຳນວນ 700 ຫຼັງ ຢູ່ເມືອງສະໜາມໄຊ ແລະ ໂຄງການກໍ່ສ້າງສາຍສົ່ງໄຟຟ້າ 500 ກິໂລໂວນ ຢູ່ເມືອງພູວົງ ຕື່ມອີກ.
ພາບ ແລະ ຂ່າວ: ກົມປະຊາສຳພັນ ຫສນຍ
Loading...