ໃນຕອນບ່າຍຂອງວັນທີ 15 ມັງກອນ ປີ 2020 ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ ພ້ອມດ້ວຍທີມງານ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ພ້ອມທັງໄດ້ລາຍງານຜົນການຜະລິດລະດູປີ-ປີຜ່ານມາ ແລະ ຂະບວນການຜະລິດລະດູແລ້ງປີນີ້, ໂດຍລວມແລ້ວການຜະລິດລະດູປີ 2019 ແມ່ນບໍ່ບັນລຸຕາມແຜນການ ເນື່ອງຈາກປະສົບໄພພິບັດທາງທໍາມະຊາດເຊັ່ນ: ໄພແຫ້ງແລ້ງ, ບົ້ງຝຸງທໍາລາຍຜົນລະປູກ ແລະ ອື່ນໆ, ຕາມແຜນຜະລິດສະບຽງອາຫານປີ 2019 ເປັນຕົ້ແມ່ນ: ປູກເຂົ້າໃນເນື້ອທີ່ 46.767 ເຮັກຕາ, ສາມາດປະຕິບັດໄດ້ຕົວຈິງ 46.105,7 ເຮັກຕາ, ຜົນຜະລິດໄດ້ 152.021,60 ໂຕນ, ພືດສະບຽງອາຫານຕາມແຜນ 18.400 ກວ່າເຮັກຕາ, ສາມາດປະຕິບັດໄດ້ 29.469,16 ເຮັກຕາ, ຜົນຜະລິດໄດ້ 155.893,93 ໂຕນ, ໃນນີ້ມີ: ສາລີຫວານ, ເຜືອກ-ມັນ, ໄມ້ໃຫ້ໝາກ ແລະ ພືດຜັກຕ່າງໆ, ສໍາລັບການຜະລິດລະດູແລ້ງປີນີ້ແຂວງແມ່ນສຸມໃສ່ປູກພືດສະບຽງອາຫານ ແລະ ພືດກະສິກໍາເປັນສິນຄ້າ ທີ່ມີອາຍຸສັ້ນ ແລະ ນໍາໃຊ້ນໍ້ານ້ອຍທີ່ສຸດເຊັ່ນ: ເຂົ້າ, ສາລີຫວານ, ໝາກໂມ, ໝາກແຕງ, ໝາກເຜັດ-ໝາກເຂືອ ແລະ ພືດຜັກຕ່າງໆເພື່ອບໍລິໂພກພາຍໃນ ແລະ ສົ່ງຂາຍອອກຕ່າງປະເທດ,  ໂອກາດດັ່ງກ່າວ ທ່ານ ສົມດີ ດວງດີ ຮອງນາຍົກລັດຖະມົນຕີ ກໍ່ໄດ້ຍ້ອງຍໍຊົມເຊີຍຕໍ່ການນໍາຂອງແຂວງທີ່ເອົາໃຈໃສ່ຊີ້ນໍາ ແລະ ນໍາພາປະຊາຊົນໃນການຜະລິດພືດສະບຽງອາຫານເພື່ອບໍລິໂພກພາຍໃນ, ພ້ອມດຽວກັນຍັງໄດ້ຊີ້ນໍາໃຫ້ແຂວງເອົາໃຈໃສ່ຕື່ມອີກຕໍ່ກັບການຜະລິດສະຽງອາຫານໃນລະດູແລ້ງປີນີ້, ທັງນີ້ກໍ່ເພື່ອໃຫ້ກຸ້ມກິນ, ຫຼີກເວັ້ນການນໍາເຂົ້າສະບຽງອາຫານຈາກຕ່າງປະເທດ, ໃຫ້ມີການປຶກສາຫາລືກັບການນໍາຂັ້ນເມືອງເພື່ອຊຸກຍູ້ປະຊາຊົນໃນການປູກ, ການລ້ຽງ ຕາມຄວາມເໝາະສົມຂອງແຕ່ລະທ້ອງຖິ່ນ, ຜະລິດເພື່ອບໍລິໂພກພາຍໃນແລ້ວ ກໍ່ສາມາດຜະລິດເພື່ອສົ່ງອອກຂາຍໄປຕ່າງປະເທດຕື່ມອີກ, ພ້ອມດຽວກັນກໍ່ຕ້ອງເອົາໃຈໃສ່ໃນການຊີ້ນໍາການເກັບລາຍຮັບເຂົ້າງົບປະມານໃຫ້ໄດ້ຕາມຄວາມສາມາດ ແລະ ທ່າແຮງຂອງແຂວງ, ລົງຕິດຕາມ ແລະ ກວດກາຖານລາຍຮັບຢູ່ 2 ໂຄງການໃຫຍ່ຄື: ເຂື່ອນໄຟຟ້າພະລັງງານນໍ້າຂອງ, ໂຮງໄຟຟ້າພະລັງງານຄວາມຮ້ອນຫົງສາຫຼິກໄນ, ຊຸກຍູ້ການຫັນສູ່ທັນສະໄໝເຊັ່ນ: ການເສຍຄ່າທາງ, ອາກອນຕ່າງໆ, ພາສີທີ່ດິນ ແລະ ອື່ນໆ ຜ່ານລະບົບທະນາຄານໃຫ້ມີປະສິດທິຜົນ.

ຂ່າວ-ພາບໂດຍ: ອຸ່ນເຮືອນ ໂພທິລັກ, ນັກຂ່າວຫ້ອງວ່າການແຂວງ ໄຊຍະບູລີ

Loading...