ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນລະຫວ່າງວັນທີ 17-18 ສິງຫາ 2022 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດເສດຖະກິດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ແລະ ຊຸກຍູ້ວຽກງານ ການພັດທະນາເສດຖະກິດ-ສັງຄົມ ແຂວງເຊກອງ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ ພ້ອມດ້ວຍການນຳຫຼັກແຫຼ່ງຂອງແຂວງ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມ.
ໃນໂອກາດນີ້, ຄະນະຂອງທ່ານ ຮອງນາຍົກລັດຖະມົນຕີ ໄດ້ຮັບຟັງການລາຍຫຍໍ້ ກ່ຽວກັບສະພາບການຈັດຕັ້ງປະ ຕິບັດແຜນພັດທະນາເສດຖະ ກິດ-ສັງຄົມຂອງແຂວງ ໄລຍະ 6 ເດືອນຕົ້ນ ແລະ ແຜນວຽກຈຸດສຸມ 6 ເດືອນທ້າຍປີ 2022 ຈາກທ່ານ ເຈົ້າແຂວງໆເຊກອງ ເຫັນວ່າ ເສດຖະກິດຂະຫຍາຍຕົວ ໃນລະດັບ 4%, ລາຍຮັບສະເລ່ຍຕໍ່ຫົວຄົນ ໄດ້ປະມານ 17,5 ລ້ານກີບ/ຄົນ/ປີ, ການເກັບລາຍຮັບເຂົ້າງົບປະມານ ປະຕິບັດໄດ້ 51,15%, ການປະຕິບັດແຜນລາຍຈ່າຍ ປະຕິບັດໄດ້ 53,74%; ການກໍ່ສ້າງໂຄງລ່າງພື້ນຖານ ເສັ້ນທາງ, ໄຟຟ້າ ແລະ ນ້ຳປະປາ ໄດ້ດຳເນີນໄປຕາມແຜນການທີ່ກຳນົດໄວ້; ຂົງເຂດການຜະລິດກະສິກຳ ແລະອຸດສາຫະກຳ ສືບຕໍ່ຂະຫຍາຍຕົວໃນຈັງຫວະທີ່ດີ; ຂົງເຂດການບໍລິການ ພາຍຫຼັງໄດ້ເປີດດ່ານສາກົນເຕັມຮູບແບບ ແມ່ນໄດ້ຮັບການຟື້ນຕົວ; ວຽກງານການຄ້າ ສາມາດປະຕິບັດໄດ້ເກີນດູນ; ສໍາລັບການຜັນຂະຫຍາຍ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແມ່ນໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ໂດຍມີການແບ່ງຄວາມຮັບຜິດຊອບ ເພື່ອແກ້ໄຂບັນຫາຕ່າງໆ ຄຽງຄູ່ກັບການພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນ ກໍ່ໄດ້ຮັບການປັບປຸງດີຂຶ້ນເປັນກ້າວໆ.
ໃນໂອກາດດຽວກັນ, ທ່ານ ຮອງນາຍົກລັດຖະມົນຕີ ໄດ້ໃຫ້ກຽດມີຄໍາເຫັນໂອ້ລົມ ຕໍ່ການນໍາຫຼັກແຫຼ່ງຂອງແຂວງ ໂດຍໄດ້ຍົກໃຫ້ເຫັນ ສະພາບການພົ້ນເດັ່ນ ທີ່ເກີດຂຶ້ນ ຢູ່ພາກພື້ນ ແລະ ສາກົນ, ຜົນ ສຳເລັດອັນພົ້ນເດັ່ນ ໃນການພັດທະນາເສດຖະກິດ-ສັງຄົມແຫ່ງຊາດ, ລວມທັງ ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ຕໍ່ການພັດທະນາເສດຖະກິດ-ສັງຄົມ ຂອງປະເທດເຮົາ. ອັນສຳຄັນ, ທ່ານ ໄດ້ມີຄຳເຫັນຊີ້ນຳ ໃຫ້ການນຳຫຼັກແຫຼ່ງຂອງແຂວງ ແລະ ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ເອົາໃຈໃສ່ປັບປຸງຂັ້ນຂອດການອະນຸມັດການລົງທຶນ ໃຫ້ໄປຕາມທິດທີ່ກຳນົດໄວ້ ພ້ອມທັງ ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງໂຄງ ການລົງທຶນຕ່າງໆ ໃຫ້ໄປຕາມແຜນການ, ສັນຍາ, ກົດໝາຍ ແລະ ລະບຽບການທີ່ກ່ຽວຂ້ອງ; ສືບຕໍ່ຈັດຕັ້ງປະຕິບັດບັນດາວຽກງານຈຸດສຸມ ຂອງວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງ ຍາກທາງດ້ານເສດຖະກິດ-ການເງິນ ໃຫ້ເປັນຮູບປະທຳ ເພີ່ມຂຶ້ນ, ພ້ອມທັງ ແກ້ໄຂຂໍ້ຄົງຄ້າງຕ່າງໆ ໃຫ້ທັນການ; ຄຸ້ມຄອງຫົວໜ່ວຍທຸລະກິດໃຫ້ເຄື່ອນໄຫວຢ່າງຖືກຕ້ອງ, ສ້າງເງື່ອນໄຂອຳນວຍຄວາມສະດວກ ໃຫ້ແກ່ການດຳເນີນທຸລະກິດ ໄປພ້ອມກັບການແກ້ໄຂບັນຫາຄົງຄ້າງໃຫ້ໄວ; ສືບຕໍ່ພັດທະນາຊົນນະບົດ ແລະ ປັບປຸງຊີວິດການເປັນຢູ່ຂອງປະຊາຊົນ ໃຫ້ນັບມື້ນັບດີຂຶ້ນຢ່າງຕໍ່ເນື່ອງ ເພື່ອໃຫ້ບັນລຸຄາດໝາຍມາດຕະຖານການພົ້ນທຸກທີ່ກຳນົດໄວ້.
ການເຄື່ອນໄຫວເຮັດວຽກຢູ່ແຂວງເຊກອງ ໃນຄັ້ງນີ້, ທ່ານ ຮອງນາຍົກລັດ ຖະມົນຕີ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ລົງເບິ່ງພື້ນທີ່ໂຄງການ ແລະ ກິດຈະການ ຈຳນວນໜຶ່ງ ເປັນຕົ້ນ ໂຄງການຂຸດຄົ້ນຖ່ານຫີນ ຂອງບໍລິສັດ ພະລັງງານໄຟຟ້າເຊກອງ ຈຳກັດ ທີ່ເມືອງກະລຶມ; ໂຄງການຂຸດຄົ້ນບິດຄອຍ ຂອງບໍລິສັດ ຈະເລີນເຊກອງ, ຟາມລ້ຽງໝູປັນຍາຄູນ ຂອງບໍລິສັດ ການຄ້າຂາອອກ-ຂາເຂົ້າ ເມືອງລະມາມ ແລະ ສູນເຕັກນິກກະສິກຳ ແລະ ປ່າໄມ້ ທີ່ເມືອງລະມາມ ຕື່ມອີກ.
ພາບ ແລະ ຂ່າວ: ກົມປະຊາສຳພັນ ຫສນຍ
May be an image of 10 people, people sitting and people standing
May be an image of standing and indoor
May be an image of 14 people, people sitting, people standing and indoor