ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນຕອນບ່າຍ ວັນທີ 22 ພະຈິກ 2023 ທີ່ສຳນັກງານນາຍົກລັດຖະມົນຕີ, ທ່ານ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ມາຊາຮິໂກະ ເມໂຕກິ, ເລຂາທິການໃຫຍ່ສະ ຫະພາບໄປສະນີສາກົນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 21-23 ພະຈິກ 2023.
ໃນໂອກາດນີ້, ທ່ານ ຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ມາຊາຮິໂກະ ເມໂຕກິ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໂດຍສະເພາະ
ການເຄື່ອນໄຫວເຮັດວຽກຮ່ວມກັບກະຊວງເຕັກໂນໂລຊີ ແລະ ການສື່ສານ ຂອງ ສປປ ລາວ; ໄດ້ຕີລາຄາສູງ ຕໍ່ການພົວ ພັນຮ່ວມມື ລະຫວ່າງ ກະຊວງເຕັກໂນໂລຊີ ແລະ ການສື່ສານ ຂອງ ສປປ ລາວ ແລະ ສະຫະພາບໄປສະນີສາກົນ ກໍ່ຄືການສະໜັບສະໜູນຊ່ວຍເຫຼືອທີ່ລໍ້າຄ່າ, ທັນການ ແລະ ມີປະສິດທິຜົນ ຂອງສະຫະພາບໄປສະນີສາກົນ ໃຫ້ແກ່ ສປປ ລາວ ໃນໄລຍະຜ່ານມາ; ໃນຕໍ່ໜ້າ, ຫວັງຢ່າງຍິ່ງວ່າ ສະຫະພາບໄປສະນີສາກົນ ຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ໃນວຽກງານທີ່ກ່ຽວຂ້ອງ ຂອງ ສປປ ລາວ ຕື່ມອີກ; ສະເໜີພາກສ່ວນຮັບຜິດຊອບ ວຽກງານໄປສະນີລາວ ແລະ ສະຫະພາບໄປສະນີສາກົນ ສືບຕໍ່ຮ່ວມມື, ແລກປ່ຽນຂໍ້ມູນ ແລະ ຖອດຖອນບົດຮຽນເຊິ່ງກັນ ແລະ ກັນ ເພື່ອພ້ອມກັນພັດທະນາວຽກງານໄປສະນີ ມີຄວາມກ້າວໜ້າຂຶ້ນເລື້ອຍໆ. ນອກຈາກນັ້ນ ຍັງໄດ້ແຈ້ງສະພາບພົ້ນເດັ່ນ ໃນການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະ ແຜນການເປີດປີທ່ອງທ່ຽວລາວ 2024, ລວມທັງ ສະຖານທີ່ທ່ອງທ່ຽວ ຢູ່ບາງທ້ອງຖິ່ນ ທີ່ທ່ານ ມາຊາຮິໂກະ ເມໂຕກິ ແລະ ຄະນະ ມີແຜນເຄື່ອນໄຫວຢ້ຽມຢາມ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຕື່ມອີກ.
ໃນໂອກາດດຽວກັນ, ທ່ານ ມາຊາຮິໂກະ ເມໂຕກິ ກໍ່ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ຮອງນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້; ໄດ້ແຈ້ງໃຫ້ຊາບ ກ່ຽວກັບ ຈຸດປະສົງ ແລະ ແຜນການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ ໂດຍສະເພາະ ຢູ່ສູນກາງ ແລະ ທ້ອງຖິ່ນຈຳນວນໜຶ່ງ; ໄດ້ສະແດງຄວາມຂອບໃຈ ຕໍ່ ສປປ ລາວ ທີ່ໄດ້ໃຫ້ການສະໜັບສະໜູນທ່ານ ໃນການດຳລົງຕຳແໜ່ງເລຂາທິການໃຫຍ່ ສະຫະພາບໄປສະນີສາກົນ ໃນປີ 2020 ທີ່ຜ່ານມາ; ນອກນັ້ນ ຍັງໄດ້ແຈ້ງໃຫ້ຊາບໂດຍຫຍໍ້ ກ່ຽວກັບປະຫວັດຄວາມເປັນມາ ແລະ ການເຄື່ອນໄຫວວຽກງານທີ່ພົ້ນເດັ່ນ ຂອງສະຫະພາບໄປສະນີສາກົນ ໃຫ້ທ່ານຮອງນາຍົກ ລັດຖະມົນຕີ ຊາບຕື່ມອີກ.
ຂ່າວ;ພາບ: ກົມປະຊາສຳພັນ ສຳນັກງານນາຍົກລັດຖະມົນຕີ