ໃນວັນທີ 8 ພະຈິກນີ້ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມຄະນະ ໄດ້ລົງຕິດຕາມກວດກາ ກຸ່ມສະນໍາລ້ຽງສັດເມືອງຈວນ ເມືອງວຽງທອງ, ໂດຍມີທ່ານ ຄຳແພນ ວິລືທຳ ເຈົ້າເມືອງວຽງທອງ, ການນຳຂອງເມືອງ, ພະແນກການ ແລະ ພາກສ່ວນກ່ຽວຂ້ອງຮ່ວມພາທາງ.
ການລົງຕິດຕາມກວດກາ ກຸ່ມສະນໍາລ້ຽງສັດເມືອງຈວນໃນຄັ້ງນີ້ ແມ່ນໄດ້ເດີ່ນທາງດ້ວຍເຮືຶອຈັກ ຈາກບ້ານວັງພຽງ ລ່ອງໄປຕາມສາຍນ້ຳຈວນ ເຊິ່ງໄດ້ຜ່ານແກ້ງ ທີ່ເຕັມໄປດ້ວຍໂງນຫີນຫຼາຍແຫ່ງ ເຮັດໃຫ້ມີຄວາມຫຍຸ້ງຍາກໃນການເດີນທາງ, ຕ້ອງໃຊ້ເວລາເກືອບ 2 ຊົ່ວໂມງ ຈຶ່ງສາມາດໄປຮອດຈຸດທີ່ປະຊາຊົນຕັ້ງສະນໍາ, ກຸ່ມສະໜ່ຳລ້ຽງສັດເມືອງຈວນໄດ້ເລີມຍາຍມາຢູ່ຕັ້ງແຕ່ປີ 2001, ມີທັງໝົດ 14 ຄອບຄົວ, 14 ຫຼັງຄາເຮືອນ, ມີພົນລະເມືອງທັງໝົດ 86 ຄົນ, ຍິງ 34 ຄົນ, ເນື້ອທີ່ນາ 12,9 ເຮັກຕາ, ງົວ – ຄວາຍ 78 ໂຕ, ໝູ 73 ໂຕ ແລະ ເປັດໄກ່ ຈໍານວນໜຶ່ງ. ຈຸດປະສົງໃນຄັ້ງ ກໍເພື່ອລົງຕິດຕາມກວດກາຕົວຈິງ ເບິ່ງຊີວິດການເປັນຢູ່ຂອງພໍ່ແມ່ປະຊາຊົນ ໂດຍສະເພາະແມ່ນການທຳມາຫາກິນ, ການດຳລົງຊີວິດ, ການສຶກສາຂອງເດັກນ້ອຍ, ການເບິ່ງແຍງສຸຂະພາບ ແລະ ອື່ນໆ. ພ້ອມນັ້ນ ທ່ານ ເຈົ້າແຂວງ ຍັງໄດ້ໂອລົມຕໍ່ພໍ່ແມ່ປະຊາຊົນ ກຸ່ມສະນໍາລ້ຽງສັດເມືອງຈວນ, ພ້ອມທັງໄດ້ເນັ້ນໃຫ້ການນຳຂອງເມືອງວຽງທອງ ແລະ ພະແນກການທີ່ກ້ຽວຂ້ອງ ຈົ່ງໄດ້ປະສານສົມທົບກັນ ລົງຕິດຕາມກວດກາຢ່າງໃກ້ຊິດ ແລະ ເກັບກຳຂໍ້ມູນຢ່າງລະອຽດ ແລ້ວສ້າງເປັນແຜນການແກ້ໄຂຢ່າງຮອບດ້ານ ເພື່ອນຳສະເໜີອົງການປົກຄອງແຂວງຄົ້ນຄວ້າພິຈາລະນາ ແກ້ໄຂຢ່າງເໝາະສົມ ແລະ ຖືກຕ້ອງທີ່ສູດ. ໂອກາດດຽວກັນນີ້ ທ່ານເຈົ້າແຂວງພ້ອມຄະນະ ຍັງໄດ້ນໍາເອົາເຄືອງກັນໜາວ ແລະ ເກີບ ຈຳນວນໜຶ່ງ ມາມອບໃຫ້ພໍ່ແມ່ປະຊາຊົນ ກຸ່ມສະນໍາລຽງສັດເມືອງຈວນ ຕື່ມອີກ.
ຂ່າວ-ພາບ: ສີປະເສີດ
