ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ ລົງເຄື່ອນໄຫວເຮັດວຽກ ຢູ່ເມືອງ ທົ່ງມີໄຊ.

ໃນວັນທີ 9 ມິຖຸນາ 2021 ຢູ່ທີ່ສະສອນຂອງເມືອງທົ່ງມີໄຊ ແຂວງໄຊຍະບູລີ ໄດ້ມີທີມງານຂອງແຂວງ ເຊິ່ງນຳພາໂດຍທ່ານ ເພັດພິໄຊ ສູນວິໄລ ກຳມະການປະຈຳພັກແຂວງ ຮອງເຈົ້າແຂວງໄຊຍະບູລີ ຫົວໜ້າຄະນະສະເພາະກິດ ຕ້ານສະກັດກັ້ນ, ປ້ອງກັນ ແລະ ຄວບຄຸມ ພະຍາດໂຄວິດ 19 ຂັ້ນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ເມືອງທົ່ງມີ ເປັນກຽດຕ້ອນການຮັບໂດຍທ່ານ ສົມພອນ ໄຊດວງຕາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆທົ່ງມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຄະນະສະເພາະກິດຂັ້ນເມືອງເຂົ້າຮ່ວມ.ໃນກອງປະຊຸມ ທ່ານ ສະເຫຼີມ ພົມມະຈັນ ກຳມະການພັກເມືອງ ຮອງເຈົ້າເມືອງທົ່ງມີໄຊ ຫົວໜ້າຄະນະສະເພາະກິດຂັ້ນເມືອງ ໄດ້ລາຍງານການຈັດຕັ້ງປະຕິບັດວຽກງານຮອບດ້ານຂອງເມືອງ ໂດຍສະເພາະວຽກງານ ສະກັດກັ້ນ, ປ້ອງກັນພະຍາດໂຄວິດ 19 ຢູ່ພາຍໃນເມືອງ  ພາຍຫຼັງທີ່ໄດ້ຮັບຄໍາສັ່ງຂອງທ່ານເຈົ້າແຂວງສະບັບເລກທີ 87/ຈຂ.ຊຍ ອົງການປົກຄອງເມືອງທົ່ງມີໄຊ ກໍ່ໄດ້ຜັນຂະຫຍາຍເປັນຄຳສັ່ງຂອງທ່ານເຈົ້າເມືອງສະບັບເລກທີ 209/ຈມ.ທຊ, ໂດຍການອອກມາດຕະການ ແລະ ແບ່ງຄວາມຮັບຜິດຊອບໃຫ້ພາກສ່ວນທີ່ກ່ຽວຂ້ອງຕ່າງໆນໍາໄປຈັດຕັ້ງປະຕິບັດມາດຕະການຢ່າງເຄັ່ງຄັດໂດຍສະເພາະແມ່ນເຂັ້ມງວດຕິດຕາມກວດກາຕາມຊາຍແດນ, ໄດ້ປິດຄົນ-ເຂົ້າອອກເມືອງຊົ່ວຄາວທັງໄດ້ຕັ້ງຈຸດກວດກາ-ກັ່ນກອງຄົນເຂົ້າ-ອອກເມືອງ ຢູ່ບ້ານນາມ່ວງຈຳນວນ 1 ຈຸດ ເພື່ອເປັນການຍົກລະດັບມາດຕະການກວດກາຄົນເຂົ້າ-ອອກເມືອງ ໃຫ້ເຂັ້ມງວດຍິ່ງຂຶ້ນ ໂດຍມີການສັບປ່ຽນເວນຍາມກັນແຕ່ລະມື້ພ້ອມກັນນີ້ກໍໄດ້ມີທີມງານທະຫານກອງພັນ 411 ກວດກາລາດຕະເວນຕາມເສັ້ນທາງເພື່ອປ້ອງກັນການລັກລອບເຂົ້າເມືອງໂດຍບໍ່ຖືກຕ້ອງ, ໄດ້ໂຈະການຮຽນ-ການສອນຊົ່ວຄາວ, ໂຈະການສັນຈອນຂອງລົດໂດຍສານໃນການເຂົ້າອອກເມືອງ ພ້ອມທັງປິດເຮືອນພັກ, ຮ້ານອາຫານ, ຮ້ານກິນດື່ມ ແລະ ອື່ນໆ ໄດ້ກຳນົດສູນກັກກັນທັງໝົດ 3 ຈຸດ ມີຜູ້ມາກັກກັນຢູ່ສູນທັງໝົດ 60 ຄົນ ແລະ ກັກຄົບ 14 ວັນ ໄປແລ້ວ 58 ຄົນ, ຍັງຢູ່ສູນ 2 ຄົນເຊິ່ງປັດຈຸບັນພວມຕິດຕາມອາການ. ພ້ອມດຽວກັນນີ້ກອງປະຊຸມຍັງໄດ້ມີການປະກອບຄຳເຫັນແລກປ່ຽນບົດຮຽນເຊິ່ງກັນ ແລະ ກັນໃນການການຈັດຕັ້ງປະຕິບັດໃນໄລຍະຜ່ານ ເພື່ອຊອກໃຫ້ເຫັນດ້ານດີ, ດ້ານຄົງຄ້າງ, ພ້ອມກັນແກ້ໄຂໃຫ້ດີຂຶ້ນໃນຕໍ່ໜ້າ. ໃນຕອນທ້າຍທ່ານ ເພັດພິໄຊ ສູນວິໄລ ຮອງເຈົ້າແຂວງ ຫົວໜ້າຄະນະສະເພາະກິດຂັ້ນແຂວງເຊິ່ງທ່ານໄດ້ເນັ້ນໝັກໃຫ້ຄະນະສະເພາະກິດຂັ້ນເມືອງເອົາໃຈໃສ່ຫຼາຍບັນຫາ ໂດຍສະເພາະ  ສືບຕໍ່ຈັດຕັ້ງປະຕິບັດຄຳສັງຂອງທ່ານເຈົ້າແຂວງສະບັບເລກທີ 87 ວາງອອກຢ່າງເຂັ້ມງວດ, ສືບຕໍ່ເອົາໃຈໃສ່ຕິດຕາມການລັກລອບເຂົ້າ-ອອກຊາຍແດນຕາມຊ່ອງທາງຕ່າງໆ,  ພ້ອມກັນຄົ້ນຄວ້າມາດຕະການເຂັ້ມງວດ ແລະ ຜ່ອນຜັນໃນລະດັບຂັ້ນເມືອງ ເພື່ອຫຼຸດຜ່ອນຜົນກະທົບຕໍ່ເສດຖະກິດແລະ ການດຳລົງຊີວິດຂອງປະຊາຊົນ,  ສືບຕໍ່ໂຄສະນາປະຊາສຳພັນ ປຸກລະດົມໃຫ້ພໍ່ແມ່ປະຊາຊົນດຳລົງຊີວິດແບບໃໝ່ໃຫ້ເປັນຄວາມຊິນເຄີຍ,  ພ້ອມທັງສືບຕໍ່ປຸກລະດົມການປະກອບສ່ວນວັດຖຸປັດໃຈ ຈາກພາກສ່ວນສັງຄົມ ເພື່ອນໍາໃຊ້ເຂົ້າໃນວຽກງານການສະກັດກັ້ນ, ປ້ອງກັນການລະບາດຂອງພະຍາດໂຄວິດ 19 ຢູ່ພາຍໃນເມືອງທົ່ງມີໄຊທັງນີ້ກໍ່ຮັບປະກັນບໍ່ໃຫ້ເກີດການລະບາດຂຶ້ນຢູ່ພາຍໃນແຂວງ ກໍ່ຄືເມືອງທົ່ງມີໄຊຂອງພວກເຮົາ.