ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທ່ານ ແພງຊ້ອຍ ແພງເມືອງ ໄດ້ຮັບເລື່ອກເປັນເຈົ້າເມືອງເມືອງຄອບ ແຂວງໄຊຍະບູລີ

ໃນວັນທີ 25 ທັນວາ 2019 ເມືອງຄອບ ແຂວງ ໄຊຍະບູລີ ໄດ້ຈັດພິທີປະກາດ ຈັດຕັ້ງເຈົ້າເມືອງ, ຮອງເຈົ້າເມືອງ ແລະ ຂະແໜ່ງການຂອງເມືອງ, ໂດຍເປັນກຽດເຂົ້າຮ່ວມຂອງທ່ານ ຍັນຍົງ ສີປະເສີດ ຮອງເລຂາຄະນະບໍລິຫານພັກແຂວງ ຮອງເຈົ້າແຂວງ ໄຊຍະບູລີ, ມີຄະນະປະຈຳພັກເມືອງ ກຳມະການພັກເມືອງ ຫົວໜ້າຫ້ອງການ ຮອງຫົວໜ້າຫ້ອງການ, ພະນັກງານ, ທະຫານ, ຕຳຫຼວດ, ນັກທຸລະກິດ ຜູ້ປະກອບການ ພ້ອມພະນັກງານ ອາວຸດໂສບຳນານເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ ທ່ານ ໄພທອງ ຈັນດາ ຮອງຫົວໜ້າຄະນະຈັດຕັ້ງແຂວງ ໃຫ້ກຽດຂື້ນຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງ ເຈົ້າເມືອງ ແລະ ຮອງເຈົ້າເມືອງ ເມືອງຄອບ, ໂດຍໄດ້ແຕ່ງຕັ້ງ ທ່ານ ແພງຊ້ອຍ ແພງເມືອງ ວ່າການເຈົ້າເມືອງ ຂື້ນມາເປັນເຈົ້າເມືອງ ເມືອງຄອບຄົນໃໝ່. ແຕ່ງຕັ້ງທ່ານ ບຸນຈັນ ເສດຈຳປາ ຄະນະປະຈຳພັກເມືອງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ ຂື້ນມາເປັນຮອງເຈົ້າເມືອງເມືອງຄອບ ແລະ ແຕ່ງຕັ້ງ ທ່ານ ສະໝັກ ລິດສະຖານ ກຳມະການພັກເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ ຂື້ນເປັນຮອງເຈົ້າເມືອງຄົນໃໝ່.

ພ້ອມດຽວກັນນີ້ ທ່ານ ນາງ ບຸນສົມ ກາວັນ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງ ໃຫ້ກຽດຂື້ນຜ່ານຂໍ້ຕົກລົງຂອງທ່ານເຈົ້າເມືອງ, ວ່າດ້ວຍການແຕ່ງຕັ້ງປະທານກວດກາພັກລັດເມືອງ ແລະ ຮອງປະທານກວດກາພັກລັດ ພ້ອມກັບຫົວໜ້າຫ້ອງການ, ຮອງຫົວໜ້າຫ້ອງການ, ໂດຍໄດ້ແຕ່ງຕັ້ງ ທ່ານ ໄລ ອິນທິບ ຮອງເລຂາພັກເມືອງ ເປັນປະທານກວດກາພັກລັດເມືອງຄົນໃໝ່,  ແຕ່ງຕັ້ງ ທ່ານ ທອງແສງ ມະນີວົງ ແລະ ທ່ານ ນາງຄຳກ້ຽວ ຈັນທະວົງ ເປັນຮອງປະທານກວດກາພັກລັດເມືອງ, ແຕ່ງຕັ້ງ ທ່ານ ອຸດົມ ປັນຍາທອງ ຮອງຫົວໜ້າອຸດສາຫະກຳ ແລະ ການຄ້າເມືອງ ຂື້ນມາເປັນຫົວໜ້າຫ້ອງການອຸດສາຫະກຳ ແລະ ການຄ້າເມືອງຄົນໃໝ່, ແຕ່ງຕັ້ງ ທ່ານ ແສນ ບຸນສຸກ ຮອງຫົວໜ້າຫ້ອງການພະລັງງານ ແລະ ບໍ່ແຮ່ ຂື້ນມາເປັນຫົວໜ້າຫ້ອງການພະລັງງານ ແລະ ບໍ່ແຮ່ຄົນໃໝ່ ແລະ ແຕ່ງຕັ້ງ ທ່ານ ສຸກສະຫວັນ ມິ່ງອຸດົມ ຫົວໜ້າຫ້ອງການຊັບສິນ ຫ້ອງການ ການເງິນ ຂື້ນມາເປັນຮອງຫົວໜ້າຫ້ອງການຄົນໃໝ່.

ໃນຕອນທ້ານຂອງພິທີ ຍັງໄດ້ຮັບຟັງການໂອ້ລົມຂອງທ່ານ ຍັນຍົງ ສີປະເສີດ ຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງ ແຂວງ ໄຊຍະບູລີ, ເຊິ່ງກ່ອນອື່ນໝົດທ່ານໄດ້ສະແດງ ຄວາມຍ້ອງຍໍຊົມເຊີຍຕໍ່ອົງຄະນະພັກເມືອງ, ທີ່ຍາດຜົນງານມາໄດ້ໃນໄລຍະທີ່ຜ່ານມາ, ພ້ອມດຽວກັນນີ້ທ່ານຍັງໄດ້ຮຽກຮ້ອງມາຍັງຜູ້ທີ່ຖືກແຕ່ງຕັ້ງໃນຄັ້ງນີ້, ຈົ່ງເພີ່ມທະວີເອົາໃຈໃສ່ໃນໜ້າທີ່ວຽກງານຂອງຕົນຮັບຜິດຊອບ, ຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ກຳແໜ້ນຕໍ່ແນວທາງ ແລະ ມະຕິຄຳສັ່ງຕ່າງໆຂອງພັກ ແລະ ລັດວາງອອກ ໃຫ້ປະກວດຜົນເປັນຈິງ. ປັບປຸງແບບແຜນວິທີເຮັດວຽກໃຫ້ສອດຄ່ອງກັບສະພາບຕົວຈິງ ແລະ ທົ່ວເຖິງຮາກຖານແບບເລິກເຊິ່ງເຖິງທ່ອງກັບຕົວຈິງນຳປະຊາຊົນ. ເຊີດຊູໃນໜ້າທີ່ການເມືອງຂອງຕົນຮັບຜິດຊອບມີນ້ຳຝຈປະຫຍັດມັດທະຍັດ ຊື່ສັດບໍລິສຸດ ພ້ອມກັນພັດທະນາເມືອງຄອບໃຫ້ມີຄວາມຈະເລີນກ້າວໜ້າໃນແຕ່ລະດ້ານຂື້ນໄປເລື້ອຍໆ.