ໃນວັນທີ 25-26 ກຸມພາ 2023, ທ່ານ ແສງເພັດ ຮຸ່ງບຸນຍວງ, ເອກອັກຄະລັດ ຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ມະຫາວິທະຍາໄລກິ່ວລອງ, ແຂວງວີ໊ງລອງ, ສສ ຫວຽດນາມ ໂດຍເປັນກຽດຕ້ອນຮັບໂດຍ ສາດສະດາຈານ ດ໋ອກເຕີ ເລືອງ ມິງ ກື, ຜູ້ອຳນວຍການມະຫາວິທະຍາໄລກິ່ວລອງ ພ້ອມດ້ວຍຄະນະອຳນວຍການ, ຄູ-ອາ ຈານ ແລະ ນັກສຶກສາລາວ ທີ່ກຳລັງສຶກສາ-ຮໍ່າຮຽນຢູ່ມະຫາວິທະຍາໄລດັ່ງກ່າວ.
ໂອກາດນີ້, ສາດສະດາຈານ ດ໋ອກເຕີ ເລືອງ ມິງ ກື ກໍໄດ້ສະແດງຄວາມຍິນດີຕ້ອນຮັບຄະນະ ພ້ອມທັງລາຍງານສະ ພາບສັງລວມໂດຍຫຍໍ້ກ່ຽວກັບມະຫາວິທະຍາໄລ ໃຫ້ຮູ້ວ່າ: ມະຫາວິທະຍາໄລ ແຫ່ງນີ້ ເປັນໂຮງຮຽນເອກະຊົນ 100 % ຊຶ່ງນັບແຕ່ສ້າງຕັ້ງ ແລະ ພັດທະນາ 20 ປີທີ່ຜ່ານມາ, ໂຮງຮຽນສາມາດຍາດມາໄດ້ຜົນງານຫຼາຍດ້ານທີ່ພົ້ນເດັ່ນໃນຂົງເຂດການກໍ່ສ້າງຊັບພະຍາກອນມະນຸດ, ການຄົ້ນຄວ້າວິທະຍາສາດ. ປັດຈຸບັນ, ມີນັກສຶກສາທີ່ກຳລັງສຶກສາ-ຮໍ່າຮຽນ, ຄົ້ນຄວ້າຫຼາຍກວ່າ 11.000 ຄົນ ໃນຫຼາຍສາຂາວິຊາ ໂດຍສະເພາະຂະແໜງການແພດ, ກະສິກໍາ, ເຄື່ອງຈັກ, ກົດໝາຍ, ບໍລິຫານທຸລະກິດ, ການເງິນ-ການທະນາຄານ ແລະ ມີຄູ-ອາຈານຫຼາຍກວ່າ 600 ຄົນທີ່ສິດສອນ. ພິເສດ, ມະຫາວິທະຍາໄລກິ່ວລອງໄດ້ຊ່ວຍກໍ່ສ້າງຊັບພະຍາກອນມະນຸດໃຫ້ແກ່ ສປປ ລາວ ນັບແຕ່ມີ 2015 ເປັນຕົ້ນມາ ດ້ວຍຮູບແບບທຶນການສຶກສາທີ່ແຕກຕ່າງກັນ (ສ່ວນຫຼາຍແມ່ນທຶນສ່ວນຕົວ), ຊຶ່ງປັດຈຸບັນມີນັກສຶກສາລາວ ກຳລັງຮຽນ ຢູ່ ໂຮງຮຽນດັ່ງກ່າວ ຈຳນວນ 114 ຄົນ.
ທ່ານທູດ ແສງເພັດ ຮຸ່ງບຸນຍວງ ກໍສະແດງຄວາມຂອບໃຈມາຍັງມະຫາວິທະຍາໄລກິ່ວລອງ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ອຳນວຍຄວາມສະດວກຕ່າງໆໃຫ້ຄະນະຄັ້ງນີ້. ທ່ານທູດໃຫ້ຮູ້ວ່າ: ການພົວພັນຮ່ວມມືຂະແໜງການສຶກສາ ແມ່ນບຸລິມະສິດຕົ້ນຕໍຂອງການຮ່ວມມືລະຫວ່າງສອງປະເທດລາວ – ຫວຽດນາມ ພ້ອມທັງໄດ້ຕີລາຄາສູງການຊ່ວຍກໍ່ສ້າງຊັບພະຍາມະນຸດຂອງພັກ, ລັດຖະບານ ກໍຄືບັນດາສະຖາບັນການສຶກສາຂອງຫວຽດນາມ ໃຫ້ແກ່ ສປປ ລາວ ໃນນີ້ກໍມີການປະສ່ວນສຳຄັນຂອງມະຫາວິທະຍາໄລກິ່ວລອງ, ສະແດງຄວາມຂອບໃຈທີ່ໄດ້ເອົາໃຈໃສ່ຄຸ້ມຄອງ ແລະ ເບິ່ງແຍງນັກສຶກສາລາວ ໂດຍສະເພາະໃນໄລຍະທີ່ມີການແຜ່ລະບາດຂອງເຊື້ອພະຍາດໂຄວິດ-19 ຊຶ່ງຈາກການເອົາໃຈໃສ່ດັ່ງກ່າວເຮັດໃຫ້ນັກສຶກສາມີຄວາມປອດໄພ ແລະ ສຳເລັດໜ້າທີ່ການສຶກສາຂອງຕົນ. ແຕ່ເຖິງຢ່າງໃດກໍຕາມ, ຄ່ຽງຄູ່ກັບບັນດາໝາກຜົນທີ່ຍາດມາໄດ້ໃນໄລຍະຜ່ານມານັ້ນ ທ່ານທູດ ກໍໄດ້ນຳເອົາເນື້ອໃນຈິດໃຈການຊີ້ນຳຂອງການນໍາຂັ້ນສູງພັກ, ລັດສອງປະເທດ ທີ່ຍາມໃດກໍເນັ້ນໜັກເຖິງຄຸນນະພາບການສຶກສາຂອງນັກສຶກສາລາວ ຢູ່ ສສ ຫວຽດນາມ.
ສະນັ້ນ, ທ່ານທູດ ຈຶ່ງສະເໜີໃຫ້ມະຫາວິທະຍາໄລກິ່ວລອງສືບຕໍ່ຊ່ວຍກໍ່ສ້າງຊັບພະຍາກອນມະນຸດ ສປປ ລາວ ດ້ວຍຄວາມຮັບຜິດຊອບສູງ, ຫຼີກລ້ຽງການນະໂຍບາຍແບບບໍ່ສົມເຫດສົມຜົນ ຫຼື ການໃຫ້ຄະແນນແບບທັງໆທີ່ນັກສຶກສາຜູ້ນັ້ນບໍ່ໄດ້ມາດຖານ ທັງນີ້ກໍເພື່ອຮັບປະກັນຄຸນນະພາບຂອງນັກສຶກສາ ແລະ ຮັບປະ ກັນຊື່ສຽງຂອງມະຫາວິທະຍາໄລ.
ເນື່ອງໃນໂອກາດນີ້, ທ່ານທູດ ກໍໄດ້ຂຶ້ນມອບໃບຍ້ອງຍໍໃຫ້ແກ່ນັກສຶກສາລາວ ທີ່ມີຜົນງານດີໃນການຮໍ່າຮຽນ ກໍຄືໃນການຝຶກຝົນຫຼໍ່ຫຼອມຕົວເອງ ແລະ ຕອນທ້າຍໄດ້ໃຫ້ການໂອ້ລົມນັກສຶກສາລາວ.
ພາບປະກອບ.