ທ່ານ ໂຈເຊ ຣາໂມສ ອໍຕ້າ, ປະທານາທິບໍດີ ຕີມໍເລສເຕ ຢ້ຽມຢາມມະຫາວິທະຍາໄລແຫ່ງຊາດລາວ

ຕອນເຊົ້າ ວັນທີ 1 ມີນາ 2024 ທ່ານ ໂຈເຊ ຣາໂມສ ອໍຕ້າ, ປະທານາທິບໍດີ ຕີມໍເລສເຕ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມມະຫາວິທະຍາໄລແຫ່ງຊາດລາວ ແລະປາຖະກະຖາກ່ຽວກັບທິດທາງໃນການສົ່ງເສີມການພົວພັນ ແລະການຮ່ວມມື ລະຫວ່າງຕີມໍເລສເຕ ແລະລາວ ໃຫ້ແກ່ນັກສຶກສາ ແລະພາກທຸລະກິດຂອງລາວ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະກິລາ ພ້ອມດ້ວຍຄະນະ.

ໃນການຢ້ຽມຢາມຄັ້ງນີ້ ທ່ານປະທານາທິບໍດີຕີມໍເລສເຕ ໄດ້ຮັບຟັງການລາຍງານໂດຍຫຍໍ້ກ່ຽວກັບມະຫາວິທະຍາໄລແຫ່ງຊາດລາວ ຈາກ ທ່ານ ອຸດົມ ພອນຄຳເພັງ ອະທິການບໍດີ ມະຫາວິທະຍາໄລແຫ່ງຊາດ ໂດຍທ່ານໄດ້ແຈ້ງໃຫ້ຮູ້ວ່າ: ມະຫາວິທະຍາໄລແຫ່ງຊາດລາວ ສ້າງຕັ້ງຂຶ້ນໃນປີ 1996 ໂດຍການລວມສາມມະຫາວິທະຍາໄລ ແລະ 7 ວິທະຍາໄລ ແລະ ສະຖາບັນທີ່ດໍາເນີນການພາຍໃຕ້ກະຊວງຕ່າງໆ ເຂົ້າໄປໃນມະຫາວິທະຍາໄລດຽວ ພາຍໃຕ້ການຊີ້ນຳຂອງກະຊວງສຶກສາທິການ ແລະ ກິລາ ໃນການອອກແບບ ແລະ ສະໜອງໂຄງການການສຶກສາ ແລະ ການບໍລິການທາງວິຊາການໃຫ້ແກ່ສັງຄົມ. ໄດ້ມຸ່ງໄປເຖິງການບັນລຸວິໄສທັດໃຫ້ກາຍເປັນສູນກາງການສຶກສາ ແລະ ຄົ້ນຄ້ວາ, ຍຶດໝັ້ນມາດຕະຖານລະດັບພາກພື້ນ ແລະສາກົນທີ່ມີຄຸນນະພາບສູງ ເປັນສະຖາບັນການສຶກສາຊັ້ນສູງແຫ່ງດຽວໃນລາວທີ່ຖືກຄັດເລືອກເຂົ້າເປັນສະມາຊິກຂອງເຄືອຂ່າຍມະຫາວິທະຍາໄລອາຊຽນ.

ໃນປັດຈຸບັນມະຫາວິທະຍາໄລແຫ່ງຊາດ ປະກອບດ້ວຍ 13 ຄະນະວິຊາ ແລະ 2 ສະຖາບັນ ປະກອບມີລະດັບປະລິນຍາຕີຈົນເຖິງລະດັບປະລິນຍາເອກ. ມາຮອດສົກ 2023-2024, ມະຫາວິທະຍາໄລມີພະນັກງານ 1,704 ຄົນ ແລະ ນັກ ສຶກສາ 19,773 ຄົນ, ລວມທັງນັກສຶກສາຕ່າງປະເທດຫຼາຍກວ່າ 800 ຄົນ. ມະຫາວິທະຍາໄລແຫ່ງຊາດ ເປັນຫນຶ່ງໃນຍຸດທະສາດສະຖາບັນຂອງຕົນເພື່ອຍົກສູງຄຸນນະພາບຂອງການສຶກສາ ແລະ ການຮຽນຮູ້. ມາຮອດປະຈຸບັນ, ມະຫາວິທະຍາໄລໄດ້ພົວພັນຮ່ວມມືດ້ານວິຊາການກັບ 300 ກວ່າສະຖາບັນການສຶກສາຊັ້ນສູງໃນ 32 ປະເທດ, ຕົ້ນຕໍແມ່ນຈາກອາຊີແລະເອີຣົບ.

ຂ່າວ: ຈັນທະສອນ

ພາບ: ຄໍາກອງ