ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ມອບ ຕຽງນອນຮອງຮັບຄົນເຈັບ ຈໍານວນ 16 ໜ່ວຍ, ມູນຄ່າ 52 ລ້ານກວ່າກີບ ເພື່ອຊຸກຍູ້-ຊ່ວຍເຫລືອ, ປະກອບສ່ວນເຂົ້າໃນ ວຽກງານສະກັດກັ້ນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຢູ່ ແຂວງຈໍາປາສັກ.
ພິທີມອບ-ຮັບ ໄດ້ມີຂຶ້ນໃນວັນທີ 14 ກໍລະ ກົດ 2021, ທີ່ຫ້ອງວ່າການແຂວງຈໍາປາສັກ, ຕາງໜ້າກ່າວມອບໂດຍ ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ ແລະ ກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ. ມີ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໂອກາດດັງກ່າວ, ທ່ານ ເຈົ້າແຂວງຈຳປາສັກ ໄດ້ສະແດງຄວາມຂອບໃຈ ແລະຮູ້ບຸນຄຸນ ໄປຍັງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ທີ່ມີຄວາມເປັນຫວ່ງເປັນໃຍ ຕໍ່ ປະຊາຊົນ ແລະອົງການປົກຄອງແຂວງຈຳປາສັກ ໃນວຽກງານ ແກ້ໄຂ ການແຜ່ລະບາດຂອງພະຍາດໂຄວິດ-19 . ເພື່ອຮອງຮັບ ແລະປິ່ນປົວ ຜູ້ຕິດເຊື້ອ ດັ່ງກ່າວ. ປັດຈຸບັນແຂວງຈຳປາສັກໄດ້ມີແຮງງານລາວກັບມາຈາກປະເທດເພື່ອນບ້ານໂດຍຖືກຕ້ອງຕາມກົດໝາຍເປັນຈຳນວນຫລາຍ ແລະໄດ້ມີການຈໍາກັດບໍລິເວນຕົນເອງຢູ່ສູນກັກກັນທີ່ທາງຄະນະສະເພາະກິດແຂວງກຳນົດໄວ້, ພ້ອມດຽວກັນນັ້ນກໍໄດ້ມີຜູ້ຕິດເຊື່ອເພີ່ມຂຶ້ນຫລາຍໃນແຕ່ລະວັນບໍ່ຕໍ່າກວ່າ 30 ຄົນ, ມີຜູ້ຕິດເຊື້ອສະສົມແລ້ວ 856 ຄົນ, ພວມປິ່ນປົວ 460 ຄົນ, ປິ່ນປົວດີ 396 ຄົນ ແລະ ປັດຈຸບັນຍັງມີຜູ້ກັກໂຕຢູ່ສູນກັກກັນທີ່ທາງຄະນະສະເພາະກິດແຂວງກຳນົດໄວ້ 1.000 ກ່ວາຄົນ. ຕໍ່ກັບບັນຫາດັ່ງກ່າວ, ຄະນະສະເພາະກິດແຂວງຈຶ່ງໄດ້ຂະຫຍາຍສະຖານທີ່ປິ່ນປົວອອກຕື່ມ 3 ແຫ່ງຄື: ໂຮງໝໍເມືອງໂພນທອງ, ໂຮງໝໍ 106 ກອງທັບແລະ ໂຮງໝໍພາກສະໜາມວິທະຍາໄລການເງິນ, ເຊິ່ງທັງ 3 ແຫ່ງນີ້ຍັງມີຕຽງຮອງຮັບຜູ້ຕິດເຊື້ອໄດ້ ອີກປະມານ 700 ຕຽງ.
ຂ່າວ: ທັດຊະນະ
Loading...