ໃນ​ວັນ​ທີ 04/01/2021 ທີ່ກອງ​ບັນຊາ​ການ​ທະຫານ​ນະຄອນຫລວງ​ຮ່າ​ໂນ້ຍ ​ໄດ້​ມີ​ພິທີພົບ​ປະ ລະຫວ່າງ ຄະນະ​ນຳ​ສະຖານ​ເອກ​ອັກຄະ​ລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ​ແລະ ຄະນະ​ນຳກອງ​ບັນຊາ​ການ​ທະຫານ​ນະຄອນຫລວງ​ຮ່າ​ໂນ້ຍ, ​ເພື່ອ​ເປັນ​ການສະ​ເຫຼີມສະຫຼອງ​ວັນ​ສ້າງຕັ້ງສາທາລະນະ​ລັດປະຊາທິປະ​ໄຕ ​ປະຊາຊົນ​ລາວຄົບຮອບ45 ປີ (2/12/1975-2/12/2020) ແລະ ວັນ​ເກີດປະທານ ໄກສອນ ພົມວິຫານ ຄົບຮອບ 100 ປີ (13/12/1920-13/12/2020), ວັນສ້າງ​ຕັ້ງ​ກອງທັບ​ປະຊາຊົນ​ລາວ ຄົບຮອບ 72 ປີ, ວັນ​ສ້າງ​ຕັ້ງ​ກອງທັບ​ປະຊາຊົນ​ຫວຽດນາມ​ຄົບຮອບ 76 ປີ.
​ໃນ​ການ​ພົບ​ປະທ່ານ ພົນ​ຈັດຕະວາ ຫງວຽນ ​ກວັກ​ ຢວຽດ, ຫົວໜ້າ​ກອງ​ບັນຊາ​ການ​ນະຄອນຫຼວງ​ຮ່າ​ໂນ້ຍ ຕາງໜ້າການນຳພັກ, ລັດ ແລະ ປະຊາຊົນຫວຽດນາມ​ ​ໂດຍ​ສະ​ເພາະ ​ແມ່ນກອງ​ບັນຊາ​ການ​ທະຫານ​ນະຄອນຫລວງ​ຮ່າ​ໂນ້ຍ​ເນັ້ນ ໄດ້​ຍົກ​ໃຫ້​ເຫັນ: 45 ປີ, ພາຍໃຕ້ການນຳພາອັນສະຫຼາດສ່ອງ​ໃສ ຂອງ ພັກປະຊາຊົນປະຕິວັດລາວ, ນຳພາໂດຍປະທານໄກສອນພົມວິຫານທີ່ ​ເຄົາລົບ​ຮັກ, ປະຊາຊົນລາວບັນດາ ເຜົ່າ​ໄດ້​ພິລະອາດຫານ​ເຮັດ​ສຳ​ເລັດ​ພາລະກິດຕໍ່ສູ້ປົດປ່ອຍປະ​ເທດຊາດຢ່າງ​ມີ​ໄຊ, ສະຖາປະນາ ສປປ ລາວ ໃນວັນທີ 2 ທັນວາ 1975. ​ສາຍ​ພົວພັນ​ລະຫວ່າງ​ສອງ​ກອງທັບ ​ແລະ ປະ​ຊົນ​ຊົນ​ສອງ​ຊາດ​ຫວຽດນາມ-​ລາວ ​ທີ່​ໄດ້​ຮ່ວມ​ແຮງ​ຮ່ວມ​ໃຈ​ຊ່ວຍ​ເຫຼືອ​ເຊິ່ງກັນ ​ແລະ ກັນ​ມາ​ຕະຫຼວດ ເປັນຂີດໝາຍ ທີ່ສ່ອງແສງໃຫ້ເຫັນໃນການປະຕິວັດຮ່ວມຂອງສອງປະເທດຫວຽດນາມ ແລະ ລາວອິກດ້ວຍ. ພ້ອມດຽວກັນນັ້ນກໍ​ໄດ້​ຍົກ​ໃຫ້​ເຫັນຜົນສຳ​ເລັດ​ທີ່ກອງ​ບັນຊາ​ການ​ທະຫານ​ນະຄອນຫລວງ​ຮ່າ​ໂນ້ຍຍາດ​ມາ​ໄດ້​ໃນ​ໄລຍະ​ຜ່ານ​ມາ.
​ໃນ​ໂອກາດ​ນີ້ທ່ານ ​ແສງ​ເພັດ ຮຸ່ງ​ບຸນ​ຍວງ, ​ເອກ​ອັກຄະ​ລັດຖະທູດ​ວິສາມັນຜູ້​ມີ​ອຳນາດ​ເຕັມ​ແຫ່ງ ສປປ ລາວ ປະຈຳ ສສ ຫວຽດນາມ ​ໄດ້​ກ່າວ​ວ່າ: ໃນປະຫວັດສາດແຫ່ງການພົວພັນສາກົນ ແຕ່ອະດີດຈົນເຖິງປັດຈຸບັນ, ການພົວພັນພິເສດ ລາວ – ຫວຽດນາມ, ຫວຽດນາມ – ລາວ ເປັນການ​ພົວພັນ​ທີ່​ໂດດ​ເດັ່ນ, ເປັນແວ່ນແຍງແບບຢ່າງທີ່ດີ, ຫາຍາກ, ມີຄວາມໃກ້ຊິດສະໜິດສະໜົມ, ບໍລິສຸດພຸດຜ່ອງ, ປອດໃສຂາວສະອາດ ແລະ ເຕັມໄປດ້ວຍ ການພົວພັນຮ່ວມມືທີ່ມີປະສິດທິຜົນ. ການພົວພັນພິເສດນີ້, ໄດ້ຮັບ​ການ​ກໍ່​ຕັ້ງໂດຍ ປະທານ ໂຮ່ຈີມິນ ຜູ້​ຍິ່ງ​ໃຫຍ່ ພ້ອມກັບປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່​ແສນ​ເຄົາລົບ​ຮັກ ເປັນ ການ​ພົວພັນ​ທີ່​ມາ​ຈາກ​ເມັດ​ເລືອດ ​ແລະ​ ຢາດ​ເຫື່ອ​ຂອງ​ສະມາຊິ​ກພັກ, ພະນັກງານ, ນັກຮົບ​ປະຕິວັດ ​ແລະ​ປະຊາຊົນ​ສອງ​ຊາດ​ທີ່​ເຈືອ​ຈານ​ກັນ​ຢູ່​ແຕ່​ລະສະ​ໜາມ​ຮົບ ແລະ ໄດ້ຮັບການຖະໜຸຖະໜອມ ແລະ ເພີ່ມພູນຄູນສ້າງ ຈາກຫລາຍ​ລຸ້ນຄົນ, ຊຶ່ງຜ່ານການທົດສອບໃນແປວໄຟສົງຄາມທີ່ດຸເດືອດຂ້ຽວຂາດນາໆປະການ, ທີ່ເຕັມໄປດ້ວຍການເສຍສະຫລະ, ຫຍຸ້ງຍາກລຳບາກ, ອັນໄດ້ເຮັດໃຫ້ການພົວພັນ ລາວ – ຫວຽດນາມ ໄດ້ກາຍເປັນກົດເກນແຫ່ງຄວາມເປັນຄວາມຕາຍ ແລະ ເປັນກຳລັງແຮງທີ່ແຂງແກ່ນ ​ແລະ ​ເປັນ​ຂອດ​ຕັດສິນ​ທຸກໄຊຊະນະຂອງການປະຕິວັດສອງປະເທດ.
ພ້ອມ​ດຽວ​ກັນ​ນັ້ນທ່ານ ​ແສງ​ເພັດ​ ຮຸ່ງ​ບຸນ​ຍວງ ຍັງ​ໄດ້​​ຕີ​ລາຄາ​ສູງ ຕໍ່​ຜົນງານ ​ແລະ​ ການ​ພົວພັນ​ຮ່ວມ​ມື ລະຫວ່າງ​​ກອງ​ບັນຊາ​ການ​ທະຫານ​ນະຄອນຫລວງ​ວຽງ​ຈັນ ​ແລະ ​ກອງ​ບັນຊາ​ການ​ທະຫານ​ນະ​ຄອນ​ຫລວງ​ຮ່າ​ໂນ້ຍ ທີ່​ຍາດ​ມາ​ໄດ້​ໃນ​ຕະຫລອດ​ໄລຍະ​ທີ່​ຜ່ານ​ມ​າ ​ເຊິ່ງ​ເປັນ​ການ​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ປັບປຸງ​ກໍ່​ສ້າງກຳລັງ​ຂອງ​ລາວ, ທັງ​ເປັນ​ການ​ປະກອບສ່ວນ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງສາ​ຍພົວພັນ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີພິ​ເສດ ​ແລະ​ ການ​ຮ່ວມ​ມື​ຮອບດ້ານ​ລະຫວ່າງ​ສອງ​ພັກ, ສອງ​ລັດ, ສອງ​ກອງທັບ ​ແລະ​ປະຊາຊົນ​ສອງຊາດ​ລາວ – ຫວຽດນາມ ​ໃຫ້​ນັບ​ມື້​ຈະ​ເລີ​ນງອກ​ງາມ ​ແລະ ​ແຕກ​ດອກ​ອອກ​ຜົນ​ຍິ່ງໆຂຶ້ນ.
 
Loading...