ຕາມການລາຍງານຂອງທ່ານ ສົມສົດ ແສງອາພອນ ເລຂາພັກເມືອງ ເຈົ້າເມືອງທ່າພະບາດ ແຂວງບໍລິຄໍາໄຊ ໃຫ້ຮູ້ວ່າ: ໃນ 6 ເດືອນຕົ້ນປີ 2024 ນີ້ ເມືອງໄດ້ເອົາໃຈໃສ່ວຽກງານວັດທະນະທໍາ-ສັງຄົມໄດ້ດີຂຶ້ນກວ່າເກົ່າ ເຖິງແມ່ນວ່າຈະພົບຂໍ້ຫຍຸ້ງຍາກປານໃດກໍຕາມ ເມືອງໄດ້ຕັດສິນໃຈນໍາພາວຽກວັດທະນະທໍາ-ສັງຄົມໃຫ້ຂະຫຍາຍຕົວໄປພ້ອມກັບວຽກງານດ້ານອື່ນໆພາຍໃນເມືອງ ອັນພົ້ນເດັ່ນສາມາດຈັດສອບເສັງພາກຮຽນ II ສົກ 2023-2024 ໄດ້ສໍາເລັດ. ໃນນີ້, ຊັ້ນປະຖົມເສັງໄດ້ 98,93%; ມັດທະຍົມຕົ້ນເສັງໄດ້ 96,49% ແລະ ມັດທະ ຍົມປາຍ ມ5-ມ6 ເສັງໄດ້ 97,28%, ໄດ້ປຸກລະດົມຊຸມຊົນ ແລະ ບຸກຄົນເຂົ້າໃນວຽກງານການສຶກສາສຸມທຶນຮອນກໍ່ສ້າງສ້ອມແປງໂຮງຮຽນ ລວມມູນຄ່າໄດ້ 86 ລ້ານກວ່າກີບ, ຂຶ້ນແຜນສ້ອມແປງໂຮງຮຽນມັດທະຍົມສົມບູນປາກທວາຍ, ລົງຊຸກຍູ້ໂຄງການຫຼັກສູດການຮຽນ, ການສອນບໍາລຸງມັດທະຍົມຕົ້ນຈໍານວນ 5 ບ້ານ 4 ຈຸດຄື: ບ້ານຍອຍໄຮ, ບ້ານນໍ້າໂລ້+ບ້ານສີສົມໄຊ, ບ້ານທວາຍໃຫຍ່ ແລະ ບ້ານຫົງທອງໄດ້ສໍາເລັດ.
ວຽກສາທາລະນະສຸກ ເມືອງໄດ້ລົງຕິດຕາມ ແລະ ເຝົ້າລະວັງພະຍາດໂຄວິດ 19 ແລະ 18 ພະຍາດຢ່າງເຂັ້ມງວດ ເຄື່ອນໄຫວໄປຕາມ 7 ແຜນງານ ແລະ 11 ຕົວຊີ້ວັດຂອງກະຊວງສາທາລະນະສຸກວາງອອກ, ສັກວັກຊິນກັນພະຍາດ Panta 3 ໄດ້ 29,8%, ຈັດຝຶກອົບຮົມກ່ຽວກັບວຽກງານໄຂ້ຍຸງລາຍໃຫ້ໂຮງໝໍນ້ອຍ ແລະລົງສໍາຫຼວດຄວາມໜາແໜ້ນຂອງລູກຍຸງໄດ້ 14 ບ້ານ 6 ຄັ້ງ ແລະ ໂຮງຮຽນປະຖົມ 3 ຄັ້ງ, ລົງສຸຂະສຶກສາພະຍາດໄຂ້ຍຸງລາຍໄດ້ 17 ບ້ານ, ສ້າງຂະບວນການຕ້ານໄຂ້ຍຸງລາຍໄດ້ 2 ບ້ານ, ເອົາໃຈໃສ່ປິ່ນປົວພະຍາດໃຫ້ປະຊາຊົນຢ່າງທົ່ວເຖິງ.
ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ເຄື່ອນໄຫວເປັນປົກກະຕິ ເຜີຍແຜ່ແນວທາງນະໂຍບາຍຂອງພັກ, ມະຕິ, ຄໍາສັ່ງ ແລະ ແຈ້ງການຕ່າງໆ ອອກທາງໂທລະໂຄ່ງ ສະຖານີວິທະຍຸ ແລະ ເຟສບຸກຂອງເມືອງ ພ້ອມທັງລົງເກັບກໍາຂ່າວໄດ້ທັງໝົດ 129 ຂ່າວ. ໃນໄລຍະ 6 ເດືອນຜ່ານມາ, ມີນັກທ່ອງທ່ຽວເຂົ້າມາທ່ຽວພາຍໃນເມືອງ 38 ພັນກວ່າຄົນ, ຍິງ 24 ພັນກວ່າຄົນ, ມີເງິນໄຫຼວຽນພາຍໃນເມືອງປະມານ 1 ຕື້ 900 ລ້ານກວ່າກີບ, ສໍາເລັດລົງເກັບຄ່າທໍານຽມ ແລະ ຄ່າບໍລິການຫົວໜ່ວຍທຸລະກິດການບໍລິການ-ການທ່ອງ ທ່ຽວທົ່ວເມືອງປະຈໍາປີ 2024.
ສ່ວນວຽກງານແຮງງານ ແລະ ສະຫວັດດີການສັງຄົມ ເມືອງໄດ້ຕິດຕາມການເຄື່ອນໄຫວກອງທຶນບ້ານ ຊຶ່ງມາຮອດປັດຈຸບັນ, ກອງທຶນດັ່ງກ່າວມີເງິນໝູນວຽນທັງໝົດ 1 ຕື້ກວ່າກີບ, ລົງເກັບກໍາແຮງງານຕ່າງປະເທດທີ່ມາເຄື່ອນໄຫວຕາມຫົວໜ່ວຍທຸລະກິດພາຍໃນເມືອງມີທັງໝົດ 180 ກວ່າຄົນ, ຍິງ 19 ຄົນ, ໃນນີ້ແຮງງານເຄື່ອນໄຫວບໍ່ຖືກຕ້ອງ 39 ຄົນ, ຍິງ 3 ຄົນ, ຈັດສົ່ງແຮງງານພາຍໃນເມືອງໄປເຮັດວຽກຢູ່ ສ.ເກົາຫຼີຈໍານວນ 30 ຄົນ, ຍິງ 10 ຄົນ; ປະຕິບັດນະໂຍບາຍພະນັກງານເສຍຊີວິດ ແລະ ອື່ນໆ ເປັນເງິນ 158 ລ້ານກວ່າກີບ.
ຂ່າວ: ວັນໄຊ ຕະວິນຍານ
