ໃນບົດລາຍງານທີ່ ທ່ານ ສັນຕິພາບ ພົມວິຫານ, ລັດຖະມົນຕີ ກະຊວງການເງິນ ສະເໜີຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 10 ມິຖຸນາ 2024 ນີ້ໄດ້ຍົກໃຫ້ເຫັນຄວາມຄືບໜ້າໃນການປະຕິຮູບບັນດາລັດວິສາຫະກິດທີ່ລັດຖະບານໄດ້ກໍານົດ ວ່າ: ໄລຍະຜ່ານມາ, ກະຊວງການເງິນ ໄດ້ເປັນເຈົ້າການປະຕິບັດມະຕິຂອງລັດຖະບານ ສະບັບ ເລກທີ 10/ລບ, ລົງວັນທີ 15 ຕຸລາ 2021 ກ່ຽວກັບ ການປະຕິຮູບລັດວິສາຫະກິດ ໃນໄລຍະ 5 ປີ 2021-2025 ໂດຍກໍານົດເປົ້າໝາຍການປະຕິຮູບລັດວິສາຫະກິດ ຈໍານວນ 32 ຫົວໜ່ວຍ. ໃນໄລຍະປີ 2022 ຫາ 2023 ໄດ້ສຸມໃສ່ປະຕິຮູບບັນດາຫົວໜ່ວຍລັດວິສະຫະກິດຍຸດທະສາດຂອງປະເທດ ແລະ ມີໜີ້ສິນຈຳນວນຫຼາຍ (ລັດຖະບານໄດ້ແຕ່ງຕັ້ງຄະນະປະຕິຮູບ ໂດຍມີ ທ່ານ ຮອງລັດຖະມົນຕີ ກະຊວງການເງິນ ເປັນຫົວໜ້າຄະນະ ເພື່ອຮັບຜິດຊອບສະເພາະ).
ໃນໄລຍະ 2 ປີຜ່ານມາ ການຈັດຕັ້ງປະຕິບັດໄດ້ມີຄວາມຄືບໜ້າ ດັ່ງນີ້:
– ສໍາເລັດຂາດຕົວ ຈໍານວນ 08 ຫົວໜ່ວຍ.
– ສໍາເລັດການກໍານົດແຜນປະຕິຮູບ ແລະ ດໍາເນີນຕາມແຜນແລ້ວສ່ວນໜຶ່ງ, ຈໍານວນ 05 ຫົວໜ່ວຍ.
– ສໍາເລັດການເກັບໍາຂໍ້ມູນ ແລະ ພວມຄົ້ນຄວ້າກຳນົດແຜນການປະຕິຮູບ, ຈໍານວນ 07 ຫົວໜ່ວຍ.
– ຢູ່ໃນຂັ້ນຕອນການເກັບກຳຂໍ້ມູນ, ຈໍານວນ 12 ຫົວໜ່ວຍ.
ທ່ານ ສັນຕິພາບ ພົມວິຫານ ໃຫ້ຮູ້ຕື່ມວ່າ: ໃນຕົ້ນປີ 2024 ນີ້ ກະຊວງການເງິນ ໄດ້ມອບ-ໂອນວຽກປະຕິຮູບລັດວິສາຫະກິດ ໃຫ້ແກ່ ຄະນະປະຕິຮູບລັດວິສາຫະກິດ ທີ່ຂຶ້ນກັບຫ້ອງວ່າການສູນກາງພັກ ຕາມມະຕິ 26/ກມສພ, ລົງວັນທີ 30 ຕຸລາ 2023 ເປັນຜູ້ສືບຕໍ່ປະຕິຮູບ ຈໍານວນ 24 ຫົວໜ່ວຍທີ່ຍັງບໍ່ທັນສໍາເລັດ, ພ້ອມທັງສົ່ງພະນັກງານ ຈຳນວນ 07 ທ່ານ ເພື່ອເຮັດໜ້າທີ່ເປັນກອງເລຂາຄະນະປະຕິຮູບດັ່ງກ່າວ, ດຽວກັນນີ້ ກໍໄດ້ຍຸບເລີກຄະນະປະຕິຮູບຂັ້ນກະຊວງທີ່ແຕ່ງຕັ້ງຜ່ານມາ.