ບຸນປີໃໝ່ລາວ ຫຼື ບຸນສົງການປີນີ້ ພະແນກຕໍາຫຼວດຈະລາຈອນ ນະຄອນຫຼວງວຽງຈັນ (ນວ) ກຽມຈັດກອງກໍາລັງຮັບຜິດຊອບແບບປະຈໍາທີ່ ແລະ ເຄື່ອນທີ່ປະມານ 700 ກວ່າຄົນ ເພື່ອປະຈໍາການຢູ່ 100 ກວ່າຈຸດ; ພ້ອມຈະມີການກວດຈັບຄວາມໄວ ແລະ ທາດເຫຼົ້າຕາມສາຍທາງ.
ພັນໂທ ສັງຄົມ ພົມມະລາດ, ຫົວໜ້າຕໍາຫຼວດຈະລາຈອນ ນວ ໃຫ້ສໍາພາດຕໍ່ສື່ມວນຊົນວ່າ: ໃນໂອກາດປີໃໝ່ລາວປີນີ້ ເພື່ອຮັບປະກັນເຮັດໃຫ້ການສັນຈອນໄປມາຕາມເສັ້ນທາງ ມີຄວາມເປັນລະບຽບຮຽບຮ້ອຍ, ສະດວກ ແລະ ປອດໄພດີ ພະແນກຕໍາຫຼວດຈະລາຈອນ ຫ້ອງຕໍາຫຼວດ ປກສ ນະຄອນຫຼວງວຽງຈັນ ສົມທົບກອງຕໍາຫຼວດຈະລາຈອນ 9 ຕົວເມືອງ ໄດ້ວາງແຜນຈັດກໍາລັງຕໍາຫຼວດ ຈໍານວນ 724 ຄົນ ປະຈໍາຢູ່ຕາມຈຸດປ້ອມຍາມ, ຕາມສາຍທາງ ແລະ ຢູ່ຕາມສະຖານທີ່ຈັດກິດຈະກໍາຕ່າງໆ ທົ່ວນະຄອນຫຼວງວຽງຈັນ 129 ຈຸດ.
ໃນນີ້ ຈະເນັ້ນ 5 ໜ້າວຽກຕົ້ນຕໍ ຄື: 1. ວຽກງານໂຄສະນາ ໂດຍນໍາໃຊ້ລົດກະບະ, ລົດຈັກຕິດເຄື່ອງສຽງ ເພື່ອກ່າວໂຄສະນາເຜີຍແຜ່ຄໍາສັ່ງ, ຄໍາແນະນໍາ, ກົດລະບຽບ ແລະ ຫຼັກການຂັບຂີ່ປອດໄພຕ່າງໆໃຫ້ມວນຊົນໄດ້ຮັບຮູ້ຢ່າງກວ້າງຂວາງ ທີ່ສໍາຄັນຜູ້ຂີ່ຄວນໃຫ້ກຽດຄົນຍ່າງ; 2. ເນັ້ນໃສ່ວຽກງານຄວບຄຸມລະບາຍການສັນຈອນ ອໍານວຍຄວາມສະດວກຕໍ່ຜູ້ໃຊ້ລົດໃຊ້ຖະໜົນ; 3. ເນັ້ນໃສ່ວຽກງານເລາະຈັດລະບຽບສາຍທາງ ເພື່ອບໍ່ໃຫ້ມີລົດຈອດຜິດຈຸດ ຈອດກີດຂວາງການສັນຈອນ; 4 ວຽກຕັ້ງຈຸດກວດກາການສັນຈອນ ແລະ ການເຮັດວຽກງານບັງຄັບໃຊ້ກົດໝາຍ ໂດຍສະ ເພາະຈັບຄວາມໄວ ແລະ ກວດກາທາດເຫຼົ້າ; 5. ວຽກງານປະຈໍາການ 24 ຊົ່ວໂມງ ຖ້າມີກໍລະນີເກີດອຸບັດເຫດຢູ່ບ່ອນໃດກໍຈະໄດ້ໄປແກ້ໄຂແບບວ່ອງໄວ.
ຫົວໜ້າຕໍາຫຼວດຈະລາຈອນ ນວ ຍັງໃຫ້ຮູ້ວ່າ: ປີຜ່ານມາໄລຍະ 3 ມື້ຂອງການສະຫລອງປີໃໝ່ຢູ່ນະຄອນ ຫລວງວຽງຈັນ ມີອຸບັດເຫດເກີດຂຶ້ນລາຍໃຫຍ່ 20 ກໍລະນີ, ເສຍຊີວິດ 3 ລາຍ. ນອກນີ້ ຍັງມີກໍລະນີເກີດອຸບັດເຫດທີ່ໄກ່ເກ່ຍກັນເອງ ຫຼື ຂະໜາດນ້ອຍອີກຫຼາຍລາຍ. ດັ່ງນັ້ນ, ໃນປີນີ້ ເພືຶ່ອປ້ອງກັນ ແລະ ເຮັດໃຫ້ອຸບັດເຫດຫຼຸດລົງ ຈິ່ງຂໍຮຽກຮ້ອງມາຍັງບັນດາທ່ານນັກຂັບຂີ່ ກໍຄືຜູ້ໃຊ້ລົດໃຊ້ຖະໜົນໃຫ້ພ້ອມກັນປະຕິບັດຄໍາສັ່ງ, ຄໍາແນະນໍາ ແລະ ຫຼັກການຂັບຂີ່ປອດໄພ ເຮັດແນວໃດທ່ານຈິ່ງຈະຫຼິ້ນບຸນປີໃໝ່ດ້ວຍຄວາມເບີກບານມ່ວນຊື່ນ ເຊິ່ງກໍເປັນໜ້າທີ່ຂອງໝົດທຸກຄົນ.
ພ້ອມນີ້ ທ່ານໄດ້ຮຽກຮ້ອງໃຫ້ທຸກຄົນຄວນເອົາໃຈໃສ່ ເມື່ອໄດ້ດື່ມສິ່ງມຶນເມົາແລ້ວ ຫ້າມຂັບຂີ່ຢ່າງເດັດຂາດ; ຫ້າມໃຊ້ຄວາມໄວເກີນກໍານົດ ແລະ ຕ້ອງຮັກສາໄລຍະຫ່າງໃຫ້ເໝາະສົມກັບຄວາມໄວທີ່ກໍາລັງໃຊ້ຢູ່; ກ່ອນຈະປ່ຽນທິດທາງການສັນຈອນທຸກຄັ້ງຕ້ອງເປີດໄຟລ້ຽວກ່ອນ ແລະ ຮັບປະກັນຄວາມປອດໄພ; ກ່ອນຈະຊີງລົດຄັນອື່ນໄປຂ້າງໜ້າ ຕ້ອງຮັບປະກັນຄວາມປອດໄພ ແລະ ຜູ້ຂັບຂີ່ລົດທຸກຄົນໃຫ້ພະຍາຍາມແນບເຂົ້າແຄມທາງກໍ້າຂວາມືຂອງຕົນໃຫ້ຫຼາຍເທົ່າທີ່ຈະຫຼາຍເທົ່າທີ່ເປັນໄປໄດ້ຢູ່ສະເໝີ.
ຂ່າວ-ພາບ: ຄໍາກອງ ກິດຕິຄຸນ
