ງານລ້ຽງຕ້ອນຮັບ ກອງປະຊຸມບັນດາເຈົ້າຄອງນະຄອນຫຼວງອາຊຽນ ແລະ ກອງປະຊຸມເວທີເຈົ້ານະຄອນອາຊຽນ ໄດ້ຈັດຂຶ້ນໃນຄໍ່າຄືນວັນທີ 18 ກັນຍາຜ່ານມາ ທີ່ນະຄອນຫຼວງວຽງຈັນ (ນວ) ໂດຍມີທ່ານ ອາດສະພັງທອງ ສີພັນດອນ ເຈົ້າຄອງ ນວ, ມີບັນດາທ່ານເຈົ້າຄອງນະຄອນຫຼວງອາຊຽນ, ບັນດາທ່ານເຈົ້າ ແຂວງ-ເຈົ້ານະຄອນ, ເຈົ້າເມືອງຂອງປະເທດສະມາຊິກອາຊຽນ, ຜູ້ຕາງໜ້າຈາກນະຄອນຫຼວງດີລີ ຂອງຕີມໍ ແລັດສະເຕ, ບັນດາຮອງລັດຖະມົນຕີ ຂອງ ສປປ ລາວ, ບັນດາທ່ານເອກອັກຄະລັດຖະ ທູດວິສາມັນຜູ້ມີອຳນາດເຕັມຂອງບັນດາປະເທດອາຊຽນ, ມີເລຂາທິການໃຫຍ່ອາຊຽນ, ມີປະທານອົງການ,ເລຂາທິການຂອງອົງການຕົວເມືອງ ແລະ ອົງການ ປກຄອງທ້ອງຖິ່ນໃນພາກພື້ນອາຊີ-ປາຊີຟິກ, ຜູ້ແທນຂັ້ນສູງ ຂອງເຄື່ອຂ່າຍບັນດານະຄອນອາຊີຕາເວັນອອກສ່ຽງໃຕ້ຂອງ ສະມາຄົມບັນດາເຈົ້າຄອງນະຄອນທີ່ນໍາໃຊ້ພາສາຝຣັ່ງ, ພ້ອມດ້ວຍແຂກຖືກເຊີນເຂົ້າຮ່ວມ.
ໂອກາດນີ້, ທ່ານ ອາດສະພັງທອງ ສີພັນດອນ ໄດ້ກ່າວມີຄຳເຫັນຕ້ອນຮັບ ແລະ ຊົມເຊີຍບັນດາຜູ້ແທນທີ່ເດີນທາງມາເຂົ້າຮ່ວມກອງປະຊຸມໃນຄັ້ງນີ້. ງານລ້ຽງໃນມື້ນີ້ເປັນມື້ທີ່ມີຄວາມໝາຍສໍາ ຄັນຢ່າງຍິ່ງ ແລະ ສ້າງຄວາມຊົງຈຳ ທີ່ດີງາມໃຫ້ແກ່ປະຊາຊົນລາວ ໂດຍສະເພາະແມ່ນປະຊາຊົນຊາວ ນວ. ພ້ອມລາຍງານວ່າ: ກອງປະຊຸມໃນຄັ້ງນີ້, ຈັດຂຶ້ນໃນທາມກາງການກະ ກຽມເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ຢູ່ ນະຄອນຫຼວງວຽງຈັນ ທີ່ຈະໝູນວຽນມາເຖິງໃນມໍ່ໆນີ້. ກອງປະຊຸມບັນດາເຈົ້າຄອງນະຄອນຫຼວງອາຊຽນ ແລະ ກອງປະຊຸມເວທີເຈົ້ານະຄອນອາຊຽນໃນຄັ້ງນີ້ ໄດ້ປິ່ນອ້ອມຄໍາຂວັນ “ເພີ່ມທະວີການ ເຊື່ອມຈອດ ແລະ ຄວາມເຂັ້ມແຂງຂອງອາຊຽນ” ໂດຍຜ່ານການປຶກສາຫາລືກ່ຽວກັບ 5 ຫົວຂໍ້ຕົ້ນຕໍຄື: ການທ່ອງ ທ່ຽວສີຂຽວ, ການພັດທະນາເສດຖະກິດແບບຍືນຍົງ, ຕົວເມືອງທີ່ໜ້າຢູ່ ແລະ ຍືນຍົງ, ຕົວເມືອງທີ່ມີຄວາມຍືນຍົງດ້ານສິ່ງແວດ ລ້ອມ ແລະ ຄວາມເຂັ້ມແຂງທົນທານຕໍ່ການປ່ຽນແປງດິນຟ້າ ອາກາດ. ໄລຍະການດໍາເນີນກອງປະຊຸມໃນຄັ້ງນີ້, ຈະໄດ້ສົນທະນາ ແລະ ແລກປ່ຽນປະສົບການ ຊຶ່ງກັນ ແລະ ກັນ, ພ້ອມກັນນີ້, ກອງປະຊຸມຍັງຈະໄດ້ຄົ້ນຄວ້າວິທີການ ແລະ ແນວທາງຂອງອາຊຽນ ໃນການພັດທະນາການຂະຫຍາຍຕົວຢ່າງສະເໝີພາບ ເພື່ອບັນລຸຄວາມເຫັນດີເຫັນພ້ອມໃນການຮັບຮອງເອົາຖະແຫຼງການວຽງຈັນ ປີ 2024 ຊຶ່ງກວມເອົາ 5 ບັນຫາຂອງການຮ່ວມມື.
ນອກຈາກນັ້ນ, ກໍໄດ້ຊົມງານວາງສະແດງສິນຄ້າ, ເຂົ້າຮ່ວມພິທີເປີດສັນຍາລັກດົນຕີນະຄອນຫຼວງອາຊຽນ ແລະ ກິດຈະກຳປູກຕົ້ນໄມ້ນະຄອນຫຼວງອາຊຽນ. ພາຍຫຼັງສຳເລັດກອງປະຊຸມຄັ້ງນີ້, ບັນດາຜູ້ແທນຈະໄດ້ໄປທັດສະນະສຶກສາ ແລະ ຢ້ຽມຢາມສະຖານທີ່ສໍາຄັນຕ່າງໆ ຢູ່ ນວ.
ງານລ້ຽງຄັ້ງນີ້, ບັນດາຜູ້ເຂົ້າຮ່ວມ ໄດ້ມ່ວນຊື່ນຮັບຊົມກັບການສະແດງສິນລະປະວັດທະນະທໍາ ຂອງລາວ ແລະ ອື່ນໆ ເຮັດໃຫ້ສ້າງຄວາມມ່ວນຊື່ນ ແລະ ປະທັບໃຈໃຫ້ແກ່ຜູ້ເຂົ້າຮ່ວມເປັນຢ່າງດີ. ງານລ້ຽງຄໍ່າຄືນນີ້, ຊ່ວຍໃຫ້ບັນດາທ່ານເຂົ້າໃຈເຖິງວັດທະນະທໍາລາວໄດ້ຢ່າງເລິກເຊິ່ງ. ພ້ອມກັນນັ້ນ, ກໍເປັນວິທີການໜຶ່ງ ເພື່ອໃຫ້ວັດທະນະທໍາຂອງບັນດາປະເທດອາຊຽນ ໄດ້ມີການເຊື່ອມໂຍງເຂົ້າກັນຢ່າງກົມກຽວ.
