ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ນວ ເຂັ້ມງວດຄຸ້ມຄອງສິນຄ້າໃນໂອກາດປີໃຫມ່ລາວ
ພະແນກອຸດສາຫະກຳແລະການຄ້າ ນະຄອນຫລວງວຽງຈັນ (ນວ) ເອົາໃຈໃສ່ຄຸ້ມຄອງກວດກາລາຄາສິນຄ້າ ໂດຍເນັ້ນໃຫ້ບັນດາຊາວຄ້າຂາຍຕາມຕະຫລາດໃນນະຄອນຫລວງວຽງຈັນ ຫ້າມກັກຕຸນລາຄາສິນຄ້າ ແລະ ສວຍໂອກາດຂຶ້ນລາຄາສິນຄ້າຕາມລໍາພັງ ໃຈໃນໄລຍະສະເຫລີມສະຫລອງບຸນປີໃຫມ່ລາວປີນີ້.
ທ່ານ ນາງ ໄຊນາລອນ ຈຸນດາຣາ ຮອງຫົວຫນ້າພະແນກອຸດ ສາຫະກຳແລະການຄ້າ ນະຄອນຫລວງວຽງຈັນ ໃຫ້ສໍາພາດວ່າ: ເພື່ອຄຸ້ມຄອງລາຄາສິນຄ້າເຂົ້າສູ່ລະບຽບກົດຫມາຍບົນພື້ນຖານກົນໄກເສດຖະກິດຕະຫລາດທີ່ມີການຄຸ້ມຄອງ ແລະ ດັດສົມຂອງລັດ ພ້ອມທັງບໍ່ໃຫ້ຜູ້ປະກອບການສວຍໂອກາດຂຶ້ນລາຄາສິນຄ້າຕາມລຳພັງໃຈ ເຊິ່ງເປັນການເອົາລັດເອົາປຽບຜູ້ບໍລິໂພກໃນໄລຍະບຸນປີໃຫມ່ລາວ ໄດ້ແຕ່ງຕັ້ງຫນ່ວຍງານວິຊາສະເພາະເຄື່ອນໄຫວສົມທົບກັບຫ້ອງການອຸດສາຫະກຳແລະການຄ້າ 9 ຕົວເມືອງເພື່ອຕິດຕາມຄຸ້ມຄອງລາຄາສິນຄ້ສ, ພ້ອມທັງໄດ້ແຈ້ງການໃຫ້ບັນດາຜູ້ປະກອບການ, ຊາວຄ້າຂາຍໃຫ້ນໍາສິນຄ້າອອກມາຈໍາຫນ່າຍໃນລາຄາປົກກະຕິ, ຫ້າມກັກຕຸນສິນຄ້າ ຫລື ສວຍໂອກາດຂຶ້ນລາຄາຕາມລໍາພັງໃຈ, ສິນຄ້າທີ່ນໍາມາວາງຈໍາຫນ່າຍຕ້ອງຮັບປະກັນດ້ານຄຸນນະພາບ ແລະ ໃຫ້ຕິດຕາມສິນຄ້າເປັນເງິນກີບ, ບໍ່ໃຫ້ນໍາເອົາສິນຄ້າເສຍຄຸນຫລືຫມົດອາຍຸແລະບໍ່ໄດ້ຕິດສະຫລາກເປັນພາສາລາວມາວາງຈໍາຫນ່າຍ, ຖ້າລະເມີດທາງຫນ່ວຍງານກ່ຽວຂ້ອງຈະປະຕິບັດຕາມລະບຽບກົດຫມາຍ.
ທ່ານ ນາງ ໄຊນາລອນ ຈຸນດາຣາ ໃຫ້ຮູ້ຕື່ມວ່າ: ພາກສ່ວນກ່ຽວຂ້ອງໄດ້ເຄື່ອນໄຫວຕາມກວດກາສິນຄ້າເລີ່ມແຕ່ວັນທີ 11 ເມສານີ້ແລະຈະສືບຕໍ່ຕິດຕາມກວດກາຈົນ ຮອດວັນທີ 18 ເມສານີ້, ພ້ອມນີ້ທ່ານຮຽກຮ້ອງໃຫ້ປະຊາຊົນຊາວນະຄອນຫລວງວຽງ ຈັນຈົ່ງພ້ອມກັນເປັນ ເຈົ້າການຫລິ້ນບຸນປີໃຫມ່ປີນີ້ບົນພື້ນຖານປະຢັດມັດທະຍັດແລະຊົມໃຊ້ຜະລິດຕະພັນພາຍໃນເພື່ອ ສົ່ງເສີມຊາວກະສິກອນຜະລິດພາຍໃນເປັນສິນຄ້າທົດແທນການນໍາເຂົ້າ, ຖ້າພົບເຫັນການສວຍໂອກາດ ຂື້ນລາຄາຕາມລໍາພັງ ໃຈສາມາດໂທແຈ້ງສາຍດ່ວນຂອງພາກສ່ວນກ່ຽວຂ້ອງໄດ້ທີ່ເບີ 1510.