ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນອກຈາກເຝົ້າລະວັງໂຄວິດ19ແລ້ວ ສາທາລະນະສຸກຍັງເຝົ້າລະວັງພະຍາດໄຂ້ເລືອດອອກໄປພ້ອມກັນ

ມາຮອດປັດຈຸບັນ, ລັດຖະບານກໍ່ຄືຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ສືບຕໍ່ຕິດຕາມຜູ້ທີ່ຖືກຈໍາກັດບໍລິເວນຢູ່ສະຖານທີ່ ທີ່ກໍານົດໄວ້ໃນຂອບເຂດທົ່ວປະເທດທັງໝົດ 70 ສູນ ແລະ ມີຜູ້ຈໍາກັດບໍລິເວນຢູ່ສູນທັງໝົດ 3.313 ຄົນ, ໄດ້ເກັບຕົວຢ່າງມາກວດວິເຄາະທັງໝົດແຕ່ບໍ່ພົບຜູ້ຕິດເຊື້ອໃໝ່

ໃນໂອກາດຖະແຫລງຂ່າວກ່ຽວກັບສະພາບການລະບາດຂອງພະຍາດໂຄວິດ-19 ໃນວັນທີ 3 ກໍລະກົດນີ້ ທີ່ກະຊວງສາທາລະນະສຸກ ດຣ ນາງ ພອນປະເສີດ ໄຊຍະມຸງຄຸນ, ຮອງຫົວໜ້າກົມຄວບຄຸມພຍາດຕິດຕໍ່ ກະຊວງສາທາລະນະສຸກຖະແຫລງຂ່າວໃນວັນທີ17 ກໍລະກົດນີ້ ທີ່ກະຊວງສາທາລະນະສຸກໃຫ້ຮູ້ວ່າ: ໃນວັນທີ 16 ກໍລະກົດນີ້ ໄດ້ເກັບຕົວຢ່າງມາກວດວິເຄາະທັງໝົດ 591 ຄົນ, ໃນນັ້ນແຮງງານລາວກັບມາແຕ່ໄທ 505 ຄົນ, ແຮງງານຈີນ 70 ຄົນ ແລະ ກໍລະນີສົງໄສ 16 ຄົນ ເຊຶ່ງຜົນກວດທັງໝົດແມ່ນບໍ່ພົບເຊື້ອພະຍາດໂຄວິດ-19 ໃໝ່, ສັງລວມແລ້ວການກວດວິເຄາະແຕ່ເດືອນມັງກອນຮອດວັນທີ 16 ກໍລະກົດນີ້ ໄດ້ເກັບຕົວຢ່າງມາກວດທັງໝົດ 22.355 ຕົວຢ່າງ, ກວດພົບເຊື້ອສະສົມພຽງ 19 ຄົນເທົ່ານັ້ນ.

ຮອງຫົວໜ້າກົມຄວບຄຸມພຍາດຕິດຕໍ່ ກະຊວງສາທາລະນະສຸກໃຫ້ຮູ້ຕື່ມວ່າ: ສໍາຫລັບການຕິດຕາມຜູ້ເດີນທາງເຂົ້າມາ ສປປ ລາວ ຈາກຈຸດຜ່ານແດນຕ່າງໆໃນຂອບເຂດທົ່ວປະເທດມີທັງໝົດ 1 .951 ຄົນ, ໃນນັ້ນ ຈຸດຜ່ານດ່ນລາວ-ໄທ 1.346 ຄົນ ເປັນແຮງງານລາວກັບມາແຕ່ໄທ 170 ຄົນ, ຈຸດຜ່ານແດນລາວ-ຈີນ 25 ຄົນ. ໃນນີ້ ມີແຮງງານລາວ 1 ຄົນ ແລະ ຈີນ 6 ຄົນຜ່ານດ່ານບໍ່ເຕັນ ແຂວງຫລວງນໍ້າທາ ເຫລືອນັ້ນແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ, ຈຸດຜ່ານດ່ານລາວ-ຫວຽດນາມ 580 ຄົນ. ໃນນີ້ ມີນັກສຶກສາລາວ 2 ຄົນ ຜ່ານດ່ານແດນສະຫວັນ, ແຂວງສະຫວັນນະເຂດ, ເຫລືອນັ້ນແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ, ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ແລ້ວນໍາສົ່ງໄປສະຖານທີ່ຈໍາກັດບໍລິເວນທີ່ກໍານົດໄວ້ຈົນກວ່າຈະຄົບກໍານົດ 14 ວັນ.%

ດຣ ນາງ ພອນປະເສີດ ໄຊຍະມຸງຄຸນ ໃຫ້ຮູ້ເຖິງສະພາບການລະບາດຂອງພະຍາດໄຂ້ເລືອດອອກວ່າ: ນັບແຕ່ວັນທີ 1 ມັງກອນ ຫາ ວັນທີ 16 ກໍລະກົດນີ້ ມີຜູ້ຕິດເຊື້ອພະຍາດໄຂ້ເລືອດອອກທັງໝົດ 3. 257 ຄົນ ກວມເອົາ 17 ແຂວງ, ແຂວງທີ່ມີການລະບາດຫລາຍກວ່າໝູ່ແມ່ນນະຄອນ ຫລວງວຽງຈັນ ມີຜູ້ຕິດເຊື້ອໄຂ້ເລືອດອອກ 694 ຄົນ, ແຂວງວຽງຈັນ 405 ຄົນ, ບໍລິຄໍາໄຊ 369 ຄົນ ແລະ ແຂວງອັດຕະປື 352 ຄົນ, ຈໍານວນຜູ້ເສຍຊີວິດທັງໝົດ 8 ຄົນ. ໃນນີ້ ນະຄອນຫລວງວຽງຈັນ 3 ຄົນ, ບໍລິຄໍາໄຊ  2 ຄົນ ແລະ ແຂວງຄໍາມ່ວນ ໄຊຍະບູລີ ແລະ ແຂວງຊຽງຂວາງແຂວງລະ 1 ຄົນ

ປະຈຸບັນ ກະຊວງສາທາລະນະສຸກໄດ້ເນັ້ນໜັກໃຫ້ຂະແໜງສາທາຮ່ວມກັບທຸກພາກສ່ວນສຸມໃສ່ຕິດຕາມເຝົ້າລະວັງສະພາບການລະບາດ ພ້ອມທັງລາຍງານປະຈໍາວັນສະພາບການເກີດພະຍາດໄຂ້ເລືອດອອກຕາມຕານ່າງເຝົ້າລະວັງໃນຂອບເຂດທົ່ວປະເທດ ລວມທັງຄວບຄຸມພາຫະນະການນໍາເຊື້ອພະຍາດຈາກຍຸງລາຍ, ນອກນີ້ ຍັງໄດ້ເຄື່ອນໄຫວຈັດກິດຈະກໍາຕ່າງໆ ເປັນຕົ້ນເຮັດສຸຂະສຶກສາໃຫ້ຄວາມຮູ້ແກ່ປະຊາຊົນ, ສໍາຫລວດຄວາມໜາແໜ້ນຂອງໜອນນໍ້າ  ແລະ  ພົ່ນຢາ ແລະ ແຈກຢາຍຢາຂ້າໜອນນໍ້າ ເພື່ອທໍາລາຍແຫລ່ງເພາະພັນຂອງຍຸງລາຍທີ່ໄປໄຂ່ໃສ່