ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ນະຄອນປາກເຊ ເປີດຂະ ບວນ ການ ອະນາໄມຄັ້ງໃຫຍ່ ຫຼັງນ້ຳບົກແຫ້ງລົງ

ຫຼັງ​ຈາກ​ທີ່​ນ້ຳ​ບົກ​ແຫ້ງ​ລົງ, ການ​ນຳ​ແຂວງ​ຈຳ​ປາ​ສັກ ຮ່ວມ​ກັບ​ນະ​ຄອນ​ປາກ​ເຊ ລະ​ດົມ​ທຸກ​ພາກ​ສ່ວນ​ໃນ​ສັງ​ຄົມ ເປີດ​ຂະ​ບວນ​ການອະ​ນາ​ໄມ 10 ບ້ານ​ເທ​ສະ​ບານ​ ນະ​ຄອ​ນປາກ​ເຊ ເພື່ອ​ໃຫ້​ນະ​ຄອນ​ແຫ່ງ​ນີ້ ມີຄວາມ​ສະ​ອາດ​ງາມ​ຕາ​ເໝືອນ​ດັ່ງ​ທີ່​ຜ່ານ​ມາ. ໃນ​ຂະ​ນະ​ທີ່​ອີກ 24 ບ້ານ​ທີ່​ຖືກ​ນ້ຳ​ຖ້ວມ ໄດ້​ມອບ​ໃຫ້​ອຳ​ນາດ​ການ​ປົກ​ຄອງ​ບ້ານ​ນຳ​ພາ​ປະ​ຊາ​ຊົນ​ອະ​ນາ​ໄມ.

      ພິ​ທີ​ເປີດ​ຂະ​ບວນ​ການ​ດັ່ງ​ກ່າວໄດ້​ມີ​ຂຶ້ນ​ໃນ​ວັນ​ທີ 11 ກັນ​ຍາ​ນີ້ ໂດຍ​ມີ​ທ່ານ ບຸນ​ຖອງ ດີ​ວິ​ໄຊ ເຈົ້າ​ແຂວງ​ຈຳ​ປາ​ສັກ, ມີ​ການ​ນຳ​ຂອງ​ແຂວງ, ນະ​ຄອນ​ປາກ​ເຊ, ​ພະ​ນັກ​ງານ​, ທະ​ຫານ ຕຳຫຼວດ, ຕະຫຼອດ​ຮອດ​ນັກ​ຮຽນ​ນັກ​ສຶກ​ສາ ແລະ ປະ​ຊາ​ຊົນ​ເຂົ້າ​ຮ່ວມ.

​ນ້ຳ​ຖ້ວມ​ນະ​ຄອນ​ປາກ​ເຊຄັ້ງ​ນີ້, ເປັນ​ຄັ້ງ​ຮ້າຍ​ແຮງ​ທີ່​ສຸດ​ໃນ​ຮອບ 41 ປີ ຊຶ່ງ​ນ້ຳ​ໄດ້​ຍື່ງ​ຂຶ້ນ​ຖ້ວມ 34 ບ້ານ​, ​ມີ​ປະ​ຊາ​ຊົນຈຳ​ນວນ 5.573 ຄອບ​ຄົວ, 32 ພັນ​ກວ່າ​ຄົນ​ໄດ້​ຮັບ​ຜົນ​ກະ​ທົບ, ມາ​ຮອດ​ວັນ​ທີ 11 ກັນ​ຍາ, ບັນ​ດາ​ບ້ານ​ທີ່​ຖືກ​ນ້ຳ​ຖ້ວມ​ໄດ້​ບົກ​ແຫ້ງ​ລົງ​ເກືອບ​ທັງ​ໝົດ​ແລ້ວ, ຍັງ​ເຫຼືອ​ພຽງ​ແຕ່​ບາງ​ຈຸດ​ທີ່​ເປັນ​ພື້ນ​ທີ່​ຕ່ຳ ​ນ້ຳ​ຍັງ​ຖ້ວມ​ຂັງ, ໃນ​ຂະ​ນະ​ທີ່​ບ້ານ​ປາກ​ຫ້ວຍ​ເດື່ອ ຊຶ່ງ​ຕິດ​ກັບ​ບ້ານ​ປາກ​ເຊ, ຍັງ​ມີ​ນ້ຳ​ຖ້ວມ​ຂັງ​ເປັນ​ບໍ​ລິ​ເວນກວ້າງ​ພໍ​ສົມ​ຄວນ ແຕ່​ພາກ​ສ່ວນ​ກ່ຽວ​ຂ້ອງ​ໄດ້​ໃຊ້​ຈັກ​ສູບ​ນ້ຳ ເພື່ອ​ສູບ​ນ້ຳ​ອອກ ຊຶ່ງ​ຄາດ​ວ່າ ບໍ່​ພໍ​ເທົ່າ​ໃດ​ມື້​ຂ້າງ​ໜ້າ​ນີ້ ນ້ຳ​ຈະ​ບົກ​ແຫ້ງ ແລະ ກັບ​ເຂົ້າ​ສູ່​ສະ​ພາບ​ປົກ​ະ​ຕິ​.

      ທ່ານ ສຸ​ລິ​ວັນ ສະ​ຫວັດ​ທະ​ສິນ ເຈົ້າ​ນະ​ຄອນ​ປາກ​ເຊ ກ່າວ​ວ່າ: ການ​ສ້າງ​ຂະ​ບວນ​ການ​ອະ​ນາ​ໄມ​ເທ​ສະ​ບານ​ນະ​ຄອນ​ປາກ​ເຊ​ຄັ້ງ​ນີ້ ເພື່ອ​ເຮັດ​ໃຫ້​ນະ​ຄອນ​ແຫ່ງ​ນີ້​ມີ​ຄວາມ​ສະ​ອາ​ເສວຍ​ງາມ​ຄື​ກັບ​ກ່ອນ​ເກີດ​ນ້ຳ​ຖ້ວມ ໂດຍເລັ່ງ​ໃສ່ 10 ບ້ານ​ໃນ​ເທ​ສະ​ບານ​ນະ​ຄອນ​ປາກ​ເຊ ​ປະ​ກອບ​ມີ: ບ້ານ​ໂພນ​ໄຊ, ຫຼັກ​ເມືອງ, ທ່າຫຼວງ, ປາກ​ເຊ, ບ້ານ​ທົ່ງ, ໂພນ​ກຸງ, ພະ​ບາດ, ໂພນ​ສະ​ຫ​ວັນ, ຮ່ອມ​ຂະ​ຍອມ ແລະ ບ້ານ​ສາງ​ນ້ຳ​ມັນ ໂດຍ​ໄດ້​ແບ່ງ​ອອກ​ເປັນ 5 ຈຸ, ແຕ່​ລະ​ຈຸ​ຮັບ​ຜິດ​ຊອບ 2 ບ້ານ, ນອກ​ຈາກ​ໃຊ້​ແຮງ​ງານ​ຄົນ​ຊ້ວນ ແລະ ປາກກວາດ​ຂີ້​ເຫ​ບື້ອ​ແລ້ວ, ຍັງ​ມີ​ລົດ​ຕັກ, ລົດ​ລ່າມ, ລົດ​ຍູ ແລະ ລົດ​ດັບ​ເພີງ ເຂົ້າ​ຊ່ວຍ, ທັງ​ນີ້​ກໍ​ເພື່ອ​ເຮັດ​ໃຫ້​ນະ​ຄອນ​ປາກ​ເຊ ກັບ​ມາ​ມີ​ຄວາມ​ສະ​ອາດ​ສວ​ຍ​ງາມ​​ເໝືອນ​ກັບ​ກ່ອນ​ນ້ຳ​ຖ້ວມ.

      ທ່ານ ກ່າວ​ອີກວ່າ: ນອກ​ຈາກ 10 ບ້ານ​ ຊຶ່ງ​ເປັນ​ຈຸດ​ໃຈ​ກາງ​ຂອງ​ນະ​ຄອນ​ປາກ​ເຊ​ນີ້​ແລ້ວ, ອີກ​ຈຳ​ນວນ​ບ້ານ​ທີ່​ເຫຼືອ ຊຶ່ງ​ຖື​ວ່າ​ບໍ່​ເປິ​ະ​ເປື້ອນຫຼາຍ ​ແມ່ນໄດ້ມອບ​ໃຫ້​ຄະ​ນະ​ພັກ​ທີ່​ຊີ້​ນຳ​ກຸ່ມ​ບ້ານ ສົມ​ທົບ​ກັບ​ອຳ​ນາດ​ການ​ປົກ​ຄອງ​ບ້ານ ແລະ ປະ​ຊາ​ຊົນ​ເຮັດ​ອະ​ນາ​ໄມ.