ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ໃຫ້ສຳພາດໃນອາທິດຜ່ານມານີ້ວ່າ: ພາຍຫຼັງພັກ-ລັດຖະບານ ໄດ້ມີນະໂຍບາຍການອະນຸລັກສັດນໍ້າປະເພດຕ່າງໆທີ່ໄດ້ລະບຸໃນກົດໝາຍວ່າດ້ວຍສັດນໍ້າ ແລະ ການປະມົງ ໄດ້ມີດຳລັດປະກາດໃຊ້ຢ່າງເປັນທາງການ ໃນໄລຍະຜ່ານມາ ນະຄອນຫຼວງວຽງຈັນ ກໍໄດ້ເອົາໃຈໃສ່ໃນວັນປ່ອຍປາ ແລະ ສັດນໍ້າແຫ່ງຊາດ ນັບແຕ່ປີ 1994 ຮອດປີ 2023 ຕົວເລກການ ປ່ອຍປາ ແລະ ສັດນໍ້າອື່ນໆ ບັນລຸເຖິງ 31 ລ້ານກວ່າໂຕ ໃນນັ້ນ ສັດນໍ້າຊະນິດອື່ນໆ 600 ກວ່າໂຕ ສະເພາະປີ 2024 ທົ່ວ ນະຄອນຫຼວງວຽງຈັນ ຄາດວ່າຈະປ່ອຍປາ ແລະ ສັດນໍ້າອື່ນໆໃຫ້ໄດ້ປະມານ 9 ລ້ານກວ່າໂຕ, ຢູ່ໃນ 9 ຕົວເມືອງໃຫ້ໄດ້ປະມານ 5 ແສນກວ່າໂຕ ແລະ ປ່ອຍຕາມຊຸມຊົນຕ່າງໆ 8 ລ້ານກວ່າໂຕ.
ໃນວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ 2024 ນີ້ ຈະຈັດຂຶ້ນພິທີການປ່ອຍປາຂຶ້ນຢູ່ບ້ານຮ່ອງສຸພາບ ເມືອງໄຊເສດຖາ ໂດຍຈະປ່ອຍ 400.000 ໂຕ ເນັ້ນໃສ່ແນວພັນປາພື້ນເມືອງເຊັ່ນ : ປາປາກ, ປາເໝັ້ນ, ປາເຄີງ, ປາສະຫຼິດ, ປາເຂັງ, ປາກົດ ແລະ ປາເພັ້ຍ. ຖ້າທຽບໃສ່ປີ 2023 ເພີ່ມຂຶ້ນ 80.000 ໂຕ.
ໂອກາດນີ້ທ່ານກໍໄດ້ຮຽກຮ້ອງມາຍັງພະນັກງານ ລັດຖະກອນ ທະຫານ ຕໍາຫຼວດ ນັກທຸລະກິດ ຊາວຄ້າຂາຍ ພໍ່-ແມ່ປະຊາຊົນກໍຄືຊາວນະຄອນຫຼວງວຽງຈັນ ຈົ່ງພ້ອມກັນປະຕິບັດກົດໝາຍວ່າດ້ວຍສັດນໍ້າ ແລະ ການປະມົງໃຫ້ປະກົດຜົນເປັນຈິງ ຈົ່ງພ້ອມກັນປະກອບສ່ວນເຂົ້າໃນການປ່ອຍປາໃນວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ ເກີດດອກອອກຜົນຕາມແຜນການທີ່ວາງໄວ້ ພ້ອມກັນນັ້ນຈົ່ງພ້ອມກັນເຊີດຊູສະຕິ ໃນການຄຸ້ມຄອງ, ກວດກາ, ອະນຸລັກ, ພັດທະນາ, ນໍາໃຊ້ປາ ແລະ ສັດນໍ້າແບບຍືນຍົງ ແນໃສ່ຮັບປະກັນຄວາມອຸດົມສົມບູນຂອງລະບົບນິເວດທໍາມະຊາດ.