ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນະຄອນຫລວງວຽງຈັນ ຈັດພິທີປ່ອຍປາລົງບຶງທາດຫລວງ 180.000ໂຕ

ພະ​ແນກ​ກະ​ສິ​ກຳ​ແລະ​ປ່າ​ໄມ້​ນ​ະ​ຄອນ​ຫຼວງວຽງ​ຈັນ​ສົມ​ທົບ​ກັບ​ ​ເມືອງ​ສີ​ສັດ​ຕະ​ນາກ​, ກົມລ້ຽງສັດແລະການປະມົງ ຈັດ​ພິ​ທີ​ປ່ອຍ​ປາ ເນືຶ່ອງ​ໃນ​ໂອ​ກາດ​ວັນປ່ອຍ​ປາ ແລະ ​ອະ​ນຸ​ລັກ​ສັດ​ນ້ຳ​ສັດ​ປາແຫ່ງ​ຊາດ​ວັນ​ທີ 13 ກໍ​ລະ​ກົດ ປີນີ້ຈັດ​ຂື້ນ​ໃນ​ຕອນ​ເຊົ້າ​ວັນທີ  13 ກໍລະກົດ 2020. ທີ່​​ບໍລິເວນຂົວ​ບຶງ​ທາດ​ຫຼວງ ບ້ານດອນກອຍ  ເມືອງ​ສີ​ສັດ​ຕະ​ນາກ ນະຄອນຫລວງວຽງຈັນ, ມີ​ທ່ານ ຄຳ​ບຸນ​ນັດ ໄຊ​ຍະ​ນົນ ຮອງ​ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ​ແລະ​ປ່າ​ໄມ້ , ທ່ານເດດສົງຄາມ ທໍາມະວົງ ເຈົ້າເມືອງສີສັດຕະນາກ ຕະ​ຫຼອດ​ຮອດ​ພາກ​ສ່ວນ​ກ່ຽວ​ຂ້ອງ​ ແລະປະຊາຊົນບ້ານໃກ້ຄຽງເຂົ້າ​ຮ່ວມ .

​ ປາ​ທີ່​ນຳ​ມາ​ປ່ອຍ​ໃນ​ຄັ້ງ​ນີ້​ ມີ​ປາກິນຫຍ້າ, ປາປາກ, ແລະປາທຳມະຊາດ ຈຳ​ນວນ 180.000​ໂຕ,  ເຕົ່າ, ນົກ ແລະ ສັດອື່ນໆອີກຈຳນວນໜຶ່ງ. ສຳລັບປີ 2020 ນີ້ ນະຄອນຫຼວງວຽງຈັນຈະສືບເປີດຂະບວນການສະເຫຼີ່ມສະຫຼອງວັນປ່ອຍປາ ແລະ ອະນຸລັກສັດນໍ້າສັດປ່າ ແຫ່ງຊາດ 13 ກໍລະກົດ ຊຶ່ງທັງເປັນວັນຄ້າຍວັນເກີດຂອງ ປະທານ ສຸພານຸວົງ ຄົບຮອບ 111 ປີ ໃຫ້ເປັນຂະບວນຟົດຟື້ນ ໂດຍໃຫ້ບັນດາເມືອງ ແລະ ອົງການປົກຄອງບ້ານ ປ່ອຍປາຄືນສູ່ທຳມະຊາດ ແລະວັງສະຫງວນໃຫ້ໄດ້ 12​ ແຫ່ງ, ຄາດວ່າຈະປ່ອຍປາຄືນສູ່ທຳມະຊາດ ໃຫ້ໄດ້ 1 ລ້ານໂຕ, ຜະລິດປານ້ອຍ 30 ລ້ານໂຕ, ປ່ອຍປາລົງ ໜອງ ແລະກະຊັງ 150 ລ້ານໂຕ ເພື່ອເປັນສະບຽງອາຫານ ແລະ ເປັນສິນຄ້າ. ພ້ອມກັນນີ້ ຈະສືບຕໍ່ເຜີຍແຜ່ຄຳສັງ ຫ້າມຈັບ, ຫ້າມຊື້-ຂາຍ, ບໍ່ລ່າ ສັດນໍ້າ-ສັດປ່າ ໂດຍສະເພາະ ປະເພດຫວງຫ້າມ ແລະ ປະເພດຄຸ້ມຄອງ;​ ບໍ່ຫາປາໃນລະດູວາງໄຂ ຫຼື ໄລຍະເຂົ້າພັນສາ;  ບໍ່ຕັນທາງເດີນຂອງປາຂື້ນວາງໄຂ ດ້ວຍວິທີເຮັດຕ້ອນເຮັດລີ່ ແລະ ອື່ນໆ ທີ່ເປັນການລະເມີດກົດໝາຍວ່າດ້ວຍສັດນໍ້າ ແລະ ສັດປ່າ ແລະ ກົດໝາຍວ່າດວ້ຍການປະມົງ.

ຕາມການລາຍງານ ຂອງຄະນະກຳການແມ່ນໍ້າຂອງສາກົນ ແລະ ສະຖາບັນຄົ້ນຄວ້າ ຂອງ ສປປ ລາວ , ສປປ ລາວ ມີປາທຳມະຊາດ ຫຼາຍກ່ວາ 481 ຊະນິດ, ສັດເຄີ່ງບົກ-ເຄິງນໍ້າ 37 ຊະນິດ, ກະປູ 7 ຊະນິດ, ກຸ້ງ 10 ຊະນິດ. ຕາມການຄົ້ນຄວ້າ ຂອງສູນຄົ້ນຄວ້າການປະມົງ ເຫັນວ່າມີ 24 ຊະນິດມີທ່າແຮງນຳໄປລ້ຽງເປັນສິນຄ້າ ແລະ ບັນດາສູນ/ສະຖານີຂອງລັດ ແລະ ຜູ້ປະກອບການ ໄດ້ເພາະລ້ຽງປາພື້ນເມືອງ 18 ຊະນິດ ແລະ ປາພັນ 9 ຊະນິດ ເພື່ອເປັນສິນຄ້າ.

ຕາມການປະເມີນຂອງຄະນະກຳມະການ ແມ່ນໍ້າຂອງສາກົນ ແລະ ກະຊວງກະສິກຳ ແລະ ປ່າໄມ້,  ສປປ ລາວ ມີຜົນຜະລິດປາທຳມະຊາດ 167.922 ໂຕນ/ປີ, ສັດນໍ້າອື່ນໆ ປະມານ 40.581 ໂຕນ/ປີ ແລະ ມີມູນຄ່າລວມຫຼາຍກ່ວາ 150 ລ້ານໂດລາ/ປີ, ປະຊາຊົນບັນດາເຜົາ ຢູ່ເຂດຊົນນະບົດຫຼາຍກວ່າ 75% ບໍລິໂພກປາ ແລະ ສັດນໍ້າປະພດຕ່າງໆ.