ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີສະເຫລີມສະຫລອງວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດຈັດຂຶ້ນຕອນເຊົ້າວັນທີ 14 ກໍລະກົດ 2023 ທີ່ບ້ານທ່າສະຫວ່າງ ເມືອງໄຊທານີ ນະຄອນຫຼວງວຽງຈັນ, ມີທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ລັດສະໂລ ຕາກັກ ກົງສູນຮົງກາລີປະຈໍາລາວ, ທ່ານ ໜູກິ ສີຫາລາດ ຮັກສາການ ເຈົ້າເມືອງໆໄຊທານີ, ພ້ອມດ້ວຍພາກສ່ວນກ່ຽວຂ້ອງອ້ອມຂ້າງກະຊວງ ກະສິກໍາ ແລະ ປ່າໄມ້, ນະຄອນຫຼວງວຽງຈັນ, ເມືອງໄຊທານີ ແລະ ແຂກຮັບເຊີນເຂົ້າຮ່ວມ
ທ່ານກາວີພອນ ພຸດທະວົງ ຫົວໜ້າກົມລ້ຽງສັດ ແລະການປະມົງ ກະຊວງກະສິກໍາ ແລະປ່າໄມ້ ກ່າວ່າ: ຕະຫຼອດໄລຍະເວລາທີ່ຜ່ານມາ ກະຊວງກະສິກຳ ແລະ ປ່າໄມ້ ໄດ້ສົມທົບກັບ ທຸກພາກສ່ວນ ທັງຂັ້ນສູນກາງ ແລະ ທ້ອງຖີ່ນ ໄດ້ໃຫ້ຄວາມສຳຄັນຕໍ່ວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ດ້ວຍການໂຄສະນາເຜີຍແຜ່ກົດໝາຍວ່າດ້ວຍການປະມົງ, ກົດໝາຍວ່າດ້ວຍສັດນໍ້າ ແລະ ສັດປ່າ ແລະ ບັນດານິຕິກຳຕ່າງໆ ຢ່າງກວ້າງຂວາງໃນຂອບເຂດທົ່ວປະເທດ ເພື່ອເຮັດໃຫ້ທຸກພາກສ່ວນ ໃນສັງຄົມໄດ້ເຂົ້າໃຈ ແລະ ເອົາໃຈໃສ່ຕໍ່ວຽກງານການພັດທະນາ, ການອະນຸລັກ, ການຄຸ້ມຄອງ ແລະ ນໍາໃຊ້ ສັດນໍ້າ-ສັດປ່າ ໃຫ້ມີຄວາມຍືນຍົງ ເພື່ອປະກອບສ່ວນເຂົ້າໃນການຮັບປະກັນສະບຽງ ອາຫານ ແລະ ໂພຊະນາການ ພ້ອມທັງຜະລິດເປັນສິນຄ້າ ເພື່ອສ້າງລາຍຮັບ ໃຫ້ປະຊາຊົນລາວໃຫ້ຫລາຍຂຶ້ນໄປເລື້ອຍໆ. ຈາກການປະກອບສ່ວນຄືດັ່ງກ່າວນັ້ນ ໄດ້ເຮັດໃຫ້ການພັດທະນາ, ການອະນຸລັກ, ການຄຸ້ມຄອງວຽກການປະມົງ, ສັດນໍ້າ-ສັດປ່າ ມີຫຼາຍດ້ານທີ່ພົ້ນເດັ່ນ ເປັນຕົ້ນ ໄດ້ເຮັດໃຫ້ຈໍານວນການປ່ອຍປາ ແລະ ສັດນໍ້າ ໃນແຕ່ລະປີ ໄດ້ເພີ່ມຂື້ນຕາມລໍາດັບຄື: ປີ 2020 ໄດ້ປ່ອຍປາ ແລະ ສັດນໍ້າ ຄືນສູ່ທຳມະຊາດໄດ້ 55 ລ້ານໂຕ, ປີ 2021 ໄດ້ 58 ລ້ານກ່ວາໂຕ, ປີ 2022 ໄດ້ 61 ລ້ານກ່ວາໂຕ, ປະຈຸບັນ ທົ່ວປະເທດ ມີສູນ, ສະຖານີ ຜະລິດລູກປາຂອງລັດ ຈຳນວນ 53 ແຫ່ງ, ຟາມຜະລິດລູກປາ ຂອງເອກະຊົນ ຫຼາຍກວ່າ 130 ແຫ່ງ ແລະ ການຜະລິດລູກປາ ແບບຄອບຄົວມີ 352 ແຫ່ງ ສາມາດສະໜອງແນວພັນປາ ໃຫ້ສັງຄົມໄດ້ໂດຍພື້ນຖານ.
ທ່ານກາວີພອນ ພຸດທະວົງ ໃຫ້ຮູ້ຕື່ມວ່າ: ປະເທດເຮົາມີປາພື້ນເມືອງ ໃນແຫຼ່ງນໍ້າທໍາມະຊາດຫຼາຍກວ່າ 500 ຊະນິດ, ເພື່ອອະນຸລັກ, ປົກປັກຮັກສາແຫຼ່ງທີ່ຢູ່ອາໄສຂອງປາ ແລະ ສັດນໍ້າ ກໍ່ໄດ້ມີການສ້າງວັງສະຫງວນ ຫຼາຍກວ່າ 1.000 ວັງ ມີຄະນະກຳມະການຄຸ້ມຄອງວັງສະຫງວນແລ້ວ 819 ວັງ. ນອກຈາກນັ້ນ, ສປປ ລາວ ຍັງໄດ້ເຄື່ອນໄຫວວຽກງານຄຸ້ມຄອງ ແລະ ປົກປັກຮັກສາ ປາ ແລະ ສັດນໍ້າອື່ນ ຮ່ວມກັບພາກພື້ນ ແລະ ສາກົນ ຢ່າງຕັ້ງໜ້າ ເປັນຕົ້ນ ອົງການອາຫານ ແລະ ການກະເສດ (FAO), ອົງການພັດທະນາການປະມົງ ແຫ່ງອາຊີຕາເວັນອອກສ່ຽງໃຕ້ (SEAFDEC), ອົງການລ້ຽງປາ ແລະ ສັດນໍ້າ ແຫ່ງ ອາຊີ-ປາຊີຟິກ (NACA), ຄະນະກຳມະການແມ່ນໍ້ຂອງສາກົນ (MRC), ອົງການກອງທຶນອະນຸລັກທຳມະຊາດໂລກ (WWF) ໃນການສ້າງ ແລະ ຄຸ້ມຄອງວັງສະຫງວນ, ຄຸ້ມຄອງ ຊະນິດພັນປາທີ່ໃກ້ຈະສູນພັນ ແລະ ອະນຸລັກສັດນ້ຳອື່ນໆ.
ສຳລັບປີ 2023 ກະຊວງກະສິກໍາ ແລະ ປ່າໄມ້ ສົມທົບກັບພະແນກກະສິກໍາ ແລະ ປ່າໄມ້ແຂວງ, ນະຄອນຫຼວງ ມີແຜນຈະປ່ອຍປາຄືນສູ່ແຫຼ່ງນໍ້າທໍາມະຊາດ ໃນຂອບເຂດທົ່ວປະເທດໃຫ້ໄດ້ 62 ລ້ານ ໂຕ. ສໍາລັບພິທີທາງການມື້ນີ້ ກົມລ້ຽງສັດ ແລະ ການປະມົງ, ສູນພັດທະນາ ແລະ ບໍລິການດ້ານກະເສດ ຫ້ວຍຊອນຫ້ວຍຊົ່ວ ກະຊວງກະສິກຳ ແລະ ປ່າໄມ້ ໄດ້ສົມທົບກັບພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ແລະ ຫ້ອງການກະສິກຳ ແລະ ປ່າໄມ້ເມືອງໄຊທານີ ໄດ້ເລືອກເອົາ ບ້ານທ່າສະຫວ່າງ ເປັນຈຸດປ່ອຍປາຄືນສູ່ທຳມະຊາດ ເຊີ່ງປາທີ່ຈະນຳມາປ່ອຍທັງໝົດມີ 450.000ກວ່າໂຕ ເຊີ່ງມີປາປາກ, ປາເພັ້ຍ, ປາເໝັ້ນ, ປາກົດ, ປາເຂັງ, ປາຄໍ່, ປາສະລິດ, ປາຊວາຍ, ກົບ ແລະ ຊະນິດອື່ນໆ. ເຊີ່ງການປ່ອຍປາຢູ່ນະຄອນຫຼວງວຽງຈັນ ກໍ່ຈະສືບຕໍ່ໄປ ໃນແຕ່ລະຈຸດ ໂດຍກຳນົດມື້ທີ່ແຕກຕ່າງກັນ ຕາມເງື່ອນໄຂຂອງແຕ່ລະບ່ອນ.
ປີ2023ນີ້ ນະຄອນຫລວງວຽງຈັນ ມີແຜນປ່ອຍປາລົງສູ່ທໍາມະຊາດ ຈໍານວນ 9.400.000 ກວ່າໂຕ, ໃນນັ້ນຊຸມຊົນປ່ອຍເອງ 8.500.000ໂຕ,
ຂ່າວ: ບຸນຍັງ ພຸດສະຫວັດ
ພາບ: ຄໍາກອງ
May be an image of 11 people