ໃນວັນທີ 2 ສິງຫາ 2024 ຢູ່ໂຮງຮຽນມັດທະຍົມສົມບູນວຽງຈັນ ໂດຍການເຂົ້າຮ່ວມຂອງທ່ານ ສິລິລາດທົງສິນ ທອງເພັງ, ຮອງເຈົ້າຄອງນະຄອນຫລວງວຽງຈັນ, ທ່ານ ສົມພອນ ສອນດາລາ, ຫົວໜ້າພະແນກສຶກສາທິການ ແລະກິລາ ນະຄອນຫລວງວຽງຈັນ ພ້ອມດ້ວຍພາກສ່ວນກ່ຽວຂ້ອງ, ຄູອາຈານ ແລະ ນັກ ຮຽນເຂົ້າຮ່ວມ.
ໃນພິທີທ່ານ ແສງເພັດ ບຸດສະບາປະເສີດ, ຮອງຜູ້ອຳນວຍ ການໂຮງຮຽນມັດທະຍົມສົມບູນວຽງຈັນ ໄດ້ຜ່ານບົດສະຫລຸບການເຄື່ອນໄຫວການຮຽນການສອນສົກຮຽນ 2023-2024 ຜ່ານມາ ໂດຍຍົກໃຫ້ເຫັນຜົນງານທີ່ຍາດມາໄດ້, ຂໍ້ສະດວກ ແລະຈຸດອ່ອນຂໍ້ຄົງຄ້າງດ້ານຕ່າງໆ ລວມເຖິງແຜນປັບປຸງການຮຽນການສອນໃນສົກຮຽນນີ້ ເພື່ອເຮັດໃຫ້ການສຶກສາຮັບປະກັນໄດ້ທາງດ້ານປະລິມານ ແລະຄຸນນະພາບ. ພ້ອມທັງໄດ້ຢັ້ງຢືນວ່າບັນຍາກາດການໄຂສົກຮຽນ 2024-2025 ດຳເນີນໄປດ້ວຍຄວາມເປັນລະບຽບຮຽບຮ້ອຍ ແລະ ຄູອາຈານທຸກຄົນກໍ່ພ້ອມ ແລ້ວທີ່ຈະປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ.
ໂອກາດນີ້ທ່ານ ສິລິລາດທົງສິນ ທອງເພັງ, ຮອງເຈົ້າຄອງນະ ຄອນຫລວງວຽງຈັນ ໄດ້ເນັ້ນໜັກວ່າ: ພິ ທີໄຂສົກຮຽນໃໝ່ ປະຈຳປີ 2024-2025 ໃນຄັ້ງນີ້ຖືວ່າເປັນຂີດໝາຍເລີ່ມຕົ້ນສົກຮຽນໃໝ່ ບໍ່ສະເພະ ແຕ່ແມ່ນ ການຮຽນ-ການສອນປະຈຳປີເທົ່ານັ້ນ, ຫາກຍັງເປັນການຈັດຕັ້ງຜັນຂະຫຍາຍປະຕິບັດຕົວຈິງ ມະຕິກອງປະຊູມ ຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ 11 ກ່ຽວກັບການປັບປຸງຄຸນນະພາບການສຶກສາ ແລະ ການແກ້ໄຂການປະລະການຮຽນ, ການຂາດແຄນຄູສອນ ໃຫ້ເຂົ້າສູ່ການກະທຳຕົວຈິງສ້າງໃຫ້ມີການຫັນປ່ຽນໃໝ່ທີ່ແຂງແຮງ ແລະຕັ້ງໜ້າກ່ວາເກົ່າ. ສະນັ້ນຈິ່ງຂໍຮຽກ ຮ້ອງໃຫ້ຜູ້ບໍລິຫານການສຶກສາແຕ່ລະຂັ້ນ ເອົາໃຈໃສ່ປັບປຸງຄຸນນະພາບການສຶກສາ, ໂດຍສະເພາະການ ສ້າງຄວາມເຂັ້ມແຂງໃຫ້ແກ່ ຄູ-ອາຈານທຸກຊັ້ນທຸກສາຍ, ຄູ-ອາຈານຕ້ອງມີຈັນຍາບັນ, ຈັນຍາທຳ ເພາະ ຄູເປັນໝາກຫົວໃຈຂອງການສິດສອນ ຖ້າຄູປະຕິບັດໜ້າທີ່ດ້ວຍຄວາມຫ້າວຫັນ, ດ້ວຍຄວາມຮັກອາຊີບ ແລະ ພັດ ທະນາຕົວເອງຢູ່ສະເໝີ ເພື່ອເຮັດໃຫ້ນັກຮຽນກາຍເປັນນັກຮຽນດີ, ຮຽນເກັ່ງຂອງຊາດ, ເອົາໃຈໃສ່ໃນການສ້າງແຜນການສອນປະຈຳປີຄົບຖ້ວນທຸກຂັ້ນຮຽນທີ່ຕົນສອນ, ແຕ່ງບົດສອນໃຫ້ຄົບຖ້ວນທຸກວິຊາ, ທຸກຊັ້ນຮຽນເພື່ອສາມາດຂຶ້ນຫ້ອງສອນໄດ້ທັນກັບມື້ເປີດສົກຮຽນໃໝ່ກະກຽມສື່, ອຸປະກອນ, ເອກະສານປະກອບການຮຽນ-ການສອນ ແລະ ປື້ມແບບຮຽນໃຫ້ພຽງພໍ, ຕ້ອງມີການວັດປະເມີນຜົນການຮຽນຂອງນັກຮຽນຢ່າງຕໍ່ເນື່ອງຕິດຕາມການຮຽນຂອງນັກຮຽນລາຍງານການເຄື່ອນໄຫວຕ່າງໆໃຫ້ຜູ້ປົກຄອງຮັບຮູ້ນຳ, ການກວດປະເມີນຜົນເປັນປົກກະຕິດ້ວຍຫຼາຍວິທີ, ຈັດສອນບຳລຸງນັກຮຽນອ່ອນໃນແຕ່ລະວິຊາ,ຈັດບຳລຸງນັກຮຽນເກັ່ງຜູ້ທີ່ມີພອນສະຫວັນເພື່ອສົ່ງເສີ່ມໃຫ້ກາຍເປັນນັກຮຽນເກັ່ງຂອງວິຊາໃດໜື່ງ.
ສໍາລັບລູກຫຼານ, ນ້ອງນັກຮຽນ ຕ້ອງເອົາໃຈໃສ່ຄົ້ນຄວ້າຮໍ່າຮຽນ ແລະ ເຝິກຝົນຫຼໍ່ຫຼອມຄຸນສົມບັດ, ມີສຸຂະພາບແຂງແຮງ ຮັບປະ ກັນໃຫ້ໄດ້ 5 ຫຼັກມູນການສຶກສາ (ຄຸນສົມບັດສຶກສາ, ປັນຍາສຶກສາ, ແຮງງານສຶກສາ,ພະລະສຶກສາ ແລະ ສິລະປະສຶກສາ) ປະຕິບັດລະບຽບໂຮງຮຽນຢ່າງເຄັ່ງຄັດ ແຂ່ງຂັນກັນຮຽນດີ-ຮຽນເກັ່ງ, ໃຊ້ເວລາຫວ່າງໃຫ້ເປັນປະໂຫຍດ, ບໍ່ຫຍຸ້ງກ່ຽວກັບສິ່ງເສບຕິດ ແລະ ສິ່ງມຶນເມົາຕ່າງໆ; ສ່ວນອຳນາດການປົກຄອງ, ຜູ້ພໍ່ແມ່ຜູ່ປົກຄອງນັກຮຽນ ຕ້ອງຮ່ວມກັນຕິດຕາມການຮຽນຂອງລູກຫຼານ ແລະ ຊຸກຍູ້ສ້າງເງື່ອນໄຂອຳນວຍຄວາມສະດວກບັນດາສື່ ແລະ ອຸປະກອນທີ່ໃຊ້ໃນການຮຽນ-ການສອນ ພ້ອມທັງຕິດ ຕາມພຶດຕິກຳຂອງລູກຫຼານຕົນຢ່າງໃກ້ຊິດ, ໃຫ້ການຮ່ວມມື ໃຫ້ ການຮ່ວມມືສະໜັບສະໜູນຊ່ວຍເຫຼືອ, ເອື້ອອຳນວຍຄວາມ ສະ ດວກໃຫ້ແກ່ການພັດທະນາການສຶກສາໃຫ້ດີຂຶ້ນ ປະກອບສ່ວນດ້ານ ວັດຖຸປັດໃຈເພື່ອພັດທະນາພື້ນຖານໂຄງລ່າງ, ບູລະນະສ້ອມແປງ, ອະນາໄມອາຄານ, ສະຖານທີ່ທັງໃນແລະນອກຫ້ອງໃຫ້ມີມາດຕະຖານ, ໃຫ້ຖືວ່າການສຶກສາແມ່ນໜ້າທີ່ຂອງປວງຊົນ ເພື່ອແນໃສ່ເຮັດໃຫ້ການສຶກສາໄດ້ຮັບພັດທະນາທາງດ້ານປະລິ ມານ ແລະ ຄຸນນະພາບ ນັບມື້ສູງຂຶ້ນ.
