ພະແນກກະສິກຳແລະປ່າໄມ້ນະຄອນຫຼວງວຽງ ສົມທົບກັບຫ້ອງການສົ່ງເສີມກະສິກຳ ແລະປ່າໄມ້ເມືອງຫາດຊາຍຟອງ ນະຄອນຫຼວງວຽງຈັນ ຈັດພິທີປ່ອຍປາ ເນື່ອງໃນໂອກາດວັນປ່ອຍປາ ແລະອະນຸລັກສັດນໍ້າສັດປ່າ ວັນທີ 13 ກໍລະກົດຂື້ນໃນຕອນເຊົ້າວັນທີ 13 ກໍລະກົດ 2021 ທີ່ ໜອງຄໍາແສນ ບ້ານສີຖານໃຕ້ ເມືອງຫາດຊາຍຟອງ ໂດຍການເຂົ້າຮ່ວມຂອງທ່ານ ພູໂຂງ ບັນນາວົງ ຮອງເຈົ້າຄອງນະຄອນຫຼວງວຽງຈັນ ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກຳ ແລະປ່າໄມ້ ພ້ອມດ້ວຍພາກສ່ວນກ່ຽວຂ້ອງ.
ທ່ານ ຫຼ້າສາຍ ນວນທະສິງ ຫົວໜ້າພະແນກກະສິກຳແລະປ່າໄມ້ນະຄອນຫຼວງວຽງຈັນ ໃຫ້ຮູ້ວ່າ: ຍ້ອນການປ່ຽນແປງຂອງສະພາບດິນຟ້າອາກາດ ການບຸກລຸກທໍາມະຊາດແລະການຫາປາແບບດັບສູນຂອງມວນມະນຸດ ເຮັດໃຫ້ສັດນ້ຳສັດປ່າມີທ່າອ່ຽງຫຼຸດລົງ, ສະນັ້ນ ເພື່ອອະນຸລັກສັດນ້ຳສັດປ່າໃຫ້ມີຄວາມອຸດົມສົມບູນ ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງເປີດຂະບວນການປ່ອຍປາ ແລະສັດປ່າຄືນສູ່ທຳມະຊາດ ໂດຍໄດ້ສົມທົບກັບອົງການປົກຄອງບ້ານລຽບຕາມລໍາແມ່ນ້ຳຂອງ ແລະໜອງນ້ຳທຳມະຊາດ ຄຸ້ມຄອງວັງສະຫງວນຈຳນວນ 35 ແຫ່ງລວມທັງສົ່ງເສີມການລ້ຽງປາ ແລະສັດນ້ຳເພື່ອຄ້ຳປະກັນຄວາມໝັ້ນຄົງດ້ານສະບຽງອາຫານຕື່ມອີກ, ສໍາລັບປາທີ່ນນໍາມາປ່ອຍໃນຄັ້ງນີ້ມີຈໍານວນ 300.000 ກ່ວາໂຕ ເປັນປະເພດ ປານິນ ປາກິນຫ້ຍາ ປາປາກ ແລະປາທຳມະຊາດ, ສ່ວນການປ່ອຍປາຄືນສູ່ທໍາມະຊາດປີນີ້ ຈະປ່ອຍ ໃຫ້ໄດ້ຫຼາຍກ່ວາ 2.000.000 ໂຕ .ໂດຍປ່ອຍຢູ່ 11ຈຸດ ໃນ 9ຕົວເມືອງ
ການປ່ອຍປາ ແລະສັດນໍ້າ ຢູ່ ສປປ ລາວ ເຫັນວ່າ ເພີ່ມຂຶ້ນໃນແຕ່ລະປີ ເຊັ່ນ: ໃນປີ 2015 ປ່ອຍໄດ້ 35 ລ້ານໂຕ, ປີ 2016 ປ່ອຍໄດ້ 40 ລ້ານໂຕ, ປີ 2017 ປ່ອຍໄດ້ 43 ລ້ານໂຕ, 2018 ປ່ອຍໄດ້ 45 ລ້ານໂຕ, 2019 ປ່ອຍໄດ້ 50 ລ້ານໂຕ ແລະ 2020 ປ່ອຍໄດ້ 55 ລ້ານໂຕແລະປີນີ້ຈະປ່ອຍໃຫ້ໄດ້ 58 ລ້ານໂຕ.
Loading...