ປັດຈຸບັນ ບັນຫານ້ຳເປື້ອນໃນຕົວເມືອງຂອງ ນະຄອນຫຼວງວຽງຈັນ ແມ່ນເປັນບັນຫາທີ່ມີຄວາມທ້າທ້າຍ ເພາະນ້ຳເປື້ອນທີ່ປ່ອຍອອກມາສົ່ງຜົນກະທົບຕໍ່ສຸຂະພາບ ຂອງປະຊາຊົນ, ສັງຄົມ ແລະ ສິ່ງແວດລ້ອມ ຮຸ່ນແຮງຂຶ້ນເລື່ອຍໆ ອັນເນື່ອງມາຈາກການເພີ່ມຂຶ້ນຂອງປະຊາກອນຢ່າງໄວວາ, ການຂະຫຍາຍຕົວຂອງເສດຖະກິດສັງຄົມ ເຮັດໃຫ້ມີການຊົມໃຊ້ນໍ້າປະປາ ເພີ້ມຂຶ້ນ ແລະ ກາຍເປັນນໍ້າເປື້ອນ, ນອກຈາກນີ້ ເຕັກໂນໂລຢີຂອງລະບົບບຳບັດທີ່ມີຢູ່ໃນປັດຈຸບັນ ກໍ່ຄື ຂຸມບໍາບັດນໍ້າເປື້ອນຄົວເຮືອນ ຫຼື Septic Tank ແມ່ນບໍ່ໄດ້ຕາມມາດຕະຖານສິ່ງແວດລ້ອມແຫ່ງຊາດທີ່ກຳນົດໄວ້ ເພື່ອແກ້ໄຂບັນຫານໍ້າເປື້ອນ ທີ່ສົ່ງກິນເໝັ້ນໃຫ້ແກ່ຕົວເມືອງ ລັດຖະບານ ກໍ່ຄື ນະຄອນຫຼວງວຽງຈັນ ໄດ້ຕົກລົງ ກູ້ຢືມເງິນແບບບໍ່ມີດອກເບ້ຍ ໃນກອບການຮ່ວມມື 2 ລັດຖະບານ ໄລຍະ 3 ຈາກລັດຖະບານ ຮົງກາລີ ໃນຊ່ວງທ້າຍປີ 2017 ຈຳນວນເງິນ 100,000,000 ໂດລາສະຫາລັດ ແລະ ນໍາໃຊ້ເຂົ້າໃນການກໍ່ສ້າງລະບົບບໍາບັດນໍ້າເປື້ອນ ປະມານ 70,000,000 ໂດລາສະຫາລັດ.
ທ່ານ ປອ. ສົມໃຈຫວັງ ເດດອຸດົມ, ຮອງຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າ: ພາຍຫຼັງເຊັນສັນຍາເງິນກູ້, ຕົ້ນປີ 2018 ໂຄງການກໍ່ສ້າງໂຮງງານບໍາບັດນໍ້າເປື້ອນ ນະຄອນຫຼວງວຽງຈັນ ໄດ້ເລີ່ມສຶກສາຄວາມເປັນໄປໄດ້, ການສໍາຫຼວດ-ອອກແບບ, ເຊິ່ງໂຄງການໄດ້ສຸ່ມໃສ ການກໍ່ສ້າງ 2 ໜ້າວຽກຫຼັກ ຄື:
1). ການກໍ່ສ້າງຂະຫຍາຍໂຮງງານນ້ຳປະປາດົງບັງ ດ້ວຍກຳລັງການຜະລິດ 24,000 ແມັດກ້ອນ/ມື້ ການກໍ່ສ້າງໄດ້ເລີ່ມຂຶ້ນໃນປີ 2020 ແລະ ສໍາເລັດ 100% ພ້ອມທັງຈັດພິທີມອບ-ຮັບໃນເດືອນ ເມສາ 2023.
2). ການກໍ່ສ້າງລະບົບບຳບັດນ້ຳເປື້ອນນະຄອນຫຼວງວຽງຈັນ ໄດ້ເລີ່ມກໍ່ສ້າງໃນເດືອນ ມັງກອນ 2023 ເຊິ່ງແບ່ງອອກເປັນ 2 ໜ້າວຽກຍ່ອຍ ຄື: 1). ໂຮງງານບຳບັດນ້ຳເປື້ອນ ແລະ 2). ລະບົບສາຍທໍ່ສົ່ງນໍ້າເປື້ອນ ແລະ ປໍ້າສູບສົ່ງ ມາຮອດເດືອນ ພຶດສະພາ 2024 ສຳຫຼັບໂຮງງານບຳບັດນ້ຳເປື້ອນແມ່ນປະຕິບັດ ສຳເລັດໄດ້ 42.78% ແລະ ລະບົບສາຍທໍ່ສົ່ງນ້ຳເປື້ອນແມ່ນສໍາເລັດ 62.98% ແລະ ມີຄວາມຄືບໜ້າທັງໝົດໂຄງການ ປະມານ 65% ຂອງແຜນການ.
ຂະບວນການບຳບັດແມ່ນໃຊ້ລະບົບແບບປະສົມປະສານ Integrated Fixed-Film Activated Sludge, ສໍາຫຼັບນໍ້າທີ່ຖືກບໍາບັດແລ້ວ ແມ່ນຈະຖືກປ່ອຍລົງສູ່ຫວ້ຍໝາກຫຽວ, ສໍາລັບຕະກອນສິ່ງເສດເຫຼືອ ແມ່ນເອົາໄປຜ່ານລະບົບ Dewatering ເພື່ອຮີດນໍ້າອອກແລ້ວຈຶ່ງເອົາມາຕາກໃຫ້ແຫ້ງເພື່ອນໍາໄປຜະລິດເປັນຝຸ່ນຊີວະພາບເພື່ອນໍາໃຊ້ເຂົ້າໃນວຽກງານການກະສິກຳຕ່າງໆ.
ພາຍຫຼັງສຳເລັດໂຄງການບຳບັດນ້ຳເປື້ອນ ນະຄອນຫຼວງວຽງຈັນ, ນໍ້າເປື້ອນຈາກຄົວເຮືອນຂອງຮ່ອງແກ ຈະຖືກສູບສົ່ງໄປບຳບັດຢູ່ ໂຮງງານບຳບັດນ້ຳເປື້ອນ ຕັ້ງຢູ່ບ້ານຂາມງອຍ, ເມືອງໄຊເສດຖາ, ນະຄອນຫຼວງວຽງຈັນ, ດັ່ງນັ້ນ ບັນຫານໍ້າເປື້ອນໃນເຂດຮັບນ້ຳເປື້ອນ ຮ່ອງແກແມ່ນຈະໄດ້ຮັບການແກ້ໄຂ.
ທ່ານ ປອ. ສົມໃຈຫວັງ ເດດອຸດົມ ໃຫ້ຮູ້ຕື່ມວ່າ: ເພື່ອໃຫ້ສໍາເລັດຕາມຄາດໝາຍທີ່ກໍານົດໄວ້ ໃນ ປີ 2025 ນີ້ ທາງໂຄງການ ຈຶຶ່ງມີຄວາມຈຳເປັນຕ້ອງໄດ້ຕັດທາງເບຕົງ, ທາງປູຍາງ ຈຳນວນໜຶ່ງ ຢູ່ເສັ້ນທາງຫົວຂົວ – ໂນນສະຫວ່າງ ເຊິ່ງຈະໄດ້ແບ່ງເປັນ 2 ຊ່ວງ ຄື: ຊ່ວງທີ1: ຈຸດຕໍ່ໜ້າຮ້ານເຝີຕົ້ນຕານ ແລະ ຊ່ວງທີ2: ແມ່ນ ທາງຮ່ອມເຂົ້າບ້ານ ໂຊກຄໍາ, (ຈາກເຝີຕົ້ນຕານ ຫາ ບ້ານ ໂນນຄໍ້ໃຕ້) ເມືອງ ໄຊເສດຖາ, ນັບຕັ້ງແຕ່ ວັນທີ 29 ພຶດສະພາ ຫາ ວັນທີ 21 ມິຖຸນາ 2024, ລວມທັງໝົດ ໃຊ້ເວລາ 24 ວັນ ເພື່ອວາງທໍ່ແຮງດັນສູງຂະໜາດທໍ່ 80 ຊມ.
ສະນັ້ນ, ຈຶ່ງຮຽກຮ້ອງ ແລະ ຂໍຄວາມຮ່ວມມືມາຍັງປະຊາຊົນ, ອໍານາດການປົກຄອງບ້ານ ແລະ ບັນດາຜູ້ຂັບຂີ່ລົດປະເພດຕ່າງໆ ຖ້າບໍ່ຈໍາເປັນໃຫ້ຫຼີກລ້ຽງເສັ້ນທາງດັ່ງກ່າວ ໂດຍສະເພາະລົດບັນທຸກທີ່ມີນ້ຳໜັກເກີນ 5ໂຕນ ໃນຊ່ວງເວລາທີ່ກຳນົດດ້ວຍ ເພື່ອເຮັດໃຫ້ການກໍ່ສ້າງດໍາເນີນໄປດ້ວຍດີ ແລະ ສໍາເລັດຕາມແຜນການທີ່ວາງໄວ້.
