ທ່ານ ນາງ ວຽງພອນ ແກ້ວຄູນສີ, ຫົວໜ້າພະແນກ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ນໍາພາຄະນະປີດຂະບວນແກ້ໄຂບັນຫາປ້າຍບໍ່ຖືກຕ້ອງຢ່າງເປັນທາງການ ໃນວັນທີ 24 ພຶດສະພາ 2024 ໂດຍເລີ່ມຕົ້ນຢູ່ຕະຫຼາດຊັ່ງຈຽງ, ເມືອງ ສີໂຄດຕະບອງ.
ທ່ານ ນາງ ວຽງພອນ ແກ້ວຄູນສີ ໃຫ້ສໍາພາດຕໍ່ສື່ມວນຊົນວ່າ: ມາຮອດປັດຈຸບັນ ບັນດາຫົວໜ່ວຍທຸລະກິດຕ່າງໆ ຢູ່ນະຄອນຫລວງວຽງຈັນ ເພີ່ມຂຶ້ນຢ່າງຕໍ່ເນື່ອງ, ໃນນັ້ນ ມີບາງຫົວໜ່ວຍເຄື່ອນໄຫວບໍ່ສອດຄ່ອງກັບລະບຽບການ ໂດຍສະເພາະການໂຄສະນາການດໍາເນີນກິດຈະການຂອງຕົນດ້ວຍປ້າຍໂຄສະນາ ເຊັ່ນ: ປ້າຍຊື່ວິສາຫະກິດ ແລະ ປ້າຍໂຄສະນາຍັງສັບສົນປົນເປກັນດ້ານຮູບແບບ, ສີສັນ ແລະ ຂະໜາດ ໂດຍເຮັດຕາມໃຈຂອງຜູ້ລົງທຶນ, ການໃຊ້ພາສາລາວ ແລະ ພາສາຕ່າງປະເທດບໍ່ຖືກຕ້ອງ, ການຕິດປ້າຍໂດຍບໍ່ໄດ້ຮັບອະນຸຍາດ, ປ້າຍບໍ່ປະຕິບັດພັນທະ ແລະ ເສຍພາສີອາກອນ ແລະ ອື່ນໆ ເຮັດໃຫ້ສັງຄົມສັບສົນ, ທັງບໍ່ເປັນລະບຽບຮຽບຮ້ອຍ ແລະ ສວຍງາມ.
ໃນລະຫວ່າງການກວດກາຂອງຄະນະສະເພາະກິດ ຖ້າພົບເຫັນປ້າຍບໍ່ຖືກຕ້ອງ ແມ່ນຈະສັ່ງປົດປ້າຍທັນທີ ຫລື ແຈ້ງໃຫ້ເຈົ້າຂອງປ້າຍປົດເອງພາຍໃນ 7 ວັນ, ຖ້າຫາກບໍ່ຈັດຕັ້ງປະຕິບັດຄະນະສະເພາະກິດຈະມີມາດຕະການຕາມລະບຽບການທີ່ວາງໄວ້.
ທ່ານກ່າວຢໍ້າວ່າ: ຄະນະສະເພາະກິດເພື່ອແກ້ໄຂບັນຫາປ້າຍຢູ່ນະຄອນຫລວງວຽງຈັນ ໄດ້ກໍານົດເອົາຕະຫລາດຊັງຈຽງ ເປັນຈຸດທົດລອງເລີ່ມຕົ້ນຈັດຕັ້ງປະຕິບັດກ່ອນໝູ່ ຈາກນັ້ນຈິ່ງເລີ່ມຈັດຕັ້ງປະຕິບັດຢູ່ສະຖານທີ່ອື່ນໆ ພາຍໃນນະຄອນຫລວງວຽງຈັນ ທັ້ງນີ້ກໍເພື່ອປະຕິບັດຕາມກົດໝາຍວ່າດ້ວຍປ້າຍ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ນິຕິກໍາທີ່ກ່ຽວຂ້ອງຂອງນະຄອນຫລວງວຽງຈັນ.
