ກອງປະຊຸມເວທີເຈົ້ານະຄອນອາຊຽນ (AMF) ແລະ ກອງປະຊຸມເຄືອຂ່າຍບັນດານະຄອນອາຊີຕາເວັນອອກສຽ່ງໃຕ້ ຂອງສະມາຄົມບັນດາເຈົ້າຄອງນະຄອນທີ່ນໍາໃຊ້ພາສາຝຣັ່ງ (RVASEAIMF)ພາຍໃຕ້ຄໍາຂວັນ ເພີ່ມທະວີການເຊື່ອມຈອດແລະຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນອາຊຽນ ຈັດຂື້ນລະຫວ່າງວັນທີ 17-19 ກັນຍາ 2024, ທີ່ຫໍປະຊຸມແຫ່ງຊາດ ໂດຍມີບັນດາທ່ານເຈົ້າຄອງ, ຮອງເຈົ້າຄອງ ແລະ ຜູ້ຕາງໜ້າບັນດານະຄອນຫຼວງ, ນະຄອນຂອງອາຊຽນ ແລະ ບັນດານະຄອນທີ່ໃຊ້ພາ ສາຝຣັ່ງຈຳນວນ 189 ທ່ານເຂົ້າຮ່ວມ, ໃນນີ້ລວມທັງຜູ້ຕາງໜ້ານະຄອນຫຼວງ ດີລີ ປະເທດຕີມໍ ເເລັດສະເຕ ເຂົ້າຮ່ວມໃນນາມຜູ້ສັງເກດການ.
ໃນໂອກາດຖະແຫລງຂ່າວກ່ຽວກັບຜົນສໍາເລັດກອງປະຊຸມຄັ້ງນີ້ ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງ ວຽງຈັນ ແຈ້ງໃຫ້ຮູ້ວ່າ: ກອງປະຊຸມໄດ້ມີການແລກປ່ຽນທັດສະນະ ແລະ ປະກອບຄໍາເຫັນຢ່າງກົງໄປກົງມາ ແລະ ສ້າງສັນທັງໄດ້ທົບທວນຄືນເຖິງຄວາມໝາຍໝັ້ນ ແລະ ຄວາມພະຍາຍາມໃນກອງປະຊຸມເຈົ້າຄອງນະຄອນຫຼວງອາຊຽນ ທີ່ໄດ້ຈັດຂຶ້ນຜ່ານມາ ນັບ ແຕ່ກອງປະຊຸມເຈົ້າຄອງນະຄອນຫຼວງອາຊຽນ ຄັ້ງທີ 1 ທີ່ໄດ້ຈັດຂຶ້ນຢູ່ ຢູ່ນະຄອນຫຼວງຈາກາຕາ, ປະເທດອິນໂດເນເຊຍ ໃນປີ 2013 ຈົນເຖິງ ປັດຈຸບັນ ແລະໄດ້ຢໍ້າຄືນຄວາມໝາຍໝັ້ນຂອງບັນດານະຄອນຫຼວງອາຊຽນ ໃນການສົ່ງເສີມນະວັດຕະກຳໃໝ່ ແລະ ລະດົມແຫຼ່ງຊັບພະຍາກອນໃນການຂັບເຄື່ອນການພັດທະ ນາຕົວເມືອງແບບຍືນຍົງ ເພື່ອໃຫ້ສອດຄ່ອງກັບວາລະ2030, ສັນຍາປາຣີ ແລະ ເປົ້າໝາຍລະດັບໂລກໃນວາລະໃໝ່ແຫ່ງການພັດທະນາຕົວເມືອງ;ເນັ້ນໜັກເຖິງຄວາມສຳຄັນຂອງການເພີ້ມທະວີສ້າງສາຍພົວພັນຄູ່ຮ່ວມມືພາຍໃນແລະລະຫວ່າງພາກພື້ນຕື່ມອີກເພື່ອເຮັດໃຫ້ອາຊີຕາເວັນອອກສ່ຽງໃຕ້ເປັນເຂດທີ່ໜ້າຢູ່, ເປັນສູນກາງຂອງການເຕີບໂຕດ້ານເສດຖະກິດຂອງພາກພື້ນແລະເປັນກົນໄກຂັບເຄື່ອນໃນການຈະເລີນເຕີບໂຕຂອງໂລກ, ເພື່ອໃຫ້ບັນລຸວິໄສທັດປະຊາຄົມອາຊຽນ2025 ແລະ ຍົກສູງຄວາມສຳ ຄັນຂອງກົນໄກທີ່ມີອາຊຽນເປັນຜູ້ນໍາພາ ເປັນເວທີເປີດກວ້າງການຮ່ວມມື ແລະ ແລກປ່ຽນກັບບັນດານະຄອນ ແລະ ອົງການປົກຄອງທ້ອງຖິ່ນຈາກບັນດາຄູ່ຮ່ວມມືພາຍນອກຂອງອາຊຽນເພື່ອເພີ່ມທະວີການເຊື່ອມຈອດ ແລະການພັດທະນາແບບຍືນຍົງຢູ່ບັນດານະຄອນອາຊຽນ.
ກອງປະຊຸມໄດ້ຮັບຮອງເອົາຖະແຫຼງການນະຄອນຫຼວງວຽງຈັນເຊຶ່ງມີລາຍລະອຽດ ໂດຍຫຍໍ້ດັ່ງນີ້:
1. ເພີ່ມທະວີການເຊື່ອມຈອດ: ຮັບຮູ້ເຖິງຄວາມສໍາຄັນຂອງການເຊື່ອມຈອດໃນການອໍານວຍຄວາມສະດວກໃຫ້ແກ່ການຂະຫຍາຍຕົວຂອງເສດຖະກິດ, ຄວາມສາມັກຄີປອງດອງຂອງສັງຄົມ ແລະການແລກປ່ຽນວັດທະນະທໍາລະຫວ່າງ ບັນດານະ ຄອນຫຼວງອາຊຽນ. ພວກເຮົາໃຫ້ຄໍາໝັ້ນສັນຍາວ່າຈະເພີ່ມທະວີຄວາມເຂັ້ມແຂງຂອງເຄືອຂ່າຍການຂົນສົ່ງ, ພື້ນຖານໂຄງລ່າງດີຈີຕອນ, ການເຊື່ອມໂຍງທາງດ້ານປະຊາກອນ ເປັນຕົ້ນການສຶກສາ, ວັດທະນະທໍາ ແລະການທ່ອງທ່ຽວ ເພື່ອຮັບປະກັນການເຊື່ອມໂຍງ ແລະການຮ່ວມມືຢ່າງບໍ່ຢຸດຢັ້ງ.
2. ການສ້າງຄວາມເຂັ້ມແຂງ: ຮັບຮູ້ເຖິງບັນດາສິ່ງທ້າທາຍທີ່ເກີດຂຶ້ນຍ້ອນການປ່ຽນແປງສະພາບດິນຟ້າອາກາດ, ການຫັນເປັນຕົວເມືອງ ແລະປັດໄຈສິ່ງແວດລ້ອມອື່ນໆ, ພວກເຮົາ ຍຶດ ໝັ້ນໃນການເສີມຂະຫຍາຍຄວາມເຂັ້ມແຂງ ຂອງພວກເຮົາດ້ວຍການລົງທຶນໃສ່ການວາງຜັງເມືອງແບບຍືນຍົງ, ປັບປຸງມາດຕະການຮັບມືກັບການປ່ຽນແປງດິນຟ້າອາກາດ ແລະ ໄພພິບັດຕ່າງໆ ເພື່ອປົກປ້ອງປະຊາຊົນ, ຊຸມຊົນ ແລະລະບົບນິເວດຂອງພວກເຮົາ.
3. ສ້າງຄວາມເຂັ້ມແຂງໃຫ້ແກ່ຊຸມຊົນ: ໂດຍເນັ້ນໃສ່ຄວາມສໍາຄັນຂອງການພັດທະນາແບບກວມລວມ ແລະ ມີສ່ວນຮ່ວມ, ພວກເຮົາພະຍາຍາມສ້າງຄວາມເຂັ້ມແຂງໃຫ້ຊຸມຊົນທ້ອງຖິ່ນ, ໂດຍສະເພາະກຸ່ມຄົນທີ່ມີຄວາມສ່ຽງດ້ວຍການເຂົ້າເຖິງການດໍາລົງຊີວິດທີ່ບໍ່ກະທົບຈາກໄພຂົ່ມຂູ່ຈາກທໍາມະຊາດ, ເຂົ້າເຖິງການສຶກສາທີ່ມີຄຸນນະພາບ, ເຂົ້າເຖິງການຮັກສາສຸຂະພາບ ແລະການບໍລິການສັງຄົມ. ພວກເຮົາຈະຍຶດຖືເອົາການເສີມຂະຫຍາຍຄວາມເປັນເຈົ້າການ ແລະຄວາມຮັບຜິດຊອບຂອງພົນລະເມືອງຕໍ່ການພັດທະນາຕົວເມືອງ ແບບຍືນຍົງ.
4. ສົ່ງເສີມນະວັດຕະກໍາ: ຖືເອົານະວັດຕະກໍາ ແລະ ເຕັກໂນໂລຊີ ເປັນຕົວຂັບເຄື່ອນຕົວເມືອງແບບຍືນຍົງ, ພວກເຮົາໝາຍໝັ້ນທີ່ຈະສົ່ງເສີມການລິເລີ່ມຂອງນະຄອນອັດສະລິຍະ, ການຫັນເປັນດິຈີຕອນ ແລະ ເຕັກໂນໂລຊີສີຂຽວ.ພວກເຮົາຈະຊຸກຍູ້ການຮ່ວມມືລະຫວ່າງບັນດານະຄອນຂອງອາຊຽນ, ນັກວິຊາການ ແລະພາກເອກະຊົນ ເພື່ອໝູນໃຊ້ນະວັດຕະກໍາເພື່ອການພັດທະນາແບບຍືນຍົງ.
5. ສົ່ງເສີມການແລກປ່ຽນວັດທະນະທໍາ: ຮັບຮູ້ເຖິງຄວາມ ອຸດົມສົມບູນ ແລະຫຼາກຫຼາຍຂອງວັດທະນະທໍາອາຊຽນ, ພວກເຮົາໃຫ້ຄໍາໝັ້ນສັນຍາຈະສົ່ງເສີມການແລກປ່ຽນວັດທະນະທໍາ ແລະປົກປັກຮັກສາມໍລະດົກຕົກທອດຈາກບັນພະບູລຸດ. ພວກເຮົາຈະເຄົາລົບເອກະລັກທາງວັດທະນະທໍາຂອງກັນແລະກັນພ້ອມທັງເສີມຂະຫຍາຍຄວາມເຂົ້າໃຈ, ການຮ່ວມມືເຊິ່ງກັນແລະກັນ.
6. ຄວາມໝາຍໝັ້ນໃນການເປັນຄູ່ຮ່ວມມື: ຮັບຮູ້ເຖິງຄວາມສໍາຄັນຂອງການຮ່ວມມືຫຼາຍຝ່າຍ, ພວກເຮົາຈະຍຶດໝັ້ນການຮ່ວມມືກັບສະຖາບັນອາຊຽນ, ອົງການຈັດຕັ້ງສາກົນ, ພາກເອກະຊົນ ແລະພາກສ່ວນທີ່ກ່ຽວຂ້ອງ. ພວກເຮົາ ຈະພ້ອມກັນພະຍາຍາມເພື່ອບັນລຸເປົ້າໝາຍການພັດທະນາແບບຍືນຍົງ.
ໃນໂອກາດນີ້ທ່ານ ອາດສະພັງທອງ ສີພັນດອນ, ຍັງໄດ້ສະ ແດງຄວາມຂອບໃຈຢ່າງຈິງໃຈມາຍັງ ບັນດາທ່ານເຈົ້າຄອງ-ຮອງເຈົ້າຄອງນະຄອນຫຼວງອາຊຽນ, ບັນດາທ່ານເຈົ້ານະຄອນ, ການນໍາຂັ້ນທ້ອງຖິ່ນ ພ້ອມທັງບັນດາຊ່ຽວ ຊານ, ວິຊາການ, ຜູ້ຕາງໜ້າຈາກຄູ່ຮ່ວມມື ແລະ ພາກສ່ວນຕ່າງໆສໍາລັບການຮ່ວມມືອັນດີ, ການປະກອບສ່ວນຢ່າງຫ້າວຫັນ ແລະ ການປຶກສາຫາລືຢ່າງສ້າງສັນ ຊຶ່ງເຮັດໃຫ້ກອງປະຊຸມໄດ້ຮັບຜົນສໍາເລັດຊຶ່ງເປັນການສ້າງພື້ນ ຖານອັນດີ ໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44, 45 ແລະ ບັນດາກອງປະຊຸມສຸດຍອດອື່ນໆທີ່ກ່ຽວຂ້ອງ ຊຶ່ງຈະຈັດຂຶ້ນໃນຕົ້ນເດືອນຕຸລາປີ 2024 ນີ້ ທີ່ນະຄອນຫຼວງວຽງຈັນ ໃຫ້ໄດ້ຮັບຜົນສໍາເລັດ.
