ພິທີປະກາດນະຄອນໄກສອນພົມວິຫານ ແຂວງສະຫວັນນະເຂດ ເປັນນະຄອນປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ ຈັດຂຶ້ນຢູ່ທີ່ສະໂມສອນຂອງນະຄອນດັ່ງກ່າວໃນວັນທີ 14 ພຶດສະພານີ້.
ນະຄອນໄກສອນພົມວິຫານມີເນື້ອທີ່ທັງໝົດ 77.903 ກິໂລຕາແມັດ, ມີທັງໝົດ 67 ບ້ານ, ແບ່ງເປັນ 13 ກຸ່ມບ້ານພັດທະນາ, ມີພົນລະເມືອງ 133.857 ຄົນ, ຍິງ 67.890 ຄົນ. ສໍາລັບຂະບວນການສ້າງຄອບຄົວ ແລະບ້ານສາມັກຄີປອງດອງ ຂອງແນວລາວສ້າງຊາດນະຄອນ ແມ່ນຕິດພັນກັບຂະບວນການຂໍ້ແຂ່ງຂັນຮັກຊາດ ແລະ ພັດທະນາ ຕາມທິດສາມສ້າງຂອງນະຄອນໄກສອນພົມວິຫານ ເພື່ອຜັນຂະຫຍາຍວຽກງານແນວລາວສ້າງຊາດ, ເສີມຂະຫຍາຍມູນເຊື້ອສາມັກຄີປະຊາຊົນບັນດາເຜົ່າທີ່ມີມາແຕ່ດົນນານ.
ສໍາລັບການກວດກາປະເມີນການຈັດຕັ້ງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ ແມ່ນປະຕິບັດຕາມເນື້ອໃນຂໍ້ຕົກລົງເລກທີ 127/ສນຊ ຂອງຄະນະກໍາມະການສູນກາງແນວລາວສ້າງຊາດ ໃນ 4 ມາດຕະຖານຄອບຄົວ ແລະ 5 ມາດຕະຖານບ້ານສາມັກຄີປອງດອງ ສາມາດປະຕິບັດໄດ້ຜົນສໍາເລັດເປັນກ້າວໆມາ ເຊິ່ງສະແດງອອກໃນປີ 2017 ສ້າງໄດ້ບ້ານ 28 ບ້ານ, ປີ 2018 ສ້າງໄດ້ 39 ບ້ານ ແລະນັບແຕ່ປີ 2019- 2023 ໃນ 67 ບ້ານ ແມ່ນໄດ້ຜ່ານມາດຕະຖານ 85% ຂຶ້ນໄປທຸກບ້ານ, ສາມາດເວົ້າໄດ້ວ່າສາມາດຮັບຮອງບ້ານສາມັກຄີປອງດອງໄດ້ 100% ມາຕະຫຼອດ ແລະຮັບຮອງຄອບຄົວສາມັກຄີປອງດອງໄດ້ທັງໝົດ 22.139 ຄອບຄົວ, ເທົ່າກັບ 99,37%.
ພາບ-ຂ່າວ: ນະຄອນ ໄກສອນ ພົມວິຫານ.
