ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນັກທຸລະກິດທີ່ດີຕ້ອງຈິງໃຈຊ່ວຍ ພັກ-ລັດ ພັດທະນາປະເທດຊາດ

ໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ (22 ມີນາ 1955 – 22 ມີນາ 2020), ທ່ານ ຄໍາໄພ ສົມຊະນະ, ປະທານບໍລິສັດກຸ່ມ ຄໍາໄພຊະນະ ຈໍາກັດຜູ້ດຽວ ໄດ້ໃຫ້ສໍາພາດກ່ຽວກັບຄວາມຮູ້ສຶກຂອງຕົນຕໍ່ການຊີ້ນໍາ-ນໍາພາຂອງພັກປະຊາຊົນປະຕິວັດລາວ ວ່າ: ນັບແຕ່ໄດ້ຮັບການສ້າງຕັ້ງຂຶ້ນ, ພັກປະຊາຊົນປະຕິວັດລາວ ໄດ້ວາງແນວທາງນະໂຍບາຍອັນຖືກຕ້ອງຕໍ່ການພັດທະນາເສດຖະກິດ-ສັງຄົມຂອງປະເທດໃນແຕ່ລະໄລຍະ, ຈຶ່ງເຮັດໃຫ້ມາຮອດປັດຈຸບັນ ພື້ນຖານໂຄງລ່າງ-ຖະໜົນຫົນທາງລະຫວ່າງບ້ານຫາບ້ານ, ບ້ານຫາເມືອງ, ເມືອງຫາແຂວງ, ລວມເຖີງເສັ້ນທາງເຊື່ອມຕໍ່ຫາປະເທດໃກ້ຄຽງ ຈາກເມື່ອກ່ອນທີ່ເປັນທາງດິນແດງເຮັດໃຫ້ການສັນຈອນໄປ-ມາພົບຄວາມຫຍຸ້ງຍາກ, ມາຮອດປັດຈຸບັນໄດ້ຮັບການປູຢາງເຮັດໃຫ້ການສັນຈອນໄປ-ມາມີຄວາມສະດວກສະບາຍຫລາຍ ແລະ ອີກບໍ່ດົນນີ້ ໂຄງການກໍ່ສ້າງກໍ່ສ້າງທາງລົດໄຟລາວ-ຈີນ ທີ່ເປັນໂຄງການໃຫຍ່ລະດັບຊາດ ແລະ ລະດັບພາກພື້ນຈະສໍາເລັດ ເຊີ່ງຈະເຮັດໃຫ້ການເດີນທາງໄປ-ມາ ກໍ່ຄື ການຕິດຕໍ່ຊື້ຂາຍຂອງປະຊາຊົນຂອງແຕ່ລະແຂວງ-ແຕ່ລະພາກ ດີຂຶ້ນກ່ວາເກົ່າ.
ນອກຈາກນີ້, ລະບົບບການສຶກສາ, ສາທາລະນະສຸກ, ໄຟຟ້າ, ນໍ້າປາປະ ແລະ ອື່ນໆ ກໍ່ໄດ້ຮັບການພັດທະນາຢ່າງຕໍ່ເນື່ອງ ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງດີຂຶ້ນຢ່າງຕໍ່ເນື່ອງ.
ທ່ານ ຄໍາໄພ ສົມຊະນະ ກ່າວຕື່ມວ່າ: ສໍາລັບຕົນເອງແລ້ວ ກ່ອນຈະກ້າວມາເປັນນັກທຸລະກິດທີ່ປະສົບຜົນສໍາເລັດ ແລະ ມີຊື່ສຽງຢູ່ອັນດັບຕົ້ນໆຂອງປະເທດ ໃນທຸກມື້ນີ້ ບໍ່ແມ່ນເລື່ອງງ່າຍເລີຍ ເພາະຕ້ອງໄດ້ຜ່ານຜ່າອຸປະສັກຫຍຸ້ງຍາກນາໆ ປະການ, ເນື່ອງຈາກຕົນເອງກໍາເນີດມາຈາກຄອບຄົວທຸກຍາກໃນຊົນນະບົດ ແລະ ການສຶກສາກໍ່ບໍ່ສູງ; ແຕ່ຍ້ອນມີຄວາມດຸໝັ່ນຂະຫຍັນພຽນ, ອົດທົນ, ຊື່ສັດບໍລິສຸດ ແລະ ປະຢັດມັດທະຍັດ ບວກກັບ ເຊື່ອຟັງ ແລະ ເຄົາລົບຄໍາສັ່ງສອນຂອງພໍ່ແມ່ ໃຫ້ທໍາມາຫາກິນຕາມແນວທາງນະໂຍບາຍຂອງພັກ ແລະ ລັດວາງອອກໃນແຕ່ລະໄລຍະ, ຈຶ່ງເຮັດໃຫ້ຄອບຄົວຂອງເພິ່ນທີ່ເລີ່ມຕົ້ນຈາກເປັນຊາວໄຮ່ຊາວສວນ, ຄ້າຂາຍເປັດຂາຍໄກ່, ຕໍ່ມາ ກໍ່ຮັບບໍລິການແລ່ນລົດໂດຍສານຢູ່ທ້ອງຖິ່ນຊົນນະບົດຫ່າງໄກສອກຫລີກໃນເມື່ອຫລາຍສີບປີກ່ອນໜ້ານັ້ນ ຈົນຄ່ອຍໆພັດທະນາສູ່ຫລາຍອາຊີບ ແລະ ກ້າວຂຶ້ນມາເປັນບໍລິສັດກຸ່ມຄໍາໄພຊະນະຈໍາກັດຜູ້ດຽວຈົນເຖິງທຸກວັນນີ້.


ນອກຈາກນີ້, ຍ້ອນແນວທາງນະໂຍບາຍອັນຖືກຕ້ອງຂອງພັກ ແລະ ການອູ້ມຊູຊ່ວຍເຫລຶອຂອງລັດຖະບານ ຈຶ່ງເຮັດໃຫ້ບໍລິສັດກຸ່ມຄໍາໄພຊະນະຈໍາກັດ ເຕີບໃຫຍ່ຂະຫຍາຍຕົວ ແລະ ມີເຖີງ 12 ກິດຈະການໃນປັດຈຸບັນ ເຊັ່ນ: ການກໍ່ສ້າງເຄຫາສະຖານ, ຊົນລະປະທານ, ໂຮງງານເຟີນີເຈີ່, ກະສິກໍາທ່ອງທ່ຽວ ແລະ ອື່ນໆ, ສ້າງຜົນງານໃນການປະກອບສ່ວນເຂົ້າໃນພາລະກິດສ້າງສາ ແລະ ພັດທະນາປະເທດຊາດໄດ້ຢ່າງຫລວງຫລາຍ ຢ່າງແທ້ຈິງເຊັ່ນ: ໄດ້ສ້າງອາຄານສໍານັກງານນາຍົກລັດຖະມົນຕີ, ສໍານັກງານອົງການສະຫະປະຊາຊາດ, ການກໍ່ສ້າງໂຄງການປ້ອງກັນຕາຝັ່ງເຈື່ອນຕາມລໍາແມ່ນໍ້າຂອງແຂວງບໍ່ແກ້ວ, ຊົນລະປະທານແຫ່ງຕ່າງໆ, ອາຄານສໍານັກງານຂອງລັດ-ເອກະຊົນຕ່າງໆ ແລະ ອື່ນໆ; ຍິ່ງໄປກວ່ານັ້ນ ບໍລິສັດກຸ່ມຄໍາໄພຊະນະ ແມ່ນມີຄວາມພາກພູມໃຈ, ດີໃຈ ແລະ ເປັນກຽດຢ່າງສູງທີ່ພັກ-ລັດຖະບານໄດ້ມອບໝາຍຄວາມໄວ້ວາງໃຈ ແລະ ເຊື່ອໝັ້ນຕໍ່ບໍລິສັດຂອງພວກເຮົາຈຶ່ງໄດ້ມີໂອກາດໄດ້ເຂົ້າໄປປະກອບສ່ວນພັດທະນາ ແລະ ແກ້ໄຂຄວາມທຸກຢູ່ແຂວງໄຊສົມບູນ ດ້ວຍການພັດທະນາເຂດພູເບ້ຍຢູ່ແຂວງໄຊສົມບູນໃຫ້ກາຍເປັນແຫລ່ງທ່ອງທ່ອງທ່ຽວລະດັບຊາດ ແລະ ລະດັບອາຊີໃນອະນາຄົດ, ໂດຍຕິດພັນກັບການພັດທະນາຊົນນະບົດ ແລະ ການແກ້ໄຂຄວາມທຸກຍາກຂອງປະຊາຊົນພາຍໃນແຂວງ.
ນອກຈາກນີ້, ເມື່ອບໍ່ດົນມານີ້, ທາງບໍລີສັດຍັງໄດ້ມອບງົວແມ່ພັນພື້ນເມືອງພ້ອມແນວພັນພືດຈໍານວນຫນຶ່ງໃຫ້ປະຊາຊົນ ຈຳນວນ 104 ຄອບຄົວຢູ່ບ້ານອອມ ແລະ ບ້ານກໍໄຮ, ເມືອງອະນຸວົງ, ແຂວງໄຊສົມບູນ, ລວມມູນຄ່າຫລາຍກ່ວາ 1 ຕື້ກີບ. ຄຽງຄູ່ກັນນີ້, ໃນໄລຍະຜ່ານມາ, ຍັງໄດ້ມອບສັດລ້ຽງປະເພດອື່ນໆ ໃຫ້ປະຊາຊົນແຂວງໄຊສົມບູນ ມາແລ້ວຈໍານວນຫລາຍ ເພື່ອແນ່ໃສ່ຊ່ວຍຍົກລະດັບ ແລະ ເຮັດໃຫ້ຊີວິດການເປັນຢູ່ຂອງປະຊາຊົນຜູ້ທຸກຍາກດີຂຶ້ນກ່ວາເກົ່າ.
ປະທານກຸ່ມບໍລິສັດ ຄໍາໄພຊະນະ ຈໍາກັດຜູ້ດຽວ ກ່າວຕື່ມວ່າ: ເນື່ອງຈາກພັກ-ລັດເຮົາ ແມ່ນຍັງມີງົບປະມານຈໍາກັດຕໍ່ການພັດທະນາປະເທດຊາດ, ເພາະສະນັ້ນ ພາກສ່ວນທຸລະກິດຈຶ່ງຕ້ອງເຂົ້າມາມີສ່ວນຮ່ວມໃນການພັດທະນາປະເທດຊາດ ກໍ່ຄື ເຂົ້າຮ່ວມຂະບວນແຂ່ງຂັນຮັກຊາດ-ຮັກພັດທະນາຕາມທີ່ພັກ-ລັດຮຽກຮ້ອງຕ້ອງການ.
ນັກທຸລະກິດຕ້ອງຊື່ສັດ ແລະ ຈິງໃຈຕໍ່ພັກ-ລັດ, ພ້ອມທັງເອົາໃຈໃສ່ຊ່ວຍເຫລືອປະຊາຊົນໃນເຂດທຸກຍາກຕາມເງື່ອນໄຂຂອງຕົນໃຫ້ຫລາຍຂຶ້ນ, ເພື່ອຊ່ວຍເຮັດໃຫຊີວິດການເປັນຢູ່ຂອງເຂົາເຈົ້າໄດ້ຮັບການປັບປຸງນັບມື້ນັບດີຂຶ້ນກ່ວາເກົ່າ.
ໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີຈະໝູນວຽນມາເຖິງອີກວາລະໜຶ່ງໃນໄວໆນີ້, ທ່ານຄຳໄພຊະນະ ຂໍສະແດງຄວາມຮູ້ບຸນຄຸນຕໍ່ພັກ ແລະ ລັດຖະບານຢ່າງສຸດໃຈ ແລະ ຂໍອວຍໄຊໃຫ້ການນໍາພັກ-ລັດ ຈົ່ງມີສຸຂະພາບແຂງແຮງ ເພື່ອສືບຕໍ່ເປັນຮົ່ມໂພຮົ່ມໄຊຊີ້ນໍາ-ນໍາພາພາລະກິດສ້າງສາ ແລະ ພັດທະນາປະເທດຊາດລາວເຮົາ ໃຫ້ນັບມື້ຈະເລີນກ້າວຫນ້າ ແລະ ສີວິໄລຢ່າງບໍ່ຢຸດຢັ້ງ.