ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ທອງສຸກ ເປົາສຸລີ, ຫົວໜ້າພະແນກແຜນການ ແລະ ການລົງທຶນ ແຂວງຜົ້ງສາລີ ໄດ້ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ ໃຫ້ຮູ້ວ່າ: ຜົນການປຸກລະດົມດຶງດູດການລົງທຶນຂອງຕ່າງປະເທດໃນພາກເອກະຊົນຢູ່ແຂວງຜົ້ງສາລີ ມາຮອດປັດຈຸບັນ ສັງລວມເຫັນວ່ານັກລົງທຶນພາກເອກະຊົນຂອງຈີນ ເປັນອັນດັບໜຶ່ງຂອງການລົງທຶນຢູ່ແຂວງຜົ້ງສາລີກວມເອົາ 67 ໂຄງການ.
ທ່ານ ທອງສຸກ ເປົາສຸລີ ກ່າວຕື່ມວ່າ: ໃນ 67 ໂຄງການທີ່ນັກລົງທຶນພາກເອກະຊົນຈີນ ມີ 8 ໂຄງການແມ່ນລົງທຶນໃຫ້ນະໂຍບາຍກ່ຽວກັບໂຄງການປູກພືດທົດແທນການປູກຝິ່ນ ສ່ວນໃຫຍ່ແມ່ນປູກຢາງພາລາ ເຊິ່ງໄດ້ສ້າງວຽກເຮັດງານທໍາ ແລະ ໄດ້ສ້າງລາຍຮັບໃຫ້ແກ່ປະຊາຊົນ. ນອກຈາກນັ້ນ, ນັກລົງທຶນຈີນຍັງໄດ້ລົງທຶນໃສ່ດ້ານການປູກຊາ, ປູກພືດຕ່າງໆ. ພ້ອມດຽວກັນນີ້, ຜົນຜະລິດທັງໝົດທີ່ໄດ້ຮັບແມ່ນສົ່ງໄປຂາຍທີ່ສປຈີນ. ນອກຈາກການລົງທຶນຂອງຈີນແລ້ວ ຍັງມີນັກລົງທຶນຂອງຫວຽດນາມ, ມາເລເຊຍ ມີ 1 ໂຄງການມາລົງທຶນກ່ຽວກັບຊາ, ສໍາລັບນັກລົງທຶນຂອງອາເມລິກາແມ່ນການລົງທຶນ ກ່ຽວກັບການສອນພາສາອັງກິດມີ 1 ໂຄງການ.
ສໍາລັບນະໂຍບາຍກົດໝາຍຕໍ່ການລົງທຶນຕ່າງໆພາຍໃນແຂວງ ແມ່ນປະຕິບັດນະໂຍບາຍເປີດກວ້າງເປີດປະຕູສູ່ພາຍນອກ ຕາມແນວທາງນະໂຍບາຍຂອງພັກ, ລັດຖະບານລາວ, ສະນັ້ນ ນະໂຍບາຍຂອງພວກເຮົາກໍແມ່ນໃຫ້ນະໂຍບາຍຕໍ່ທຸກປະເທດ ໂດຍບໍ່ຈຳແນກ. ສະເພາະລາວ-ຈີນ ກໍຄືແຂວງຜົ້ງສາລີ ກັບສປ ຈີນ ທີ່ມີຊາຍແດນຕິດຈອດກັນ ໄດ້ເປັນເງື່ອນໄຂສະດວກໃຫ້ນັກລົງທຶນຈີນ ໄດ້ເຂົ້າມາລົງທຶນຢູ່ແຂວງຜົ້ງສາລີຫຼາຍກວ່ານັກລົງທຶນປະເທດອື່ນ.
ທີ່ມາ: CMG FM93