ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນັກສຶກສາຄະນະພາສາສາດວິຊາສື່ມວນຊົນປີ II ມະຫາວິທະຍາໄລສຸພານຸວົງຢ້ຽມຢາມວິທະຍຸກະຈາຍສຽງແຫ່ງຊາດ

ໃນຕອນບ່າຍວັນທີ 6 ກຸມພາ 2020, ທີ່ນະຄອນຫຼວງວຽງຈັນ, ຄະນະນັກສຶກສາ ແລະ ຄູອາຈານຈາກຄະນະພາສາສາດ ວິຊາສື່ມວນຊົນ ປີ 2 ມະຫາວິທະຍາໄລສຸພານຸວົງ ແຂວງຫຼວງພະບາງ ຈໍານວນ 30 ຄົນ ນໍາພາໂດຍ ອາຈານ ຈັນທະພອນ ໄຊວົງສານ, ຫົວໜ້າໜ່ວຍວິຊາວິທະຍຸ, ຄະນະພາສາສາດ, ມະຫາວິທະຍາໄລສຸພານຸວົງ ໄດ້ເດີນທາງມາຢ້ຽມຢາມ ແລະ ທັດສະນະສຶກສາທີ່ວິທະຍຸກະຈາຍສຽງແຫ່ງຊາດລາວ (ວສລ) ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານສັງຂານ ຈູມຄໍາພັນ, ຮອງຜູ້ອໍານວຍການໃຫຍ່ ແລະ ຄະນະ.

ໃນໂອກາດນີ້, ທ່ານຮອງຜູ້ອໍານວຍການໃຫຍ່ ວສລ ໄດ້ກ່າວຕ້ອນຮັບ ຄະນະນັກສຶກສາ ແລະ ຄູອາຈານຈາກຄະນະພາສາສາດ ວິຊາສື່ມວນຊົນ ປີ 2 ມະຫາວິທະຍາໄລສຸພານຸວົງ ແຂວງຫຼວງພະບາງ, ກ່ອນທີ່ຈະນຳສະເໜີໂດຍຫຍໍ້ ກ່ຽວກັບປະຫວັດຄວາມເປັນມາ, ການຈັດຕັ້ງ, ພາລະບົດບາດ ແລະ ການເຄື່ອນໄຫວຂອງວິທະຍຸກະຈາຍສຽງແຫ່ງຊາດລາວຕະຫລອດໄລຍະ 60 ປີຜ່ານມາ. ວິທະຍຸກະຈາຍສຽງແຫ່ງຊາດລາວ ໃນປະຈຸບັນ ຫຼື ວິທະຍຸກະຈາຍສຽງຝ່າຍປະເທດລາວ ໃນສະໄໝກ່ອນ ຖືກສ້າງຕັ້ງຂຶ້ນໃນວັນທີ 13 ສິງຫາ 1960 ຢູ່ເຂດປົດປ່ອຍ, ຖິ່ນຖານການປະຕິວັດລາວ, ທີ່ເມືອງວຽງໄຊ, ແຂວງຫົວພັນ, ທາງພາກ ເໜືອຂອງສປປ ລາວ. ມາຮອດປີນີ້, ປີ 2020, ວິທະຍຸກະຈາຍສຽງແຫ່ງຊາດລາວ ຊຶ່ງຈະມີອາຍຸຄົບຮອບ 60 ປີ, ປະກອບມີ 11 ພະແນກ ແລະພະນັກງານ 150 ກວ່າຄົນ ເຮັດໜ້າທີ່ການເມືອງຜະລິດລາຍການຂ່າວ ແລະ ສາລະບັນເທີງ, ໂດຍກະຈາຍສຽງຜ່ານສາມຊ່ອງທາງຄື: ລະບົບຄື້ນ (AM-FM), ລະບົບດາວທຽມ (Satellite) ແລະ ລະບົບອິນເຕີເນັດ (Internet)(ອອນລາຍ) (Facebook & YouTube), ເປັນພາສາລາວ, ພາສາຊົນເຜົ່າ (ມົ້ງ ແລະ ກຶມໝຸ) ແລະ ພາສາຕ່າງປະເທດ (ຫວຽດນາມ, ຈີນ, ອັງກິດ, ຝລັ່ງ, ຂະແມ ແລະ ໄທ). ພາຍຫລັງໄດ້ຮັບຟັງການລາຍງານຈາກຄະນະຮັບຜິດຊອບ ວສລ ແລ້ວ, ຄະນະນັກສຶກສາ ແລະ ຄູອາຈານຈາກຄະນະພາສາສາດ ວິຊາສື່ມວນຊົນ ປີ 2 ມະຫາວິທະຍາໄລສຸພານຸວົງ ແຂວງຫຼວງພະບາງ ຍັງໄດ້ຮັບຟັງການຕອບຊີ້ແຈງຂໍ້ຊັກຖາມຈາກຄະນະຮັບຜິດຊອບ ວສລ, ກ່ອນທີ່ຈະໄປຢ້ຽມຊົມ ຫ້ອງສົ່ງ-ຫ້ອງອອກອາກາດ ແລະ ຫ້ອງອັດສຽງຈໍານວນໜຶ່ງ.

ນາງສຸດາລັດ ຈັນທະປັນຍາ, ໜຶ່ງໃນຄະນະນັກສຶກສາດັ່ງກ່າວ ມີຄໍາເຫັນວ່າ ໃນການມາທັດສະນະສຶກສາທີ່ວິທະຍຸກະຈາຍສຽງແຫ່ງຊາດຄັ້ງນີ້, ຕົນເອງແມ່ນໄດ້ຮັບຄວາມຮູ້ຫຼາຍຢ່າງກ່ຽວກັບເຕັກນິກການຈັດລາຍການວິທະຍຸ, ນັບທັງເຕັກນິກການກະກຽມກ່ອນການເຂົ້າຫ້ອງສົ່ງຈັດລາຍການ, ການກໍານົດກຸ່ມເປົ້າໝາຍຜູ້ຟັງ, ເປັນຕົ້ນ.

ທ້າວທອງຄູນ ອິນຖາວົງ, ອີກໜຶ່ງນ້ອງໃນຄະນະນັກສຶກສາຈາກມະຫາວິທະຍາໄລສຸພານຸວົງ ກ່າວວ່າ ຕົນເອງກໍ່ໄດ້ຮັບປະສົບການຕົວຈິງຫຼາຍຢ່າງກ່ຽວກັບການລົງເກັບກໍາຂໍ້ມູນ, ເຕັກນິກການຜະລິດລາຍການວິທະຍຸ, ລວມທັງປະຫວັດຄວາມເປັນມາ 60 ປີຂອງວິທະຍຸກະຈາຍສຽງແຫ່ງຊາດລາວທີ່ໜ້າສົນໃຈ ແລະ ປະທັບໃຈເປັນຢ່າງຍິ່ງ.

ຄະນະນັກສຶກສາ ແລະ ຄູອາຈານຈາກຄະນະພາສາສາດສື່ມວນຊົນ ປີ 2 ມະຫາວິທະຍາໄລສຸພານຸວົງ ແຂວງຫຼວງພະບາງ ນອກຈາກຈະໄດ້ມາຢ້ຽມຢາມ ແລະ ທັດສະນະສຶກສາ ທີ່ອົງການສື່ຫຼັກຈຳນວນໜຶ່ງທີ່ນະຄອນຫຼວງວຽງຈັນແລ້ວເຊັ່ນ: ວິທະຍຸກະຈາຍສຽງແຫ່ງຊາດລາວ, ໂທລະພາບແຫ່ງຊາດລາວ ແລະ ສໍານັກໜັງສືພິມວຽງຈັນໃໝ່, ຄະນະດັ່ງກ່າວ ຍັງຈະໄດ້ໄປຢ້ຽມຢາມ ແລະ ທ່ອງທ່ຽວພັກຜ່ອນຢ່ອນອາລົມຢູ່ເມືອງວັງວຽງ, ແຂວງວຽງຈັນ ຕື່ມອີກ.