ວັນທີ 7 ມິຖຸນາ 2024 ນີ້ ທີ່ມະຫາວິທະຍາໄລສຸພານຸວົງ ໄດ້ຈັດກິດຈະກຳ “ການແຂ່ງຂັນ ຂົວພາສາຈີນ ຂອງນັກສຶກສາ ທົ່ວປະເທດ ຄັ້ງທີ 23 ແລະກິດຈະກຳ ການຮ້ອງເພງຈີນ ດັງກ້ອງທົ່ວເມືອງ ຄັ້ງທີ 3″. ມີ ທ່ານ ມອນໄຊ ລາວມົວຊົງ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ, ທ່ານ ຈາງເຊີ້ຜິງ ກົງສຸນໃຫຍ່ ສປ ຈີນ ປະຈຳແຂວງຫຼວງພະບາງ, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ພ້ອມດ້ວຍຄູ-ອາ ຈານ ແລະນັກຮຽນ-ນັກສຶກສາ ເຂົ້າຮ່ວມ.
ທ່ານ ມອນໄຊ ລາວມົວຊົງ ມີຄຳເຫັນວ່າ: ການຈັດງານຄັ້ງນີ້ ເພື່ອຍົກໃຫ້ເຫັນສາຍພົວພັນ ມິດຕະພາບອັນມີມູນເຊື້ອສອງຊາດ ລາວ-ຈີນ; ສົ່ງເສີມການສ້າງຄູ່ຮ່ວມຊະຕາກຳລາວ-ຈີນໃຫ້ເລິກເຊິງ; ເພີ່ມທະວີຄວາມເຂົ້າໃຈດ້ານ ວັດທະນະທໍາ ແລະຮີດ ຄອງປະເພນີ ອັນດີງາມຂອງສອງປະຊາຊົນຊາດລາວ-ຈີນ; ທັງເປັນການສ້າງເວທີໃຫ້ໄວໜຸ່ມ; ຊາວໜຸ່ມ ໄດ້ສະແດງຄວາມຮູ້; ຄວາມສາມາດ ຂອງຕົນເອງ; ໃນການພົບປະແລກປ່ຽນຂໍ້ມູນຂ່າວສານເຊີ່ງກັນ ແລະກັນ; ເປັນການຫັດແໜ້ນຄວາມສາມັກຄີກັບທຸກກຸ່ມຄົນ, ທຸກເພດ ທຸກໄວ ແລະເພື່ອເປັນການພົບປະແລກປ່ຽນ ດ້ານວັດທະນະທຳ, ຮີດຄອງປະເພນີອັນດີງາມ ລະ ຫວ່າງ ຊາວໜຸ່ມ ສອງຊາດ ລາວ-ຈີນ; ຈີນ-ລາວ.
ງານຄັ້ງນີ້ ມີຜູ້ແຂ່ງຂັນ 18 ຄົນຈາກຫ້າສະຖາບັນການສຶກສາ ຄື: ສະຖາບັນຂົງຈື ມະຫາວິທະຍາໄລສຸພານຸວົງ, ສະຖາບັນຂົງຈື ມະຫາວິທະຍາໄລແຫ່ງຊາດ, ຄະນະອັກສອນສາດ ມະຫາວິທະຍາ ໄລແຫ່ງຊາດ, ມະຫາວິທະຍາໄລຊູໂຈລາວ ແລະວິທະຍາໄລບໍລິ ຫານທຸລະກິດຮັງທາວ.
ຜ່ານການແຂ່ງຂັນ ໂດຍມີການນຳສະເໜີຜົນງານຂອງຕົນເອງ, ຕອບຄຳຖາມຈາກຄະນະກຳມະການ ແລະຄຳຖາມທີ່ເຂົ້າແຂ່ງຂັນຈົກສະຫຼາກດ້ວຍຕົນເອງ, ພ້ອມທັງສະແດງສິລະປະ-ຄວາມ ສາ ມາດສະເພາະຕົວ ຜົນປະກົດວ່າ ທ້າວ ມືແຢະ ແສງພູວົງ ນັກສຶກ ສາຈາກສະຖາບັນຂົງຈື ມະຫາວິທະຍາໄລສຸພານຸວົງ ໄດ້ຮັບລາງວັນຊະນະເລີດ, ທ້າວ ເວັງທໍ່ ນັກສຶກສາຈາກສະຖາບັນຂົງຈື ມະຫາວິ ທະຍາໄລສຸພານຸວົງ ໄດ້ຮອງຊະນະເລີດ, ນອກນັ້ນແມ່ນໄດ້ຮັບລາງວັນທີ່ 3 ລວມມີ 16 ລາງວັນ.
