ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ນັກຮຽນມັດທະຍົມຕອນປາຍ 12 ຄົນເດີນທາງໄປຍີ່ປຸ່ນ ເພື່ອເຂົ້າຮ່ວມແລກປ່ຽນຫຼິ້ນກິລາຣັກບີ້

ໃນວັນທີ 12 ກັນຍາ 2019, ນັກຮຽນມັດທະຍົມຕອນປາຍ 12 ຄົນ, ລັດຖະກອນ 2 ທ່ານ ແລະ ພະນັກງານຈາກສະຫະພັນຣັກບີ້ລາວ 1 ທ່ານໄດ້ເດີນທາງຈາກສະໜາມບິນວັດໄຕໄປຍັງປະເທດຍີ່ປຸ່ນເພື່ອເຂົ້າຮ່ວມການແລກປ່ຽນຣັກບີ້ໄວໜຸ່ມພາຍໃຕ້ໂຄງການ JENESYS 2019, ເຊິ່ງໄດ້ຮັບການສະໜັບສະໜູນຈາກລັດຖະບານຍີ່ປຸ່ນ. ພວກເຂົາຈະໄດ້ໄປພັກຢູ່ທີ່ຍີ່ປຸ່ນໃນລະຫວ່າງວັນທີ 13 ຫາ 21 ກັນຍາ 2019. 

      ການແລກປ່ຽນຫຼິ້ນກິລາຣັກບີ້ແມ່ນເພື່ອແນໃສ່ການລົງເລິກເຖິງຄວາມເຊື່ອໃຈ ແລະ ຄວາມເຂົ້າໃຈເຊິ່ງກັນແລະກັນລະຫວ່າງໄວໜຸ່ມຍີ່ປຸ່ນ ແລະ ບັນດາປະເທດອາຊຽນເພື່ອສ້າງພື້ນຖານໃຫ້ກັບມິດຕະພາບ ແລະ ການຮ່ວມມືໃນອານະຄົດ. ໂຄງການດັ່ງກ່າວນີ້ມີເປົ້າໝາຍໃນຕໍ່ໜ້າເພື່ອທີ່ຈະດຶງດູດຄວາມສົນໃຈຂອງປະຊາຊົນຂອງບັນດາປະເທດໃນອາຊຽນໃນການແຂ່ງຂັນກິລາຣັກບີ້ໂລກ ທີ່ຈະຈັດຂຶ້ນຢູ່ທີ່ຍີ່ປຸ່ນໃນລະຫວ່າງວັນທີ 20 ກັນຍາໄປຈົນເຖິງ ວັນທີ 2 ພະຈິກ 2019 ແລະ ເປັນການແຂ່ງຂັນທີ່ຈະຖືກຈັດຂຶ້ນເປັນຄັ້ງທໍາອິດໃນອາຊີ.     

      ນັກຮຽນລາວທັງ 12 ຄົນ ແມ່ນໄດ້ຖືກສະເໜີຊື່ໂດຍກະຊວງສຶກສາທິການ ແລະ ກິລາຮ່ວມກັບສະຫະພັນຣັກບີ້ລາວ, ຈາກບັນດານັກຮຽນທີ່ດີເດັ່ນ ແລະ ເປັນຜູ້ທີ່ມີຄວາມກະຕືລືລົ້ນໃນກິລາ. ນັກຮຽນເຫຼົ່ານີ້ຈະລວມຕົວກັນກັບນັກຮຽນອື່ນໆຈາກປະເທດອາຊຽນ, ຈະໄດ້ເຂົ້າຮ່ວມເຝິກຊ້ອມ “Tag Rugby” (ຣັກບີ້ສໍາລັບຜູ້ຫຼິ້ນໃນຂັ້ນເລີ່ມຕົ້ນ) ພ້ອມທັງຈະໄດ້ແລກປ່ຽນກັນໃນນັດແຂ່ງຂັນມິດຕະພາບ. ນອກຈາກນີ້, ພວກເຂົາຈະໄດ້ມີໂອກາດເຂົ້າຢ້ຽມຜູ້ຕາງໜ້າຈາກກະຊວງການຕ່າງປະເທດ, ພ້ອມທັງຍັງຈະໄດ້ຮັບຊົມການເປີດງານຂອງການແຂ່ງຂັນກິລາຣັກບີ້ໂລກຄັ້ງປະຫວັດສາດໃນຍີ່ປຸ່ນ.  

      ໂຄງການ JENESYS ແມ່ນໂຄງການແລກປ່ຽນຈາກຄົນສູ່ຄົນ ລະຫວ່າງຍີ່ປຸ່ນ ແລະ ເຂດອາຊີປາຊີຟິກໃນປະຫັວດຄວາມເປັນມາຂອງໂຄງການດັ່ງກ່າວນັບຕັ້ງແຕ່ປີ 2007. ລັດຖະບານຍີ່ປຸ່ນຈະເຊື້ອເຊີນຊາວໜຸ່ມລາວປະມານ 100 ຄົນເພື່ອໄປຢ້ຽມຢາມປະເທດຍີ່ປຸ່ນໃນສົກປີນີ້.

ຂ່າວຈາກ: EMBASSY OF JAPAN IN LAO P.D.R.