ການສອບເສັງແຂ່ງຂັນນັກຮຽນເກັ່ງລະດັບຊາດ ປະຈໍາສົກຮຽນ 2023-2024 ເລີ່ມຂຶ້ນໃນວັນທີ 2 ເມສາ ແລະຈະດຳເນີນໄປຮອດວັນທີ 5 ເມສາ 2024 ທີ່ມະຫາວິທະຍາໄລແຫ່ງຊາດ (ມຊ) ດົງໂດກ, ນະຄອນຫລວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ.
ໃນສົກຮຽນ 2023-2024 ນີ້ ມີນັກຮຽນເກັ່ງເຂົ້າຮ່ວມການສອບເສັງຊັ້ນມັດທະຍົມສຶກສາຕອນຕົ້ນ (ມ.4) ຈຳນວນ: 72 ຄົນ, ຍິງ 43 ຄົນ; ຊັ້ນມັດທະຍົມສຶກສາຕອນປາຍ (ມ.7) ຈໍານວນ: 72 ຄົນ, ຍິງ 31 ຄົນ. ລວມທັງໝົດ 144 ຄົນ, ຍິງ 74 ຄົນ ແລະ ສຳມະເນນ 3 ອົງ ເປັນນັກຮຽນຊັ້ນ ມ.7. ໃນນັ້ນກວມເອົາ 16 ຊົນເຜົ່າ 4 ກຸ່ມພາສາ.
ສຳລັບມາດຖານການຕັດສິນຜົນການສອບເສັງ ໄດ້ກໍານົດຄະແນນໃນວິຊາສອບເສັງຕ້ອງໄດ້ 7 ຄະແນນ ຂຶ້ນໄປທຸກວິຊາທີ່ສອບເສັງຈຶ່ງຈະຖືກຮັບຮອງເປັນນັກຮຽນເກັ່ງລະດັບຊາດ. ສຳລັບລາງວັນການສອບເສັງ ໄດ້ຈັດໃຫ້ມີລາງວັນທີ 1, 2, 3 ແລະ ລາງວັນຊົມເຊີຍ ໃນແຕ່ລະວິຊາ. ສຳລັບການຍ້ອງຍໍ ເລີ່ມແຕ່ສົກຮຽນ 2015-2016 ເປັນຕົ້ນມາ ຜູ້ທີ່ສອບເສັງໄດ້ອັນດັບ 1, 2 ແລະ 3ນອກຈາກຈະໄດ້ຮັບໃບຢັ້ງຢືນ, ໃບຍ້ອງຍໍ ແລະ ທຶນການສຶກສາແລ້ວ ຍັງຈະໄດ້ຮັບຫຼຽນນັກຮຽນເກັ່ງອີກດ້ວຍ.
ນອກຈາກຈັດຂະບວນການສອບເສັງນັກຮຽນເກັ່ງລະດັບຊາດ ຍັງຈະມີກິດຈະກໍາ ຖາມ-ຕອບວິທະຍາສາດ ແລະ ກິດຈະກຳ ທັດສະນະສຶກສາຢ້ຽມຊົມໂຮງຮຽນານາຊາດ ແລະ ສະຖານທີ່ທ່ອງທ່ຽວປະຫວັດສາດແຫ່ງຕ່າງໆ ຊຶ່ງລ້ວນແລ້ວແຕ່ເປັນແຫຼ່ງການສຶກສາຫາຄວາມຮູ້ໃຫ້ແກ່ພວກລູກຫຼານ.
ຂອບໃຈຂໍ້ມູນຈາກ: ເສດຖະກິດ-ການຄ້າ
