ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກຸ່ມບໍລິສັດດອກງິ້ວຄຳ ເຂດເສດຖະກິດພິເສດສາມຫຼ່ຽມຄຳ ຈັດພິທີປະກວດນາງສາວທ່ອງທ່ຽວລາວປະຈຳປີ 2024 ຂຶ້ນໃນຄໍ່າຄືນວັນທີ 27 ມັງກອນ, ທີ່ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ມີທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ທ່ານ ສົມສະຫວາດ ເລັ່ງສະຫວັດ ອາດີດຮອງນາຍົກລັດຖະມົນຕີ, ທ່ານ ຈ້າວເຫວີຍ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄໍາ, ມີປະທານກຸ່ມບໍລິສັດດອກງິ້ວຄຳ, ຄະນະກຳມະ ການ, ບໍລິສັດຜູ້ໃຫ້ການສະໜັບສະ ໜູນ, ແຂກຖືກເຊີນມວນຊົນທັງພາຍໃນ ແລະ ຕ່າງປະເທດເຂົ້າ ຮ່ວມຢ່າງຫຼວງຫຼາຍ.
ການຈັດງານປະກວດນາງສາວທ່ອງທ່ຽວລາວປະຈຳປີ 2024 ແມ່ນເປັນປີທີ 2 ຊຶ່ງເປັນນາງສາວຈາກ 18 ແຂວງທົ່ວປະເທດລວມມີ 36 ນາງສາວທີ່ຜ່ານການຄັດເລືອກເພື່ອເຂົ້າປະກວດຮອບສຸດທ້າຍ ຈາກ 36 ນາງສາວ ຄັດເລືອກອອກຍັງເຫຼືອ 16 ນາງສາວ ຈາກ 16 ນາງສາວຄັດເລືອກອອກເຫຼືອ 5 bນາງສາວສຸດທ້າຍ ເພື່ອເຂົ້າຮອບຊີງຕຳແໜງນາງສາວທ່ອງທ່ຽວລາວ 2024 ອັນດັບທີ 1, ທີ 2 ແລະ ທີ 3 ຕາມລໍາດັບ. ພ້ອມນີ້ການປະກວດນາງສາວທ່ອງທ່ຽວລາວປະຈໍາປີ 2024 ຍັງເປັນກິດຈະກໍາໜຶ່ງໃນງານເທດສະການດອກງິ້ວບານ ຕິດພັນກັບປີທ່ອງ ທ່ຽວລາວ 2024. ຜູ້ໄດ້ຕຳແໜງຈະໄດ້ເປັນຕົວແທນໃນການ ເຜີຍແຜ່ວັດທະນະທຳ, ຮີດຄອງປະເພນີ, ວິຖີການດຳລົງຊີວິດ, ສະຖານທີທ່ອງທ່ຽວແຫ່ງຕ່າງໆໃຫ້ແກ່ສປປ ລາວ ອອກສູ່ສາຍຕານັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ກວ້າງ ຂວາງໃນຕະຫຼອດປີ 2024.
ສ່ວນຜົນການປະກວດ: ອັນດັບ 1 ໄດ້ແກ່ໝາຍເລກ MTL02 ນາງ ດາລາທິບ ສີສະໝຸດ ຈາກແຂວງຜົ້ງສາລີ ຄອງຕໍາແໜ່ງນາງສາວທ່ອງທ່ຽວລາວ ປະຈຳປີ 2024 ໄດ້ຮັບມົງກຸດ ພ້ອມສາຍສະພາຍ ແລະ ເງິນສົດຈໍານວນ 150 ລ້ານກີບ ພ້ອມລົດເກງ 1 ຄັນ, ທີ 2 ໝາຍເລກ MTL 18 ນາງ ປິຣິນຢາ ອາໄພວົງ ຈາກແຂວງວຽງຈັນ ໄດ້ຮັບມົງກຸດ ພ້ອມສາຍສະພາຍ ແລະ ເງິນສົດຈຳນວນ 100 ລ້ານກີບ, ທີ 3 ໝາຍເລກ MTL 05 ນາງລັດດາວັນ ວັນນະພົມ ຈາກແຂວງບໍ່ແກ້ວ ໄດ້ຮັບມົງກຸດ ພ້ອມສາຍສະພາຍ ແລະ ເງິນສົດຈຳນວນ 50 ລ້ານກີບ.