ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກລັດຖະມົນຕີ ຕິດຕາມສະພາບການປ້ອງກັນພະຍາດ ໂຄວິດ-19 ຢູ່ບັນດາແຂວງພາກກາງ ແລະ ພາກໃຕ້:

ຈາກສະພາບການແຜ່ລະບາດຂອງເຊື້ອພະຍາດ ໂຄວິດ-19 (Covid-19) ຢູ່ຫຼາຍປະເທດໃນໂລກ, ລວມທັງ ຢູ່ສປປ ລາວເຮົາ, ແລະ ໃນສະພາບທີ່ມີແຮງງານລາວກັບຄືນມາຈາກປະເທດເພື່ອນບ້ານເປັນຈຳ ນວນຫຼາຍໃນປະຈຸບັນ, ດັ່ງນັ້ນ ເພື່ອເປັນການປ້ອງກັນ ແລະ ການຫຼຸດຜ່ອນຄວາມສ່ຽງ ຕໍ່ການການແຜ່ລະບາດຂອງເຊື້ອພະຍາດດັ່ງກ່າວທີ່ອາດຂະຫຍາຍອອກເປັນວົງກວ້າງ ຢູ່ ສປປ ລາວ ຕັ້ງແຕ່ຫົວທີ ແລະ ຢ່າງທັນການ, ໃນຕອນເຊົ້າຂອງມື້ນີ້ ວັນທີ 27 ມີນາ 2020 ທີ່ ແຂວງສະຫວັນນະເຂດ, ໄດ້ຈັດກອງປະຊຸມປຶກສາຫາລື, ແລກປ່ຽນຂໍ້ມູນ ແລະ ຕີລາຄາຄືນ ການຈັດຕັ້ງປະຕິບັດ ບັນດາມາດຕະການໃນການປ້ອງກັນ, ຄວບຄຸມ ແລະ ຕອບໂຕ້ການແຜ່ລະບາດຂອງເຊື້ອພະຍາດດັ່ງກ່າວ ພາຍໃຕ້ການເປັນປະທານ ຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ, ໂດຍມີຄະນະສະເພາະກິດ ຂັ້ນສູນກາງ, ບັນ ດາເຈົ້າແຂວງ ແລະ ພະແນກການທີ່ກ່ຽວຂ້ອງຂອງບັນດາແຂວງພາກກາງ ແລະ ພາກໃຕ້ ນັບແຕ່ແຂວງບໍລິຄຳຳໄຊ ລົງຮອດແຂວງອັດຕະປື ເຂົ້າຮ່ວມ.

ໃນກອງປະຊຸມຄັ້ງນີ້ ໄດ້ຮັບຟັງການລາຍງານ ສະພາບການປະຕິບັດບັນດາມາດຕະການ ໃນການປ້ອງກັນ, ຄວບຄຸມ ແລະ ຕອບໂຕ້ ການແຜ່ຂອງເຊື້ອພະຍາດ ໂຄວິດ-19, ລວມທັງ ການຄຸ້ມຄອງແຮງງານຂອງແຕ່ລະແຂວງ ທີ່ເຂົ້າກັບຄືນມາ ຈາກບັນດາທ່ານເຈົ້າແຂວງທີ່ເຂົ້າຮ່ວມ, ໃນນັ້ນ ອັນພົ້ນເດັ່ນ ແມ່ນບັນດາແຂວງ ໄດ້ພ້ອມກັນເອົາໃຈໃສ່ ຈັດຕັ້ງຜັນຂະ ຫຍາຍ ແລະ ປະຕິບັດ ບັນດາມາດຕະການ ກໍ່ຄື ນິຕິກຳຕ່າງໆທີ່ລັດຖະບານ ແລະ ທ້ອງຖິ່ນວາງອອກ ໄດ້ຮັບຜົນດີພໍສົມຄວນ ໂດຍສະເພາະ ມາດຕະການການປ້ອງກັນພະຍາດຊຶ່ງບໍ່ທັນມີ ເຊັ່ນ: ການປິດດ່ານປະເພນີ ແລະ ດ່ານທ້ອງຖິ່ນ, ການໂຈະການຈັດໂຮມຊຸມນຸມ ແລະ ຈັດກິດຈະກຳໃຫຍ່, ຫຼີກລ່ຽງການເດີນທາງ ທີ່ບໍ່ຈຳເປັນ ແລະ ອື່ນໆ; ບັນດາແຂວງ ໄດ້ກະກຽມຄວາມພ້ອມໃນການຮັບມືຕໍ່ການແຜ່ລະບາດຂອງເຊື້ອພະຍາດ ມາໄດ້ໄລຍະໜຶ່ງແລ້ວ ເປັນຕົ້ນແມ່ນ ດ້ານເຈົ້າໜ້າທີ່ກ່ຽວຂ້ອງ, ພະນັກງານແພດໝໍ, ກໍ່ຄື ດ້ານອຸປະກອນການແພດ, ພາຫະນະ, ງົບປະມານ ແລະ ສະຖານທີ່ຮອງຮັບປິ່ນປົວໃນກໍລະນີທີ່ມີຄົນຕິດເຊື້ອ, ສະຖານທີ່ກັກກັນຜູ້ມີຄວາມສ່ຽງຕິດເຊື້ອ ແລະ ອື່ນໆ; ນອກນີ້ ກໍ່ຍັງໄດ້ແນະນຳ ແລະ ໂຄສະນາເຜີຍແຜ່ໃຫ້ຄວາມຮູ້ແກ່ປະ ຊາຊົນທີ່ຢູ່ໃນຄວາມຮັບຜິດຊອບຂອງຕົນ ໃນການປ້ອງກັນ ແລະ ແກ້ໄຂສະພາບການທີ່ອາດເກີດຂຶ້ນ, ລວມທັງ ການປຸກລະດົມທົ່ວສັງຄົມໃຫ້ເຂົ້າຮ່ວມຂະບວນການຕ້ານການແຜ່ລະບາດຂອງເຊື້ອພະຍາດໃນຄັ້ງນີ້, ໂດຍສະເພາະແມ່ນຄວາມເປັນເຈົ້າຕົນເອງ, ເພິ່ງຕົນເອງ, ມີສະຕິຕື່ນຕົວ, ການໃຫ້ການຮ່ວມມືກັບທຸກພາກສ່ວນໃນສັງຄົມ, ການມີຄວາມຮັບຜິດຊອບຮອບດ້ານ, ການປະຕິບັດຫຼັກການອະນາໄມ, ການໃຫ້ການຮ່ວມມືກັບ ພາກສ່ວນກ່ຽວຂ້ອງ ແລະ ອື່ນໆ; ໄດ້ຄຸ້ມຄອງແຮງງານລາວທີ່ກັບຄືນມາຈາກປະເທດໄທ ຜ່ານດ່ານຊາຍແດນ ລາວ-ໄທ ຢູ່ແຂວງບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ ແລະ ຈຳປາສັກ ລວມທັງໝົດ ຫຼາຍກວ່າ 70.000 ຄົນ ໃຫ້ເປັນລະບຽບ-ບໍ່ໃຫ້ຊະຊາຍ, ເກັບກຳຂໍ້ມູນລະອຽດ, ມີການຄັດກັ່ນກອງ-ກວດສຸຂະພາບ, ແຍກປ່ຽວ, ໃຫ້ການຊ່ວຍເຫຼືອ ແລະ ສືບຕໍ່ຕິດຕາມກວດກາແຮງງານເຫຼົ່ານັ້ນ ຢ່າງເປັນປົກກະຕິ. ໃນການຈັດຕັ້ງປະຕິບັດຕົວຈິງ ຊຶ່ງໃນເບື້ອງຕົ້ນ ຢູ່ບາງແຂວງ ເຖິງຈະພົບຄວາມຫຍຸ້ງຍາກ, ມີບາງຫາງສຽງບໍ່ດີເກີດຂຶ້ນ ເນື່ອງຈາກແຮງງານກັບເຂົ້າມາພ້ອມກັນເປັນຈຳນວນຫຼວງຫຼາຍ ແຕ່ອົງການປົກຄອງທ້ອງຖິ່ນ ແລະ ເຈົ້າໜ້າທີ່ກ່ຽວຂ້ອງ ກໍ່ໄດ້ພ້ອມກັນຕັດສິນໃຈ ປະຕິບັດໜ້າທີ່ ແລະ ຄວາມຮັບຜິດຊອບຂອງຕົນຢ່າງຈິງຈັງ ເຮັດໃຫ້ສະພາບການນັບມື້ກັບເຂົ້າສູ່ສະພາບປົກກະຕິ.

ນອກຈາກນັ້ນ ກໍ່ໄດ້ປະຕິບັດມາດຕະການຕໍ່ຜູ້ລະເມີດຢ່າງເຄັ່ງຄັດ ແລະ ແກ້ໄຂບັນຫາການໃຫ້ຂໍ້ມູນທີ່ບໍ່ຖືກຕ້ອງ, ຂ່າວລືໃສ່ຮ້າຍປ້າຍສີ ແລະ ສ້າງຄວາມປັ່ນປ່ວນສັບສົນ, ລວມທັງ ການແກ້ໄຂປະກົດການຫຍໍ້ທໍ້ຕ່າງໆ. ຈາກການປະຕິບັດມາດຕະການຕ່າງໆເຫຼົ່ານີ້, ມາຮອດປະຈຸບັນ ຢູ່ບັນດາແຂວງພາກກາງ (ຍົກເວັ້ນ ນະຄອນຫຼວງວຽງຈັນ) ແລະ ພາກໃຕ້ ນັບແຕ່ແຂວງບໍລິຄຳໄຊ ລົງຮອດແຂວງອັດຕະປື ແມ່ນຍັງບໍ່ທັນກວດພົບ ຜູ້ຕິດເຊື້ອພະຍາດ COVIV-19 ເທື່ອ.

ໃນຕອນທ້າຍ, ທ່ານນາຍົກລັດຖະມົນຕີ ໄດ້ມີຄຳເຫັນໂອ້ລົມ ແລະ ຊີ້ນຳຕໍ່ກອງປະຊຸມ ໂດຍທ່ານໄດ້ຮຽກ ຮ້ອງໃຫ້ທຸກພາກສ່ວນກ່ຽວຂ້ອງ ຈົ່ງເພີ່ມທະວີ ແລະ ສືບຕໍ່ປະຕິບັດມາດຕະການປ້ອງກັນພະຍາດຢ່າງຈິງຈັງ ແລະ ເຄັ່ງຄັດ ໄປຄຽງຄູ່ກັບການປະຕິບັດມາດຕະການສະກັດກັ້ນ ແລະ ຕອບໂຕ້ຢ່າງແຂງແຮງ ໂດຍການຮ່ວມແຮງຮ່ວມໃຈຂອງທຸກພາກສ່ວນໃນສັງຄົມ, ຕອບໂຕ້ຢ່າງເອົາການເອົາງານ ຄືກັນກັບ ຈິດໃຈ ແລະ ການປະກອບສ່ວນໃນການຕໍ່ສູ້ກູ້ຊາດໃນສະໄໝກ່ອນ; ໃຫ້ເອົາໃຈໃສ່ວຽກງານໂຄສະນາເຜີຍແຜ່ ໃຫ້ຄວາມຮູ້ແກ່ສັງຄົມຢ່າງກວ້າງຂວາງ ແລະ ເຂົ້າເຖິງປະຊາຊົນຢ່າງແທ້ຈິງ, ມີການປະກອບວັດຖຸອຸປະກອນເຕັກນິກ ໃຫ້ບ້ານ ຫຼື ຊຸມຊົນທີ່ຍັງມີຄວາມຂາດເຂີນ ເປັນຕົ້ນແມ່ນ ວິທະຍຸ, ໂທລະໂຄ່ງ ແລະ ອື່ນໆ; ໃຫ້ບັນດາແຂວງ ແນະນຳໃຫ້ເມືອງ ແລະ ບ້ານ ນຳໃຊ້ກຳລັງແຮງສັງລວມຂອງທ້ອງຖິ່ນຕົນ, ຍາດແຍ່ງເອົາການຊ່ວຍເຫຼືອ ແລະ ເຂົ້າຮ່ວມຂະບວນການຕື່ມອີກ; ເອົາໃຈໃສ່ເບິ່ງແຍງ ແລະ ໃຫ້ການຊ່ວຍເຫຼືອແກ່ຜູ້ກັກກັນຕົນເອງ ຢູ່ຕາມສູນຕ່າງໆ ໃຫ້ທົ່ວເຖິງ ຄົບຕາມໄລຍະເວລາ 14 ວັນ ຫຼື ຫຼາຍກວ່ານັ້ນ ຕາມສົມຄວນ; ກວດກາຄືນ ການຈັດຕັ້ງປະຕິບັດລະບຽບກົດໝາຍ ແລະ ລະບຽບການ ກໍ່ຄື ມາດຕະການຕ່າງໆທີ່ວາງອອກ; ອັນໃດບໍ່ທັນເຂັ້ມງວດ ກໍ່ຕ້ອງໄດ້ໃຫ້ເຂັ້ມງວດ ແລະ ເດັດຂາດແທ້ໆ, ໂດຍສະເພາະແມ່ນ ການຄຸ້ມຄອງລາຄາສິນຄ້າ, ການກັກກັນຕົນເອງ, ການແກ້ໄຂປະກົດການຫຍໍ້ທໍ້, ການປິດດ່ານຊາຍແດນທີ່ໄດ້ແຈ້ງການໄປແລ້ວ, ການໂຮມຊຸມນຸມ, ການສະຫຼອງບຸນປີໃໝ່ລາວ ແລະ ອື່ນໆ; ທຸກແຂວງຕ້ອງເປັນເຈົ້າການ, ເພີ່ມຄວາມຮັບຜິດຊອບຂອງຕົນ ໃຫ້ສູງຂຶ້ນກວ່າເວລາໃດໝົດ, ເດັດຂາດ ແມ່ນບໍ່ໃຫ້ລໍຖ້າ ຫຼື ເອື່ອຍອີງແຕ່ຄຳສັ່ງຂອງຂັ້ນເທິງ ຖ້າເຫັນວ່າສິ່ງໃດທີ່ມີຄວາມຈຳເປັນແທ້, ແຕ່ຕ້ອງໃຫ້ມີການນຳສະເໜີທີ່ສົມເຫດສົມຜົນ; ກວດກາຄືນ ການກຽມພ້ອມດ້ານຕ່າງໆ ເປັນຕົ້ນ ດ້ານບຸກຄະລະກອນ, ຄວາມຮູ້ຄວາມສາມາດ, ວັດຖຸອຸປະກອນຕ່າງໆ; ມີການພົວພັນ ແລະ ຮ່ວມມືກັບສາກົນ ໃນການປ້ອງກັນ, ຄວບຄຸມ ແລະ ແກ້ໄຂ ສະພາບການທີ່ເກີດຂຶ້ນໃນປະຈຸບັນ ກໍ່ຄື ສະເພາະໜ້າ, ລວມທັງ ການຍາດແຍ່ງເອົາການສະໜັບສະໜູນຊ່ວຍເຫຼືອຕ່າງໆ ຢ່າງທັນການ ແລະ ມີປະສິດທິຜົນ; ເອົາໃຈໃສ່ຜະລິດສະບຽງອາຫານ ເພື່ອຮັບປະກັນຄວາມສາມາດໃນການຕອບສະໜອງໃຫ້ໄດ້ຕາມຄວາມຕ້ອງການຂອງສັງຄົມ ແລະ ມີສ່ວນແຮສຳຮອງໄວ້ ສຳລັບຮັບມືກັບສະຖານະການທີ່ບໍ່ດີ ຊຶ່ງອາດຈະເກີດຂຶ້ນໃນສະພາບການທີ່ບໍ່ແນ່ນອນໃນອະນາຄົດ.

 

ພາບ ແລະ ຂ່າວ: ກົມປະຊາສຳພັນ ຫສນຍ