ໃນວັນທີ 14 ມີນາ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບ ຄະນະຜູ້ແທນກອງປະຊຸມໂຕະມົນ ປະຈຳປີ 2023 ນຳໂດຍ ທ່ານ ບັກໂຄເດັຍ ເບີຄະນ໋ອຟ ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ພ້ອມ ດ້ວຍ ບັນດາທູດ, ທູຕານຸທູດ ແລະ ຫົວໜ້າອົງການຈັດຕັ້ງສາກົນ ພ້ອມດ້ວຍຄະນະ.
ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ຄະນະຜູ້ແທນກອງປະຊຸມໂຕະມົນ ປະຈຳປີ 2023, ພ້ອມທັງ ຊົມເຊີຍຕໍ່ຜົນສຳເລັດຂອງກອງປະຊຸມໂຕະມົນ ປະຈຳປີ 2023 ທີ່ ຄະນະຜູ້ແທນໄດ້ຕັ້ງໜ້າປະກອບສ່ວນ ໃນການປະກອບຄຳຄິດ ຄຳເຫັນ ຕໍ່ກອງປະຊຸມຢ່າງຈິງໃຈ, ກົງໄປກົງມາ ແລະ ສ້າງສັນ ຕໍ່ບົດສະຫລຸບການຈັດຕັ້ງປະຕິບັດກາງສະໄໝແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ຍຸດທະສາດການເງິນເພື່ອສະໜັບສະ ໜູນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ຂອບການຟື້ນຟູເສດຖະກິດຂອງ ສປປ ລາວ; ບົດລາຍງານແຫ່ງຊາດແບບສະໝັກໃຈ ຄັ້ງທີ III ແລະ ແຜນຍຸດທະ ສາດການຂ້າມຜ່ານ ອອກຈາກສະຖານະພາບ ປະເທດດ້ອຍພັດທະນາຢ່າງໂລ່ງລ່ຽນ ຂອງ ສປປ ລາວ (2022-2026 ແລະ ວິໄສທັດຮອດປີ 2030) ແລະທິດທາງໃນຕໍ່ໜ້າ ແລະ ການຮ່ວມມືເພື່ອການພັດທະນາ (ການເຂົ້າຮ່ວມການຕິດຕາມປະສິດທິຜົນຂອງການຮ່ວມມືເພື່ອການພັດທະນາ ໃນລະດັບສາກົນ ຄັ້ງທີ IV ແລະ ຄໍາແນະນໍາຂະບວນການໂຕະມົນ). ພ້ອມນີ້, ທ່ານນາຍົກລັກຖະມົນຕີ, ຍັງໄດ້ ສະແດງຄວາມຂອບໃຈ ຕໍ່ກັບການສະໜັບສະ ໜູນ ແລະ ການຊ່ວຍເຫລືອ ຂອງບັນດາຄູ່ຮ່ວມພັດທະນາ ອັນໄດ້ປະກອບສ່ວນສຳຄັນ ເຂົ້າໃນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ ຂອງ ສປປ ລາວ ໃນໄລຍະທີ່ຜ່ານມາ ແລະ ບັນດາເປົ້າໝາຍການພັດທະນາແບບຍືນຍົງ (SDGs), ການກະ ກຽມອອກຈາກສະຖານະພາບການດ້ອຍພັດທະນາ ຂອງ ສປປລາວ ແລະ ຫວັງຢ່າງຍິ່ງວ່າ ບັນດາຄູ່ຮ່ວມພັດທະນາ ຈະສືບຕໍ່ຢ່າງແຂງແຮງ, ຕັ້ງໜ້າໃຫ້ການຮ່ວມມື ແລະ ການຊ່ວຍເຫລືອທາງການເພື່ອການພັດທະນາ ໃຫ້ແກ່ ສປປ ລາວ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ຂອງ ສອງປີ ທ້າຍສະໄໝ ແລະ ບັນລຸໄດ້ບັນດາເປົ້າໝາຍການພັດທະນາແບບຍືນຍົງ ຮອດ ປີ 2030 ເຊິ່ງ ການປະກອບສ່ວນດັ່ງກ່າວ ຂອງບັນດາຄູ່ຮ່ວມພັດ ທະນາ, ລັດຖະບານ ຖືເປັນປະໂຫຍດອັນສຳຄັນ ໃຫ້ແກ່ ສປປ ລາວ ເນື່ອງໃນໂອກາດ ແລະ ທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ກຳລັງອອກແຮງແຂ່ງຂັນ ໃນການຈັດຕັ້ງປະຕິບັດມະຕິຂອງສະພາແຫ່ງຊາດ, ສືບຕໍ່ປະຕິບັດວາລະແຫ່ງຊາດ ກໍຄື ການເປັນປະທານ ອາຊຽນ ໃນປີ 2024 ນີ້.
ທ່ານ ບັກໂຄເດັຍ ເບີຄະນ໋ອຟ ໄດ້ສະແດງຄວາມຂອບໃຈຕໍ່ທ່ານ ສອນໄຊ ສີພັນດອນ ທີ່ໄດ້ໃຫ້ການຕ້ອນຮັບໃນຄັ້ງນີ້, ພ້ອມທັງ ລາຍງານ ຜົນສຳເລັດຂອງການຈັດກອງປະຊຸມໂຕະມົນ ປະຈຳປີ 2023 ໃຫ້ທ່ານນາຍົກລັດຸຖະມົນຕີ ຮັບຊາບ ເຊິ່ງກົນໄກຂະບວນການໂຕະມົນ ແລະ ກອງປະຊຸມໂຕະມົນປະຈຳປີ, ກອງປະຊຸມໂຕະມົນລະດັບສູງ ທຸກໆ 5 ປີ ແມ່ນກົນໄກທີສຳຄັນ ເປັນເວທີ ໃນການປືກສາຫາລື ລະຫລ່າງ ລັດຖະບານ ແລະ ຄູ່ຮ່ວມພັດທະນາ ກ່ຽວກັບ ແຜນພັດທະນາເສດຖະກິດ-ສັງຄົມ ແຫ່ງຊາດ ໃນແຕ່ລະໄລຍະ.
ຂ່າວ-ພາບ: ທະນູທອງ
