ນາຍົກລັດຖະມົນຕີ ຕ້ອນຮັບການນຳກະຊວງອຸດສາຫະກຳ ແລະ ການຄ້າ ຫວຽດ ນາມ

ໃນຕອນແລງ ວັນທີ 8 ເມສາ 2024 ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ຫງວຽນຮົງ ຢຽນ, ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສສ ຫວຽດນາມ ພ້ອມດ້ວຍຄະນະ.

ໃນໂອກາດນີ້, ທ່ານ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສສ ຫວຽດນາມ ພ້ອມດ້ວຍຄະນະ ໃນຄັ້ງນີ້ ເຊິ່ງສະແດງເຖິງການໃຫ້ຄວາມສຳຄັນ ຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ກໍແມ່ນກະຊວງອຸດສາຫະກຳ ແລະ ການຄ້າ ສປປ ລາວ ແລະ ກະຊວງອຸດສາຫະກຳ ແລະ ການຄ້າ ສສຫວຽດນາມ,ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນ ແລະ ການຮ່ວມມື ລະຫວ່າງ ສອງພັກ,ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຈະເລີນງອກງາມ ແລະ ແຕກດອກອອກຜົນ ບໍ່ຢຸດຢັ້ງ; ສະເໜີໃຫ້ສອງກະຊວງ ອຸດສາຫະກຳ ແລະ ການຄ້າ ລາວ-ຫວຽດນາມ ເປັນເຈົ້າການໃນການສົມທົບກັນຄົ້ນຄວ້າຈັດຕັ້ງປະຕິບັດຂົງເຂດວຽກງານການຄ້າເພື່ອໃຫ້ບັນລຸຕາມການຕົກລົງຂອງສອງກົມການເມືອງສູນກາງພັກ,ສືບຕໍ່ຕັ້ງໜ້າຜັນຂະຫຍາຍຜົນກອງປະຊຸມ ຄັ້ງທີ46ຂອງຄະນະກໍາມະການຮ່ວມມືທະວິພາຄີຂອງສອງລັດຖະບານປະຈໍາປີ2024ໃຫ້ມີປະສິດທິຜົນ ແລະ ມີຜົນສໍາເລັດເປັນຢ່າງດີ;ເພີ່ມບໍລິມາດການຄ້າຂອງສອງປະເທດໃຫ້ຫຼາຍຂຶ້ນກວ່າເກົ່າໂດຍອຳນວຍຄວາມສະດວກໃຫ້ແກ່ການຄ້າຕາມຊາຍແດນ, ການສົ່ງເສີມພາກທຸລະ ກິດ, ການນໍາໃຊ້ບັນດາທ່າແຮງຂອງສອງປະເທດ ເພື່ອສົ່ງເສີມການຄ້າ ເຊິ່ງກັນ ແລະ ກັນ ໃຫ້ຫຼາຍຂຶ້ນ,ເປັນເຈົ້າການຜັນຂະຫຍາຍ ສັນຍາວ່າດ້ວຍການຄ້າຊາຍແດນ ແລະບົດບັນທຶກຊ່ວຍຈໍາ ວ່າດ້ວຍການພັດທະນາ ແລະ ເຊື່ອມຕໍ່ພື້ນຖານໂຄງລ່າງການຄ້າຊາຍແດນ ລາວ-ຫວຽດນາມ ໃຫ້ປະກົດຜົນເປັນຈິງ; ເພີ່ມທະວີວຽກງານສົ່ງເສີມການຄ້າ ແລະ ວາງສະແດງສິນຄ້າ ລາວ-ຫວຽດ ຢູ່ນະຄອນຫຼວງວຽງຈັນ ເພື່ອສົ່ງເສີມຊ່ອງທາງການຈັດວາງຈຳໜ່າຍສິນຄ້າ ໃຫ້ເພີ່ມຂຶ້ນ; ຊຸກຍູ້ການຄົ້ນຄວ້າທົດລອງຮູບແບບເຂດເສດຖະກິດຕາມດ່ານຊາຍແດນ, ຕາມແລວທາງເສດຖະກິດຕາເວັນອອກ-ຕາ ເວັນຕົກ; ຄົ້ນຄວ້າ ແລະ ປັບປຸງຂໍ້ຕົກລົງຮ່າໂນ້ຍ 2007 ວ່າດ້ວຍການສ້າງຂໍ້ສະດວກໃຫ້ແກ່ຄົນ, ພາຫະນະ ແລະ ສິນຄ້າຜ່ານຊາຍແດນແລະຊຸກຍູ້ບັນດາວິສາຫະກິດຂອງຫວຽດນາມ ໃຫ້ເຂົ້າມາລົງທຶນ ຢູ່ ສປປ ລາວ ໃຫ້ຫຼາຍຂຶ້ນ; ສະເໜີຮ່ວມກັບພາກ ສ່ວນກ່ຽວຂ້ອງຂອງລາວ ສືບຕໍ່ແລກປ່ຽນບົດຮຽນຮ່ວມກັນໃນຂົງເຂດເສດຖະກິດ, ຂົງເຂດອຸດສາຫະກໍາ ແລະ ການຄ້າ; ໃນຕໍ່ໜ້າຫວັງວ່າສອງຂະແໜງການທີ່ກ່ຽວຂ້ອງ ຈະສືບຕໍ່ພົບປະກັນນັບມື້ນັບແໜ້ນແຟ້ນ ແລະ ພ້ອມກັນຈັດຕັ້ງປະຕິບັດບັນດາໜ້າວຽກເພື່ອເຮັດໃຫ້ຕົວເລກການຄ້າຂອງສອງຝ່າຍ ນັບມື້ນັບບັນລຸຕົວເລກຄາດໝາຍ ທີ່ໄດ້ກຳນົດໄວ້.

ໃນໂອກາດດຽວກັນ, ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງທ່ານ ນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ. ພ້ອມທັງ ແຈ້ງໃຫ້ຊາບ ກ່ຽວກັບຈຸດປະສົງ ແລະ ຜົນການເຮັດວຽກຮ່ວມກັບກະຊວງອຸດສາຫະ ກຳ ແລະ ການຄ້າ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້; ໄດ້ນຳເອົາຄວາມຢ້ຽມຢາມຖາມຂ່າວ ຂອງທ່ານນາຍົກລັດຖະມົນຕີ ແຫ່ງ ສສ ຫວຽດນາມ ມາຍັງທ່ານນາຍົກລັດຖະມົນຕີ ແຫ່ງ ສປປ ລາວ; ໄດ້ແຈ້ງໃຫ້ຊາບ ກ່ຽວກັບສະພາບ ການພົວພັນ ແລະ ຮ່ວມມື ທາງດ້ານການຄ້າ ລະຫວ່າງ ສສ ຫວຽດນາມ ແລະ ສປປ ລາວ. ນອກນັ້ນ ຍັງໄດ້ສະເໜີທ່ານ ນາຍົກລັດຖະມົນຕີ ແຫ່ງ ສປປ ລາວ ສືບຕໍ່ຊີ້ນໍາພາກສ່ວນກ່ຽວຂ້ອງ ເພື່ອອຳນວຍຄວາມສະດວກ ໃນວຽກງານການຄ້າ ແລະ ການລົງທຶນ ຂອງພາກທຸລະກິດຫວຽດນາມ ທີ່ມາດຳເນີນທຸລະກິດ ຢູ່ ສປປ ລາວ ໃນບາງດ້ານຕື່ມອີກ.

ຂ່າວ ແລະ ພາບ: ກົມປະຊາສຳພັນ ຫສນຍ.