ຕອນເຊົ້າວັນທີ 27 ກໍລະກົດ 2024, ທີ່ ສູນປະຊຸມແຫ່ງຊາດ (NCC), ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ດຣ. ສຸບຣາມານຢໍາ ໃຈຊັງເກີ (Dr. Subrahmanyam Jaishankar), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ອິນເດຍ, ໃນໂອກາດທີ່ມາເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57, ທີ່ ນະຄອນຫຼວງວຽງຈັນ.
ໃນໂອກາດນີ້, ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ພ້ອມທັງສະແດງຄວາມຊົມເຊີຍຕໍ່ ທ່ານ ດຣ. ສຸບຣາມານຢໍາ ໃຈຊັງເກີ ໃນໂອກາດທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີຕ່າງປະເທດ ແຫ່ງ ສ. ອິນເດຍ ອີກໜຶ່ງສະໄຫມ, ເຊິ່ງສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຈາກການນຳຂັ້ນສູງຂອງປະເທດ ແລະ ໄດ້ຖືໂອກາດນີ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດໄປເຖິງ ພະນະທ່ານ ນາເລັນດາ ໂມດີ, ນາຍົກລັດຖະມົນຕີ ແຫ່ງ ສ. ອິນເດຍ. ພ້ອມນີ້, ພະນະທ່ານນາຍົກລັດຖະມົນຕີ ສອນໄຊ ສີພັນດອນ ກໍ່ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ. ອິນເດຍ ຕະຫຼອດໄລຍະ 68 ປີ (2 ກຸມພາ 1956 – 2024), ເຊິ່ງສອງປະເທດ ໄດ້ມີການພົບປະແລກປ່ຽນການຢ້ຽມຢາມເຊິ່ງກັນ ແລະ ກັນ ຢ່າງເປັນປົກກະຕິ, ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ທັງໃນຂອບການຮ່ວມມືສອງຝ່າຍ, ຫຼາຍຝ່າຍ ໃນຂົງເຂດພາກພື້ນ ແລະ ສາກົນ. ພ້ອມດຽວກັນນີ້, ກໍ່ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ລັດຖະບານ ແລະ ປະຊາຊົນ ອິນເດຍ ທີ່ໄດ້ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອ ສປປ ລາວ ໃນໄລຍະຜ່ານມາ, ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະໃນຂົງເຂດກະສິກຳ, ຊົນລະປະທານ, ພະລັງງານ ແລະ ພື້ນຖານໂຄງລ່າງຂອງ ສປປ ລາວ, ສະໜອງທຶນຝຶກອົບຮົມໄລຍະສັ້ນ ແລະ ໄລຍະຍາວ ໃຫ້ແກ່ ສປປ ລາວ ເຊັ່ນ: ໂຄງການຮ່ວມມືດ້ານວິຊາການ ແລະ ເສດຖະກິດອິນເດຍ, ການສຶກສາ, ວັດທະນະທຳ, ການບໍລິຫານ, ການບໍລິການ, ການພົວພັນສາກົນ, ວຽກງານປ້ອງກັນຊາດ ແລະ ອື່ນໆ. ພ້ອມນັ້ນ, ພະນະທ່ານນາຍົກລັດຖະມົນຕີ ສອນໄຊ ສີພັນດອນ, ຍັງໄດ້ສະແດງຄວາມຊົມເຊີຍຕໍ່ບົດບາດສຳຄັນຂອງ ສ. ອິນເດຍ ໃນເວທີພາກພື້ນ ແລະ ສາກົນ ເປັນຕົ້ນ ສປຊ, ອາຊຽນ-ອິນເດຍ ກໍຄື ການຮ່ວມມືໃນຂອບແມ່ນ້ຳຂອງ-ແມ່ນ້ຳຄົງຄາ ເພື່ອຜົນປະໂຫຍດຂອງການພັດທະນາສຳລັບປະຊາຊົນໃນພາກພື້ນ ແລະ ສະແດງຄວາມຢືນຢັນວ່າ ສປປ ລາວ ຈະສືບຕໍ່ໃຫ້ການສະໜັບສະໜູນການເຄື່ອນໄຫວຢ່າງຕັ້ງຫນ້າຂອງ ສ. ອິນເດຍ ຢູ່ເວທີສາກົນ, ປະກອບສ່ວນເຂົ້າໃນການສ້າງປະຊາຊຄົມອາຊຽນ ກໍຄື ປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ.
ໃນຂະນະດຽວກັນ, ທ່ານລັດຖະມົນຕີ ສຸບຣາມານຢໍາ ໃຈຊັງເກີ ກໍ່ໄດ້ສະແດງຄວາມຂອບໃຈຕໍ່ຄຳເວົ້າອັນຈົບງາມຂອງ ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ, ພ້ອມນີ້ ກໍ່ສະແດງຄວາມຢືນຢັນຈະສືບຕໍ່ຊຸກຍູ້ໃຫ້ພາກສ່ວນກ່ຽວຂ້ອງຂອງສອງຝ່າຍ ຮ່ວມກັນຈັດຕັ້ງປະຕິບັດບັນດາໂຄງການທີ່ການນຳຂັ້ນສູງຂອງປະເທດ ໄດ້ລົງນາມກັນແລ້ວນັ້ນ ໃຫ້ປະກົດຜົນເປັນຈິງ ແລະ ມີປະສິດທິຜົນສູງສຸດ, ໂດຍສະເພາະ ຊຸກຍູ້ການພົວພັນຮ່ວມມືດ້ານ ເສດຖະກິດ-ການຄ້າ, ການລົງທຶນ, ກະສິກຳ, ການສຶກສາ, ການພັດທະນາຊັບພະຍາກອນມະນຸດ, ວັດທະນະທຳ, ການທ່ອງທ່ຽວ ແລະ ຂະແໜງການອື່ນໆທີ່ມີທ່າແຮງຮ່ວມກັນ, ເພີ່ມທະວີການຮ່ວມມືໃນຂອບຫຼາຍຝ່າຍ ເປັນຕົ້ນ ສປຊ, ອາຊຽນ ແລະ ອື່ນໆ, ອວຍພອນໃຫ້ສາຍພົວພັນສອງປະເທດ ຈົ່ງຫມັ້ນຄົງຂະຫນົງແກ່ນ ແລະ ນັບມື້ໄດ້ຮັບການພັດທະນາຂຶ້ນສູ່ບາດກ້າວອັນໃຫມ່ໃນຕໍ່ຫນ້າ.
