ຕອນບ່າຍວັນທີ 7 ສິງຫາ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະ ມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຈົາ ວັນ ມິງ ກຳມະການສູນກາງພັກ, ປະທານສະພາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ພ້ອມຄະນະ ໃນໂອກາດ ເດີນ ທາງມາເຮັດວຽກຮ່ວມກັບກະຊວງເຕັກໂນໂລຊີ ແລະ ການສື່ສານ ໃນລະຫວ່າງວັນທີ 5-9 ສິງຫາ 2024.
ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ທ່ານ ເຈົາ ວັນ ມິງ ພ້ອມດ້ວຍຄະ ນະ ເຊິ່ງການມາຢ້ຽມຢາມເຮັດວຽກຂອງສະຫາຍ ແລະ ຄະນະ ໃນຄັ້ງນີ້ ແມ່ນຢູ່ໃນທ່າມກາງບັນຍາ ກາດ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວ ແລະ ຫວຽດນາມ ທົ່ວປະເທດ ຍັງໂສກເສົ້າເສຍໃຈ ແລະ ອາໄລອາວອນ ຕໍ່ການຈາກໄປຂອງ ສະຫາຍ ຫງວຽນ ຝູ໋ຈ້ອງ ຜູ້ນຳທີ່ເຄົາລົບຮັກ ຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ແລະ ເປັນການສູນເສຍເພື່ອນສະຫາຍທີ່ຮັກແພງ, ໃກ້ຊິດສະໜິດສະໜົມຂອງພັກ, ລັດ ແລະ ປະຊາຊົນລາວ. ໃນໄລຍະຜ່ານມາ, ເຫັນໄດ້ວ່າສະພາບັນດິດວິທະຍາ ສາດ ແລະ ເຕັກໂນໂລຊີ ສສ ຫວຽດນາມ ໄດ້ມີການເຕີບໃຫຍ່ຂະຫຍາຍຕົວ ແລະ ມີຜົນສຳເລັດອັນໃຫຍ່ຫລວງ, ໄດ້ກາຍເປັນອົງການຈັດຕັ້ງທີ່ນຳໜ້າ ໃນການສ້າງນັກຄົ້ນຄວ້າ, ນັກວິທະຍາສາດ, ໄດ້ຮັບຜົນສຳເລັດໃໝ່ ໃນການຄົ້ນຄວ້າວິທະຍາສາດ ແລະ ເຕັກໂນໂລຊີ ແລະ ສືບຕໍ່ປະກອບສ່ວນນັບມື້ນັບຫລາຍຂຶ້ນ ເຂົ້າໃນຂະບວນການຫັນເປັນອຸດສາຫະກຳ ແລະ ທັນສະໄໝ ຂອງ ສສ ຫວຽດນາມ.
ສະນັ້ນ, ການສ້າງສູນລະດັບຊາດ ເພື່ອເກັບຮັກສາຂໍ້ມູນ, ບໍລິຫານຂໍ້ມູນ ແລະ ເຜີຍ ແຜ່ຂໍ້ມູນ, ສູນແຈ້ງເຕືອນເຫດສຸກເສີນ ແລະ ໄພພິບັດຕ່າງໆ ຂອງ ສປປ ລາວ ໂດຍການດັດສົມນຳໃຊ້ເຕັກໂນໂລຊີໃໝ່ໆໃຫ້ເໝາະສົມ ເປັນຕົ້ນ ການນຳໃຊ້ເຕັກໂນໂລຊີກຸ່ມຂໍ້ມູນຜູກພັນ (Blockchain), ຖານຂໍ້ມູນຂະໜາດໃຫຍ່ (Big Data), ເຕັກໂນໂລຊີອັດສະລິຍະ ແລະ ອື່ນໆ ຈຶ່ງມີຄວາມສຳຄັນທີ່ສຸດ. ຄຽງຄູ່ກັນນັ້ນ, ການພັດທະນາຊັບພະຍາກອນມະນຸດ ແລະ ສ້າງຄວາມເຂັ້ມແຂງທາງດ້ານວິຊາການ ກໍມີຄວາມສຳຄັນ ໂດຍສະເພາະບຸກຄະລາກອນ ທາງດ້ານເຕັກໂນໂລຊີ ແລະ ການສື່ສານ ສຳລັບພະນັກງານລັດ ທັງສູນກາງ ແລະ ທ້ອງຖິ່ນ. ການເດີນທາງມາຢ້ຽມຢາມເຮັດວຽກຢູ່ ສປປ ລາວ ຂອງສະຫາຍ ແລະ ຄະນະ ໃນຄັ້ງນີ້, ກໍເປັນໂອກາດດີໜຶ່ງ ໃນການສືືບຕໍ່ແລກປ່ຽນບົດຮຽນ ຂອງສອງປະເທດ ເພື່ອສືບຕໍ່ຮັດແໜ້ນການຮ່ວມມື ແລະ ຊ່ວຍກັນພັດທະນາດ້ານບຸກຄະລາກອນ ກໍຄື ເຕັກໂນໂລຊີ ແລະ ນະວັດຕະກຳຂອງສອງປະເທດ.
ໂອກາດນີ້, ທ່ານ ເຈົາ ວັນ ມິງ ກໍໄດ້ສະແດງຄວາມຂອບໃຈຕໍ່ ທ່ານ ສອນໄຊ ສີພັນດອນ ທີ່ໄດ້ຕອນຮັບຢ່າງອົບອຸ່ນ ແລະ ເປັນກັນເອງ. ພ້ອມທັງສະແດງຄວາມຢືນຢັນຈະເສີມຂະຫຍາຍສາຍພົວພັນ ຮ່ວມມືລະຫວ່າງສອງປະເທດ ໃຫ້ມີການເຕີບໃຫຍ່ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ.
