ວັນທີ 3 ກັນຍາ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບ ທ່ານ ອອມ ເຢິນຕຽງ ລັດຖະມົນຕີອາວຸໂສ, ປະທານອົງການຕ້ານການສໍ້ ລາດບັງຫລວງ ແຫ່ງຣາຊະອານາຈັກ ກຳປູເຈຍ ພ້ອມດ້ວຍຄະນະ ໃນໂອກາດເດີນ ທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ.
ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ ທ່ານ ອອມ ເຢິນຕຽງ ທີ່ໄດ້ນຳພາຄະນະ ເດີນທາງມາຢ້ຽມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສຳຄັນ ເຂົ້າໃນການຮັດແໜ້ນ, ເສີມຂະຫຍາຍ ການພົວພັນຮ່ວມມື ໃນຫລາຍດ້ານ ໂດຍສະເພາະ ການຈັດຕັ້ງປະຕິບັດໂຄງການຮ່ວມມືຕ່າງໆ ລະຫວ່າງສອງປະເທດ ລາວ-ກຳປູເຈຍ ໃຫ້ໄດ້ຮັບການພັດທະ ນາ ແລະ ແຕກດອກອອກຜົນ ຍິ່ງຂຶ້ນໄປເລື້ອຍໆ ໃນອະນາຄົດ ແລະ ຍາວນານ.
ພ້ອມນີ້, ທ່ານນາຍົກລັດຖະມົນຕີ ຍັງໄດ້ແຈ້ງ ສະພາບການພັດທະນາເສດຖະ ກິດ-ສັງຄົມ ຂອງ ສປປ ລາວ ໃນໄລຍະຜ່ານມາ ຮອດປັດຈຸບັນ ໃຫ້ ທ່ານ ອອມ ເຢິນຕຽງ ຮັບຊາບ ຕື່ມອີກ.
ທ່ານ ອອມ ເຢິນຕຽງ ກໍໄດ້ສະແດງຄວາມຂອບໃຈ ຕໍ່ທ່ານ ສອນໄຊ ສີພັນດອນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້, ພ້ອມທັງ ແຈ້ງຈຸດປະສົງຂອງການເດີນ ທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ໃຫ້ທ່ານນາຍົກລັດຖະມົນ ຕີ ຮັບຊາບ. ພ້ອມນີ້, ທ່ານຍັງ ໄດ້ສະແດງຄວາມຊົມເຊີຍ ທີ່ເຫັນວ່າ ການພັດທະນາ ເສດຖະກິດ ຂອງ ສປປ ລາວ ມີການຂະຫຍາຍຕົວຢ່າງຕໍ່ເນື່ອງ ແລະ ຕີລາຄາສູງ ຕໍ່ການພົວພັນຮ່ວມມືໃນດ້ານຕ່າງໆ ໂດຍສະເພາະ ການພົວພັນຮ່ວມມື ລະຫວ່າງ ອົງ ການຕ້ານການສໍ້ລາດບັງຫລວງ ແຫ່ງຣາຊະອານາຈັກ ກຳປູເຈຍ ແລະ ອົງການກວດກາແຫ່ງລັດ ແຫ່ງ ສປປ ລາວ ທີ່ໄດ້ມີການພົວພັນຮ່ວມມືກັນຢ່າງແໜ້ນແຟ້ນ ແລະ ອື່ນໆ.
