ໃນວັນທີ 29 ສິງຫາ 2022 ທ່ານ ພັນຄຳ ວິພາວັນນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອະເນກ ເຫລົ່າທຳມະທັດ ລັດຖະມົນຕີວ່າການ ກະ ຊວງອຸດົມສຶກສາ ວິທະຍາສາດ ວິໄຈ ແລະ ນະວັດຕະກຳ ແຫ່ງຣາຊະອານາຈັກໄທ ພ້ອມດ້ວຍຄະນະ ໃນໂອກາດ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 28-31 ສິງຫາ 2022.
ທ່ານ ພັນຄຳ ວິພາວັນ ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີ ລາຄາສູງຕໍ່ທ່ານ ອະເນກ ເຫລົ່າທຳມະທັດ ທີ່ໄດ້ນຳພາຄະນະ ເດີນທາງມາຢ້ຽມ ຢາມ ແລະ ເຮັດວຽກ ຢູ່ ສປປ ລາວ ຄັ້ງນີ້ ຖືເປັນການປະກອບສ່ວນສຳຄັນ ເຂົ້າໃນການຮັດແໜ້ນສາຍພົວພັນຮ່ວມມື ໃນຫລາຍຂົງເຂດວຽກງານ ໂດຍສະເພາະ ຂົງເຂດດ້ານການສຶກສາ ລະຫວ່າງ ສອງປະເທດລາວ-ໄທ,ໄທ-ລາວ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ພ້ອມນີ້ ທ່ານ ນາຍົກລັດຖະມົນຕີ ກໍໄດ້ສະແດງຄວາມຂອບໃຈ ຕໍ່ລັດຖະບານໄທ ທີ່ສະໜັບສະໜູນ ທຶນການສຶກສາໃຫ້ແກ່ນັກສຶກສາລາວ ໃນສາຂາວິຊາຊີບຕ່າງໆ ເຊິ່ງເປັນການປະ ກອບສ່ວນເຂົ້າໃນການພັດທະນາຊັບພະ ຍາກອນມະນຸດຢູ່ ສປປ ລາວ ໃຫ້ໄດ້ມີຄຸນນະພາບດີຂຶ້ນ.
ທ່ານ ອະເນກ ເຫລົ່າທຳມະທັດ ໄດ້ສະແດງຄວາມຂອບໃຈຕໍ່ ທ່ານນາຍົກລັດຖະມົນຕີແຫ່ງ ສປປ ລາວ ທີ່ໃຫ້ການຕ້ອນຮັບຢ່າງອົບອຸ່ນ, ພ້ອມນີ້ ຍັງໄດ້ແຈ້ງຈຸດປະສົງ ໃນການມາຢ້ຽມຢາມ ແລະ ເຮັດວຽກ ຢູ່ລາວ, ພ້ອມຢືນຢັນວ່າ ລັດ ຖະບານໄທ ພ້ອມທີ່ຈະສະໜັບ ສະໜູນ ສືບຕໍ່ສ້າງສາຍພົວພັນມິດຕະ ພາບທີ່ດີລະຫວ່າງໄທ-ລາວ, ລາວ-ໄທ ໃຫ້ມີຄວາມແໜ້ນແຟ້ນຂຶ້ນກວ່າເກົ່າ.
ຂ່າວ: ກິດຕາ
ພາບ: ໄອຄຳ
Loading...