ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກລັດຖະມົນຕີ ຖະແຫຼງຂ່າວ ກ່ຽວກັບສະພາບການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ

ນາຍົກລັດຖະມົນຕີ ພ້ອມດ້ວຍຄະນະສະເພາະກິດເພື່ອປ້ອງກັນ ຄວບຄຸມ ແລະແກ້ໄຂການລະບາດຂອງພະຍາດໂຄວິດ19 ຖະແຫຼງກ່ຽວກັບສະພາບການສະກັດກັ້ນ ແລະ ຕ້ານການແຜ່ລະບາດຂອງພະ ຍາດໂຄວິດ19 ຢູ່ລາວ ໃນວັນທີ 10 ມິຖຸນານີ້ ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ພາຍຫລັງໂຕເລກຜູ້ຕິດເຊື້ອຢູ່ລາວກາຍເປັນ 0 ແລ້ວ.

ທ່ານ ທອງລຸນ ສີສຸລິດ ນາຍົກລັດຖະມົນຕີ ຊີ້ໃຫ້ເຫັນວ່າ: ການທີ່ປະເທດເຮົາໄດ້ເປັນປະເທດປອດຈາກ COVID-19 ໃນມື້ນີ້ເປັນບາດກ້າວໜື່ງທີ່ສຳຄັນຍິ່ງ ແຕ່ໃຫ້ຖືວ່າເປັນໄຊຊະນະ ແລະ ຜົນສຳເລັດເບື້ອງຕົ້ນເທົ່ານັ້ນ, ປະຈຸບັນ ແລະ ຕໍ່ໜ້າພວກເຮົາ ຍັງຢູ່ໃນສະພາບການທີ່ທ້າທາຍ ແລະ ຫຼໍ່ແຫຼມຫຼາຍດ້ານທີ່ບໍ່ອາດຈະປະ   ໝາດ, ລະເຫຼີງ ແລະ ເຜີຕົວໄດ້ ເປັນອັນຂາດ. ພວກເຮົາຕ້ອງພ້ອມກັນມີສະຕິລະ ວັງຕົວໃຫ້ສູງກວ່າເກົ່າ, ສືບຕໍ່ປະຕິບັດຄຳສັ່ງ, ຄຳແນະນຳ, ແຈ້ງການ ທີ່ອອກມາແລ້ວໃຫ້ເຂັ້ມງວດ.   ລັດຖະບານ ຈະຕິດຕາມ, ປະເມີນສະ ຖານະການທຸກໆໄລຍະ ເພື່ອຈະມີການປັບປຸງ ປ່ຽນແປງ ໄປຕາມສະພາບການ ຢ່າງສົມເຫດ ສົມຜົນ ເພື່ອສ້າງໂອກາດໃຫ້ປະຊາຊົນແລະ ຜູ້ປະກອບການ ໄດ້ດຳລົງຊີວິດ ທໍາມາຫາກິນ ແລະ ດຳເນີນກິດຈະການ ຢ່າງເປັນປົກກະຕິໄວ ເທົ່າທີ່ຈະໄວໄດ້. ແຕ່ພວກເຮົາຕ້ອງໄດ້ຕັດສິນໃຈ ປ້ອງກັນ, ຄວບຄຸມ ດ້ວຍທຸກກຳລັງແຮງ ແລະ ດ້ວຍມາດຕະການທີ່ເໝາະສົມ ເພື່ອບໍ່ໃຫ້ພະຍາດ COVID-19 ກັບຄືນມາລະບາດອີກຮອບ 2 ຫຼື ຮອບຕໍ່ໆໄປໄດ້. ເວລາດຽວກັນນີ້ ພະຍາດຕາມລະດູການ ກໍ່ລະບາດ ເປັນຕົ້ນ ໄຂ້ເລືອດອອກ ກໍເປັນວຽກສຳຄັນໜຶ່ງ ທີ່ຕ້ອງໄດ້ຊ່ວຍກັນ ປ້ອງກັນ ແລະແກ້ໄຂ.

ໃນໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ຮຽກຮ້ອງມາຍັງປະຊາຊົນລາວທຸກຖ້ວນໜ້າໃນທົ່ວປະເທດ ຈົ່ງສືບຕໍ່ຕິດຕາມສະພາບການຢ່າງໃກ້ຊິດ, ມີສະຕິລະວັງຕົວຢ່າງສູງ, ປະຕິ ບັດຖືກຕ້ອງຕາມຂໍ້ກຳນົດ, ຂໍ້ແນະນຳ ທີ່ທາງການວາງອອກແລະ ຈະວາງອອກ ໃນແຕ່ລະໄລຍະຢ່າງເຄັ່ງຄັດຕໍ່ໄປ, ຢ່າລະເຫຼີງ ທັງໃຫ້ເອົາໂອກາດນີ້ ໃຫ້ແຕ່ລະຄົນ, ແຕ່ລະຄອບຄົວ, ແຕ່ລະການຈັດຕັ້ງ ແຕ່ເທິງລົງລຸ່ມຕ້ອງໄດ້ປັບວິຖີຊີວິດ ຫຼືເວົ້າຢ່າງໜຶ່ງວ່າການດໍາລົງຊີວິດແບບໃໝ່ (New Normal) ນັ້ນ  ທີ່ມີສະຕິລະວັງຕົວກວ່າ, ກ້າວໜ້າທັນສະໄໝ, ສີວິໄລກວ່າ, ປະຢັດມັດທະຍັດ ແລະ ມີລະບຽບວິໄນກວ່າ  ເພື່ອບໍ່ໃຫ້ພະຍາດ COVID-19 ກັບມາສູ່ສັງຄົມເຮົາເປັນຮອບທີ 2 ອີກ ແລະ ທັງຖືເອົາໂອກາດນີ້ ປັບປຸງແກ້ໄຂຈຸດອ່ອນຂໍ້ຄົງຄ້າງໃນການປະຕິບັດໜ້າທີ່ວຽກງານ, ການດຳເນີນທຸລະກິດ, ການດຳລົງຊີວິດ ທີ່ແນໃສ່ເຮັດໃຫ້ຊີວິດການເປັນຢູ່ຂອງແຕ່ລະຄອບຄົວ, ແຕ່ລະຄົນດີຂຶ້ນ ເພື່ອເອົາປະເທດຊາດຂອງພວກເຮົາປັບຕົວເຂົ້າກັບສະພາບໃໝ່ຂອງໂລກ, ຂອງພາກພື້ນ ເພື່ອແກ້ໄຂຄວາມຫຍຸ້ງຍາກຕ່າງໆ ໃຫ້ຄ່ອຍໆຕົກໄປ ນໍາເອົາປະເທດຊາດຂອງພວກເຮົາກ້າວໄປໜ້າຢ່າງບໍ່ຢຸດຢັ້ງ.

 

ຂ່າວ: ຈັນທະສອນ ສີຫານາດ