ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ນາຍົກລັດຖະມົນຕີ ທອງລຸນ ສີສຸລິດ ສືບຕໍ່ເຂົ້າຮ່ວມກອງປະຊຸມສຸດຍອດອາຊຽນ ກັບບັນດາຄູ່ເຈລະຈາ ທີ່ ບາງກອກ, ປະເທດໄທ

ໃນ​ວັນ​ທີ 3 ພະຈິກ 2019, ພະນະ​ທ່ານ ທອງ​ລຸນ ສີ​ສຸ​ລິດ, ນາຍົກລັດຖະມົນຕີ ​ແຫ່ງ ສປປ ລາວ, ​ໄດ້ສືບຕໍ່ນຳ​ພ​າ​ຄະ​ນະ​ຜູ້​ແທນແຫ່ງ​ ສ​ປ​ປ ລາວ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 35 ແລະ ກອງປະຊຸມສຸດຍອດກັບບັນດາຄູ່ເຈລະຈາອາຊຽນ ຢູ່ ບາງກອກ, ປະເທດໄທ: ກອງ​ປະ​ຊຸມ​ສຸດຍອດ​ອາ​ຊຽ​ນ-ຈີນ ​ຄັ້ງ​ທີ 22, ກອງປະຊຸມສຸດຍອດອາຊຽນ-ອິນເດຍ ຄັ້ງທີ 16 ແລະ  ກອງປະຊຸມສຸດຍອດອາຊຽນ-ສປຊ ຄັ້ງທີ 10.

ກອງປະຊຸມສຸດຍອດ ອາຊຽນ-ຈີນ ຄັ້ງທີ 22 ໄດ້ສະແດງຄວາມຊົມເຊີຍຜົນສຳເລັດການພັດທະນາເສດຖະກິດສັງຄົມ ສປ ຈີນ ໃນໂອກາດສະເຫຼີມສະຫຼອງຄົບຮອບ 70 ປີ ໃນເດືອນຕຸລາ 2019 ຜ່ານມາ. ກອງປະຊຸມ ຕີລາຄາສູງຕໍ່ຜົນການຈັດຕັ້ງປະຕິບັດແຜນປະຕິບັດງານອາຊຽນ-ຈີນ 2016-2020 ແລະ ສອງຝ່າຍ ຢືນຢັນຄືນຄວາມໝາຍໝັ້ນທີ່ຈະສືບຕໍ່ຮ່ວມມືກັນໃນໄລຍະຕໍ່ໜ້າຕື່ມ. ນອກນີ້, ກອງປະຊຸມ ໄດ້ສະແດງຄວາມຍິນດີຕໍ່ ໝາກຜົນຂອງການຈັດຕັ້ງປະຕິບັດກິດຈະກຳສະເຫຼີມສະຫຼອງປີແຫ່ງການແລກປ່ຽນ ແລະ ການຮ່ວມມືສື່ມວນຊົນ ອາຊຽນ-ຈີນ ປີ 2019 ແລະ ໄດ້ຮັບຮອງເອົາ 3 ຖະແຫຼງການຮ່ວມອາຊຽນ-ຈີນ ວ່າດ້ວຍການຮ່ວມມືໃນຂົງເຂດຕ່າງໆ ເຊັ່ນ: ດ້ານຕົວເມືອງອັດສະລິຍະ, ການຮ່ວມມືດ້ານສື່ມວນຊົນ ແລະ ການເຊື່ອມສານລະຫວ່າງ ແຜນແມ່ບົດວ່າດ້ວຍການເຊື່ອມຈອດ ອາຊຽນ ກັບ ຂໍ້ລິເລີ່ມໜຶ່ງແລວ, ໜຶ່ງເສັ້ນທາງ ຂອງຈີນ ເພື່ອເປັນການສົ່ງເສີມການເຊື່ອມໂຍງທາງເສດຖະກິດ, ການເຊື່ອມຈອດພາກພື້ນ ແລະ ການພົວພັນລະຫວ່າງປະຊາຊົນກັບປະຊາຊົນ ພ້ອມນີ້ ໄດ້ຮັບເອົາປີ 2020 ເປັນປີແລກປ່ຽນ ອາຊຽນ-ຈີນ. ພິເສດ, ຜູ້ນຳອາຊຽນໄດ້ ຕົກລົງເຫັນດີຮັດແໜ້ນການຮ່ວມມືໃນອະນາຄົດໂດຍການມອບໝາຍໃຫ້ພາກສ່ວນກ່ຽວຂ້ອງຂອງ ອາຊຽນ ແລະ ຈີນ ເລີ່ມຕົ້ນການເຈລະຈາແຜນປະຕິບັດງານອາຊຽນ-ຈີນ ສະບັບໃໝ່ສໍໍາລັບປີ 2021-2025.

ກອງປະຊຸມສຸດຍອດ ອາຊຽນ-ອິນເດຍ ຄັ້ງທີ 16 ໄດ້ຕີລາຄາສູງຕໍ່ຜົນສຳເລັດການຈັດຕັ້ງປະຕິບັດການພົວພັນຮ່ວມມືໃນປີຜ່ານມາໂດຍສະເພາະໄດ້ຈັດຕັ້ງຜັນຂະຫຍາຍແຜນປະຕິບັດງານ ອາຊຽນ-ອິນເດຍ ສຳລັບປີ 2016-2020  ແລະ ເນື້ອໃຈຈິດໃຈຂໍ້ລິເລີ່ມຕ່າງໆ ທີ່ຕົກລົງກັນໃນກອງປະຊຸມສຸດຍອດສະເຫລີມສະຫລອງການພົວພັນ ອາຊຽນ- ອິນເດຍ ຄົບຮອບ 25 ປີ. ພ້ອມນີ້, ກອງປະຊຸມໄດ້ເຫັນດີ ໃຫ້ມີການເລີ່ມຕົ້ນຮ່າງແຜນປະຕິບັດງານອາຊຽນສະບັບໃໝ່ສຳລັບປີ 2021-2025. ຄຽງຄູ່ກັບການການຈັດຕັ້ງປະຕິບັດແຜນປະຕິບັດງານ ອາຊຽນ-ອິນເດຍ ສຳລັບປິ 2016-2020 ເຊິ່ງຜູ້ນຳອາຊຽນ ແລະ ອິນເດຍ ໄດ້ຍິນດີໃຫ້ມີການເລີ່ມຕົ້ນເຈລະຈາແຜນປະຕິບັດງານອາຊຽນຈີນສະບັບໃໝ່ ສໍາລັບປີ 2021-2025. ກອງປະຊຸມ  ໄດ້ຢໍ້າຄືນຄວາມໝາຍໝັ້ນໃນການເພີ່ມທະວີ ແລະ ຮັດແໜ້ນການເປັນຄູ່ຮ່ວມຍຸດທະສາດ ແລະ ເນັ້ນໃສ່ການຮ່ວມມືໃນອະນາຄົດໃນຂົງເຂດຕ່າງໆ ເຊັ່ນ: ການຮ່ວມມືທາງທະເລ, ການເຊື່ອມຈອດ, ​ແນວ​ຄວາມ​ຄິດກ່ຽວກັບ​ເສດຖະກິດ​ສີຟ້າ (blue economy), ການລົງທຶນ, ການທ່ອງທ່ຽວ, ການຖ່າຍທອດເຕັກໂນໂລຊີໃໝ່, ນະວັດຕະກຳ ແລະ ອື່ນໆ.

ໃນຕອນບ່າຍ ຂອງວັນດຽວກັນ, ທ່ານນາຍົກລັດຖະມົນຕີ ທອງລຸນ ສີສຸລິດ ຍັງໄດ້ສືບຕໍ່ນຳພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດ ອາຊຽນ-ສປຊ ຄັ້ງທີ 10, ເຊິ່ງກອງປະຊຸມໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າ ໃນການຈັດຕັ້ງປະຕິບັດການເປັນຄູ່ຮ່ວມມື ອາຊຽນ-ສປຊ ໃນໄລຍະຜ່ານມາ, ໂດຍສະເພາະການຈັດຕັ້ງປະຕິບັດແຜນປະຕິບັດງານ ອາຊຽນ-ສປຊ (2016-2020). ຄ່ຽງຄູ່ກັນນີ້, ກອງປະຊຸມຍັງໄດ້ຊົມເຊີຍການພົບປະປະຈໍາປີ ລະຫວ່າງ ລັດຖະມົນຕີຕ່າງປະເທດອາຊຽນ ແລະ ເລຂາທິການໃຫຍ່ ສປຊ ແລະ ປະທານກອງປະຊຸມສະມັດຊາໃຫຍ່ ສປຊ ໃນໂອກາດກອງປະຊຸມສະມັດຊາໃຫຍ່ ສປຊ ທີ່ ນິວຢອກ, ເຊິ່ງການພົບປະດັ່ງກ່າວ ໄດ້ເປັນການປະກອບສ່ວນເຂົ້າໃນການສົ່ງເສີມ ແລະ ຫັດແໜ້ນການຮ່ວມມື  ລະຫວ່າງ ສອງອົງການຈັດຕັ້ງ. ນອກຈາກນີ້, ກອງປະຊຸມຍັງໄດ້ມີການປຶກສາຫາລືບັນຫາການປ່ຽນແປງຂອງດິນຟ້າອາກາດ ແລະ ໄພພິບັດທຳມະຊາດ, ຊິ່ງເຫັນວ່າ ເປັນໄພຂົ່ມຂູ່ຕໍ່ສະຖຽນລະພາບ ແລະ ການພັດທະນາເສດຖະກິດ-ສັງຄົມຂອງບັນດາປະເທດໃນໂລກ ລວມທັງປະເທດສະມາຊິກອາຊຽນ. ພິເສດ, ກອງປະຊຸມຄັ້ງນີ້ໄດ້ຮັບຊາບເອກະສານແຜນປະຕິບັດງານເພື່ອການເສີມສ້າງເຊິ່ງກັນ ແລະ ກັນ ລະຫວ່າງ ວີໄສທັດປະຊາຄົມອາຊຽນ 2025 ແລະ ວາລະ ສປຊ 2030 ເພື່ອການພັດທະນາແບບຍືນຍົງ ແລະ ໄດ້ມີພິທີປະກາດເປີດນຳໃຊ້ສູນອາຊຽນເພື່ອປຶກສາຫາລື ແລະ ການສຶກສາດ້ານການພັດທະນາແບບຢືນຍົງອີກດ້ວຍ.

ໃນວັນດຽວກັນນີ້, ພະນະທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍຄະນະຜູ້ແທນ ຍັງໄດ້ພົບປະສອງຝ່າຍກັບບັນດາຜູ້ນຳປະເທດເພື່ອນມິດ ເປັນຕົ້ນແມ່ນ ພົບປະສອງຝ່າຍກັບ ພະນະທ່ານ ຫຼີ ເຄີ້ສຽງ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນຈີນ, ສອງຝ່າຍ ໄດ້ຮ່ວມກັນປຶກສາຫາລື ເພື່ອຊຸກຍູ້ສົ່ງເສີມການຮ່ວມມືສອງຝ່າຍ ດ້ານເສດຖະກິດ, ການຄ້າ-ການລົງທຶນ ແລະ ດ້ານອື່ນໆ ໃຫ້ຫຼາຍຂຶ້ນໃນອະນາຄົດ, ສອງຝ່າຍ ຍັງໄດ້ສະແດງຄວາມຢືນຢັນຈະສືບຕໍ່ຊຸກຍູ້ສົ່ງເສີມການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ເປັນເພື່ອນສະຕາກໍາທີ່ມຸ່ງໄປສູ່ອະນາຄົດແຫ່ງການຮ່ວມແຮງຮ່ວມໃຈ ແລະ ຮ່ວມກັນພັດທະນາ ພ້ອມທັງໃຫ້ຄວາມສຳຄັນແກ່ການແບ່ງປັນ, ເອື້ອເຟື້ອ ແລະ ການຊ່ວຍເຫຼືອເຊິ່ງກັນ ແລະ ກັນ ຖານມິດສະຫາຍອ້າຍນ້ອງ ຕ່າງຝ່າຍຕ່າງໄດ້ຮັບຜົນປະໂຫຍດ.

ການມາເຂົ້າຮ່ວມກອງປະຊຸມສຸດຍອດອາຊຽນ ໃນຄັ້ງນີ້ ນອກຈາກຈະໄດ້ພົບປະສອງຝ່າຍກັບ ການນຳຂອງ ສປ ຈີນ ແລ້ວ, ພະນະທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍຄະນະ ຍັງໄດ້ພົບປະສອງຝ່າຍກັບ ພະນະທ່ານ ດີມິຕຣີ ເມດເວເດບ, ນາຍົກລັດຖະມົນຕີ ແຫ່ງ ສະຫະພັນ ຣັດເຊຍ, ຊຶ່ງສອງຝ່າຍ ສະແດງຄວາມຍິນດີສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ຮັດແໜ້ນການພົວພັນຮ່ວມມືອັນດີງາມຂອງສອງຊາດ ໃຫ້ນັບມື້ຈະເລີນງອກງາມຂຶ້ນໄປເລື້ອຍໆ.

ຂ່າວຈາກ: ກົມການຂ່າວ, ກະຊວງການຕ່າງປະເທດ.