ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກລັດຖະມົນຕີ ຢ້ຽມຊົມໂຄງການໄຟຟ້າຫົງສາ ແຂວງໄຊຍະບູລີ

ມື້ນີ້ ວັນທີ 3 ມີນາ 2020, ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວເຮັດວຽກຢູ່ເມືອງຫົງສາ, ແຂວງໄຊຍະບູລີ ແລະ ໄດ້ໄປຢ້ຽມຊົມ ບໍລິສັດໄຟຟ້າຫົງສາຈໍາກັດ, ໂດຍມີ ທ່ານ ຄະທາຢຸດ ຊູພູນ, ຜູ້ອໍານວຍການໃຫຍ່ ບໍລິສັດໄຟຟ້າຫົງສາຈໍາກັດ ພ້ອມດ້ວຍການນໍາແຂວງໄຊຍະບູລີ, ການນໍາເມືອງຫົງສາ, ຄະນະກໍາມະການບໍລິຫານ ບໍລິສັດໄຟຟ້າຫົງສາຈໍາກັດ ແລະ ປະຊາຊົນທ້ອງຖິ່ນໃຫ້ການຕ້ອນຮັບຢ່າງອົບອຸ່ນ.
ໃນການເຄື່ອນໄຫວລົງທ້ອງຖິ່ນຄັ້ງນີ້, ທ່ານນາຍົກລັດຖະ​ມົນຕີ ໄດ້ລົງພື້ນທີ່ຢ້ຽມຢາມຫ້ອງການພາກສະໜາມ ຝ່າຍພັດທະນາສັງຄົມ ແລະ ຮ້ານຄ້າສະຫະກອນສົ່ງເສີມກະສິກໍາເມືອງຫົງສາ ທີ່ບໍລິສັດໄຟຟ້າຫົງສາຈໍາກັດ ໄດ້ຈັດຕັ້ງຂຶ້ນ ເພື່ອສົ່ງເສີມດ້ານການຕະຫຼາດ, ລວມໄປເຖິງ ການກະຈາຍສິນຄ້າຂອງທ້ອງຖິ່ນອອກສູ່ຕະຫຼາດຢ່າງເປັນລະບົບ, ໂດຍມຸ່ງຫວັງໃຫ້ເປັນຕົ້ນແບບຂອງສະຫະກອນແຫ່ງທໍາອິດໃນພາກເໜືອຂອງ ສປປ ລາວ.
ຫຼັງຈາກນັ້ນ, ທ່ານທອງລຸນ ສີສຸລິດ ພ້ອມຄະນະ ກໍ່ໄດ້ເຂົ້າຊົມ ອາຄານຫົງຄໍາໄຊຍາຄານ ແລະ ຫ້ອງວາງສະແດງຂໍ້ມູນ ທີ່ເປັນອາຄານຈັດສະແດງໃຫ້ຄວາມຮູ້, ຄວາມເຂົ້າໃຈກ່ຽວກັບການດໍາເນີນງານຂອງບໍລິສັດ ແລະ ຂະບວນການຜະ ລິດກະແສໄຟຟ້າ ທີ່ເປັນມິດກັບສິ່ງແວດລ້ອມ, ການພັດ​ທະນາຊຸມຊົນ ແລະ ສັງຄົມ; ພ້ອມກັນນັ້ນ ທາງບໍລີສັດ ຍັງມີເປົ້າ ໝາຍເພື່ອສ້າງປະຊາຊົນທ້ອງຖິ່ນໃຫ້ເປັນພົນລະ​ເມືອງດີ ທີ່ເຮັດປະໂຫຍດຕໍ່ສັງຄົມ, ໂດຍສະເພາະຢ່າງຍິ່ງຕໍ່ກັບຊຸມຊົນ ເມືອງຫົງສາ, ເມືອງເງິນ, ແຂວງໄຊຍະບູລີ ແລະ ປະເທດລາວ ໂດຍລວມ, ຈຶ່ງໄດ້ມີສ່ວນຮ່ວມໃນການຄິດຄົ້ນຫາກິດຈະກໍາຕ່າງໆ ທັງໃນດ້ານການສືບສານຂະນົບທໍານຽມ, ປະເພນີວັດທະນະທໍາ, ການສຶກສາ ແລະ ກິລາ ຢ່າງຕໍ່ເນື່ອງ ແລະ ການນໍາມາດຕະຖານການຈັດການດ້ານສິ່ງແວດລ້ອມຂອງທະນາຄານໂລກມາເປັນມາດຕະຖານໃນການດໍາເນີນງານ ຈົນໄດ້ຮັບການຮັບຮອງມາດຕະຖານດ້ານການຈັດການສິ່ງແວດລ້ອມໃນລະດັບສາກົນ ຫຼື ISO 14001 version 2015 ໂດຍມີຕົວແທນເຍົາວະຊົນ ແລະ ອາວຸໂສຂອງ ເມືອງຫົງສາ ເຮັດໜ້າທີ່ເປັນຜູ້ບັນຍາຍ ແລະ ໃຫ້ຂໍ້ມູນກັບຄະນະ.
ສໍາລັບບໍລິສັດໄຟຟ້າຫົງສາຈໍາກັດ ຖືວ່າເປັນອີກພາກສ່ວນໜຶ່ງທີ່ມີບົດບາດສໍາຄັນໃນການຜະລິດພະລັງງານໄຟຟ້າທີ່ມີຄວາມສະຖຽນລະພາບໃຫ້ກັບ ສປປ ລາວ ແລະ ລາຊະ​ອານາຈັກໄທ ໂດຍໂຮງໄຟຟ້າພະລັງງານຄວາມຮ້ອນຫົງສາ ສາມາດຜະລິດກະແສໄຟຟ້າສົ່ງໃຫ້ກັບລັດວິສາຫະກິດໄຟ​ຟ້າລາວ 100 ເມກາວັດ ເທົ່າກັບ 8% ຂອງຄວາມຕ້ອງການພະລັງງານໄຟຟ້າໃນ ສປປ ລາວ ແລະ ຜະລິດກະແສໄຟຟ້າສົ່ງໃຫ້ກັບ ການໄຟຟ້າຝ່າຍຜະລິດແຫ່ງປະເທດໄທ ຈໍານວນ 1,473 ເມກາວັດ ເທົ່າກັບ 6% ຂອງຄວາມຕ້ອງການພະລັງງານໄຟຟ້າໃນປະເທດໄທ.
ທ່ານ ຄະທາຢຸດ ຊູພູນ, ຜູ້ອໍານວຍການໃຫຍ່ ບໍລິສັດໄຟຟ້າຫົງສາຈໍາກັດ ກ່າວວ່າ: ຕະຫຼອດໄລຍະເວລາ 5 ປີທີ່ຜ່ານມາ, ການດໍາເນີນງານຂອງ ບໍລິສັດໄຟຟ້າຫົງສາຈໍາກັດ ໄດ້ໃຫ້ຄວາມສໍາຄັນ ແລະ ປະຕິບັດຕົນເພື່ອໃຫ້ສອດຄ່ອງຕາມສັນຍາສໍາປະທານ ໂດຍໄດ້ສໍາເລັດຕາມຈຸດປະສົງ ແລະ ບັນລຸຕາມເປົ້າໝາຍທຸກປະການ ແລະ ເປັນສິ່ງຢັ້ງຢືນໄດ້ວ່າ ບໍລິສັດ ໄຟຟ້າຫົງສາຈໍາກັດ ມີຄວາມມຸ່ງໝັ້ນທີ່ຈະສະ​ໜັບສະໜູນ ແລະ ພ້ອມທີ່ຈະດໍາເນີນງານຕາມແຜນພັດທະນາເສດຖະກິດ ແລະ ສັງຄົມແຫ່ງຊາດຂອງລັດຖະບານລາວ ກໍ່ຄື ການພັດທະນາປະເທດໃຫ້ເປັນແຫຼ່ງພະລັງງານຂອງພາກພື້ນອາຊີ ຫຼື “Battery of ASIA” ປະກອບກັບໂຮງໄຟຟ້າພະລັງງານຄວາມຮ້ອນຫົງສາ ມີສັກກະຍະພາບໃນການດໍາເນີນງານ ທີ່ມີຄວາມພ້ອມຈ່າຍກະແສໄຟຟ້າໄດ້ດີຂຶ້ນຕາມລໍາດັບ ແລະ ຍືນຍົງຕໍ່ໄປ ພາຍໃຕ້ວິໄສທັດຂອງບໍລິສັດໄຟຟ້າຫົງສາຈໍາກັດ ຄື: ການເປັນໂຮງໄຟຟ້າປາກບໍ່ແຮ່ນໍາໜ້າໃນອາຊຽນ ໂດຍການເຮັດວຽກທີ່ເປັນເລີດ ສ້າງຄວາມເຊື່ອໝັ້ນ ແລະ ຄວາມສຸກສູ່ສັງຄົມ ພ້ອມທີ່ຈະເປັນໂຮງໄຟຟ້າທີ່ສ້າງຄວາມໝັ້ນຄົງທາງດ້ານພະລັງງານໃຫ້ກັບສອງປະເທດສືບຕໍ່ໄປ.